Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

107: A bo Etienne na tênë

107: A bo Etienne na tênë

KOLI so akuku na sese so ayeke Etienne. Lo yeke mbeni disciple be-ta-zo ti Jésus. Me bâ ye so asi na lo! Akoli so ayeke bo lo na akota tênë. Ndali ti nyen si ala ke Etienne ngangu tongaso si ala sara ye ti sioni so na tere ti lo so? Zia e bâ.

Azo ayeke mû atênë ti bo na Etienne

Nzapa amû maboko na Etienne ti sara amiracle mingi. A nzere na akoli so pëpe, tongaso ala papa na lo ndali ti so lo fa tâ tënë na azo. Me Nzapa amû ndara mingi na Etienne, si Etienne afa so akoli so ayeke fa atënë ti mvene na azo. Ye so akiri azia ngonzo na bê ti ala mingi. Tongaso ala gbu lo, na ala iri azo ti ga ti tene mvene na ndo ti lo.

Kota prêtre ahunda na Etienne, lo tene: ‘Tâ tënë la ala tene so?’ Etienne akiri tënë na ala na fango na ala ye so ayeke na yâ ti Mbeti ti Nzapa na mbeni lege so ayeke pendere mingi. Na hunzingo ni, lo fa tongana nyen asioni zo ake giriri aprophète ti Jéhovah. Na pekoni, lo tene: ‘Ala yeke tâ gi tongana azo so. Ala fâ Jésus, lo so ayeke wakua ti Nzapa, na ala sara ye alingbi na andia ti Nzapa pëpe.’

Ye so asara si lê ti amokonzi-nzapa ni abe na ngonzo na ala te pembe ti ala. Me Etienne ayô li ti lo na nduzu na lo tene: ‘Bâ! Mbi bâ Jésus aluti na koti ti Nzapa na yayu.’ Na mango tënë so, azo ni akanga mê ti ala na ala tuku na ndo ti lo, si ala gbu lo agboto lo, na ala asigigi na lo na yâ ti kodoro ni.

Kâ, ala zi bongo ti ala ti ndo ni na ala mû ni na mbeni maseka-koli so iri ti lo ayeke Saul ti bata ni. Mo bâ Saul ge? Fadeso, azo ni amû atênë ti bo na Etienne. Etienne akuku na sese na lo sambela Nzapa tongana ti so mo bâ na lê ti foto so. Lo tene: ‘Jéhovah, kiri na ala pëpe sioni so ala sara so.’ Lo hinga so a yeke amokonzi-nzapa la si ahanda ambeni na popo ti ala. Na pekoni, Etienne akui.

Tongana mbeni zo asara sioni na mo, mo yeke gi ti kiri ni na lo, wala mo yeke hunda na Nzapa ti kiri sioni so na lo? Etienne na Jésus asara tongaso pëpe. Ala sara nzoni même na azo so asara sioni na ala. Zia e tara ti sara ye tongana ala.

Kusala 6:8-15; 7:1-60.



Ahundango tënë

  • Etienne ayeke zo wa? Nzapa amû maboko na lo ti sara nyen?
  • Etienne atene nyen so amû ngonzo mingi na amokonzi-nzapa ni?
  • Tongana azo agboto Etienne asigigi na lo na yâ ti kodoro ni, ala sara nyen na lo?
  • Na lê ti foto ni, koli so aluti kâ na tere ti abongo so ayeke zo wa?
  • Kozoni si lo kui, Etienne asambela Jéhovah, lo tene nyen?
  • Na tapande ti Etienne, a lingbi e sara nyen tongana mbeni zo asara mbeni ye ti sioni na e?

Ambeni hundango tënë

  • Diko Kusala 6:8-15.

    Amokonzi-nzapa asara kusala na aye ti handa wa ti kanga lege na kusala ti aTémoin ti Jéhovah? (Kus. 6:9, 11, 13).

  • Diko Kusala 7:1-60.

    Nyen la amû lani maboko na Etienne ti ndu bê ti azo tongana lo yeke fa nzo tënë na gbele Sanhédrin? E lingbi ti manda nyen na lege ti tapande ti lo? (Kus. 7:51-53; aRom. 15:4; 2 Tim. 3:14-17; 1 Pi. 3:15).

    Bango ndo wa a lingbi e duti na ni na mbage ti azo so agi ti kanga lege na kusala ti e? (Kus. 7:58-60; Mat. 5:44; Luc 23:33, 34).