Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

108: Na lege ti Damas

108: Na lege ti Damas

KOLI so alango na sese so ayeke zo wa? Mo hinga lo? A yeke Saul. Lo la si abata lani bongo ti azo so abo Etienne na tênë. Bâ kota wâ so aza ngangu so! Nyen la asi nyen?

Na peko ti kuâ ti Etienne, Saul amû li ni ti gi adisciple ti Jésus ti sara sioni na ala. Lo lï na yâ ti ada ti azo oko oko kue ti gboto ala ti bi ala na da ti kanga. Adisciple mingi akpe ague na ambeni kodoro nde, si ala to nda ti fa ‘nzo tënë’ na ando so. Me Saul amû peko ti ala ti gbu ala. Lo yeke gue fadeso na Damas. Me na lege mbeni ye ti kpene asi.

Mbeni wâ alondo na yayu aga aza na tere ti Saul. Lo tï na sese tongana ti so e bâ ge, na mbeni go atene: ‘Saul, Saul! Mo yeke sara sioni na mbi ngbanga ti nyen?’ Azo so ayeke na tere ti Saul abâ wâ ni na ala mä go ni, me ala mä yâ ti tënë ni so pëpe.

Wâ so aza ngangu asara si Saul abâ ndo mbeni pëpe

Saul ahunda, lo tene: ‘Mo yeke zo wa, Seigneur?’

Go ni atene: ‘Mbi yeke Jésus, zo so mo yeke sara sioni na lo so.’ Jésus atene tongaso ngbanga ti so sioni so Saul asara na tere ti adisciple ti Jésus ayeke mo bâ mo tene a yeke na lo si Saul asara ni.

Saul ahunda, lo tene: ‘A lingbi mbi sara nyen, Seigneur?’

Jésus atene na lo: ‘Londo, mo gue na Damas. Kâ, a yeke fa na mo ye so a lingbi mo sara.’ Tongana Saul alondo, na lo zi lê ti lo, lo bâ ndo oko pëpe. Lê ti lo akanga! Tongaso, azo ti tere ti lo amû lo agbu maboko ti lo ague na lo na Damas.

Jésus asara tënë fadeso na mbeni disciple ti lo so ayeke na Damas, lo tene: ‘Ananias, londo. Gue na lege so a iri ni Mbilimbili. Tongana mo si na da ti Judas, hunda ti bâ zo so iri ti lo ayeke Saul. Mbi soro lo ti ga mbeni kota wakua ti mbi.’

Ananias ague. Tongana lo wara Saul, lo zia maboko na ndo ti lo, na lo tene: ‘Seigneur atokua mbi ti sara si mo kiri mo bâ ndo na ti tene mo si na yingo vulu.’ Tongana lo tene tënë so, bâ, mbeni ye so akpa tere ti susu alondo na lê ti Saul atï, si lo kiri lo bâ ndo.

Jésus asara kusala na Saul mingi ti fa tënë na azo ti akodoro nde nde. Azo ahinga lo fadeso na iri ti bazengele Paul, na e yeke manda ande ye mingi na ndo ti lo. Me kozoni, zia e bâ ye so Nzapa atokua Pierre ti sara.

Kusala 8:1-4; 9:1-20; 22:6-16; 26:8-20.



Ahundango tënë

  • Saul asara nyen na peko ti so a fâ Etienne?
  • Tongana Saul ayeke na lege ti gue na Damas, ye ti kpene wa asi?
  • Jésus atene na Saul ti sara nyen?
  • Aye wa Jésus afa na Ananias ti sara? Tongana nyen Saul akiri abâ ndo?
  • A hinga fadeso Saul na iri wa? A sara kusala na lo tongana nyen?

Ambeni hundango tënë

  • Diko Kusala 8:1-4.

    Tongana nyen aye ti ngangu so a sara mingi na fini kongregation ti aChrétien amû lege ti kangbi tënë ti mabe ti aChrétien na ambeni ndo nde? Mara ti ye tongaso wa asi nga na ngoi ti e? (Kus. 8:4; Es. 54:17).

  • Diko Kusala 9:1-20.

    Jésus afa so lo pensé ti mû na Saul kusala wa so yâ ni ayeke ota? (Kus. 9:15; 13:5; 26:1; 27:24; aRom. 11:13).

  • Diko Kusala 22:6-16.

    Tongana nyen e lingbi ti mû tapande ti Ananias? Ngbanga ti nyen a yeke kota ye mingi? (Kus. 22:12; 1 Tim. 3:7; 1 Pi. 1:14-16; 2:12).

  • Diko Kusala 26:8-20.

    So Saul aga Chrétien alingbi ti kpengba aita so laso koli ti ala wala wali ti ala ayeke aTémoin ti Jéhovah pëpe tongana nyen? (Kus. 26:11; 1 Tim. 1:14-16; 2 Tim. 4:2; 1 Pi. 3:1-3).