Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

106: Mbeni ange azi ala na kanga

106: Mbeni ange azi ala na kanga

BÂ ANGE so azi yanga ti da ti kanga so. Azo so lo zi ala so ayeke abazengele ti Jésus. Zia e bâ ngbanga ti nyen a bi ala na da ti kanga.

Mbeni ange ayeke zi abazengele

A sara ngoi kete awe so Jésus atuku yingo vulu na ndo ti adisciple ti lo. Bâ ye so asi: Na mbeni lakui, Pierre na Jean ague na temple na Jérusalem. Kâ, mbeni koli aduti na tere ti yanga-da ti temple ni, gere ti lo abuba ngbene ye so a dü lo. Lakue, azo ayeke yô lo azia lo kâ ti iri nginza na tïtî azo so ayeke ga na yâ ti temple ni. Tongana lo bâ Pierre na Jean, lo iri ye na tïtî ala. Fade abazengele ni ayeke sara nyen?

Ala luti si ala bâ yâ ti lê ti zo ti mawa so. Pierre atene: ‘Mbi yeke na nginza pëpe, me mbi yeke mû na mo ye so mbi yeke na ni. Na iri ti Jésus, londo na tambela!’ Pierre agbu tïtî koli ni na maboko ti lo ti koti, na koli ni ahuru na lo to nda ti tambela. Tongana azo abâ ye so asi, bê ti ala adö na ala yeke na ngia mingi ti bâ miracle so.

Pierre atene: ‘A yeke na ngangu ti Nzapa so azingo Jésus na kuâ si e sara miracle so.’ Na ndembe so lo na Jean angbâ ti sara tënë, ambeni mokonzi-nzapa aga. Ngonzo asara ala ngbanga ti so Pierre na Jean ayeke sara tënë ti zingongo ti Jésus na kuâ na azo. Tongaso, ala gbu ala na ala bï ala na da ti kanga.

Na ndade ni, amokonzi-nzapa asara mbeni kota bungbi. Ala iri Pierre na Jean nga na zo so ala sava lo ti ga na popo ti ala. Amokonzi-nzapa ni ahunda ala, a tene: ‘Ala sara miracle so na ngangu ti zo wa?’

Pierre atene na ala so a yeke na ngangu ti Nzapa so azingo Jésus na kuâ si ala sara miracle so. Aprêtre ni ahinga ye so ala lingbi ti sara pëpe, teti so tënë ti miracle so ayeke tâ tënë, na ala lingbi ti bere ni pëpe. Tongaso, ala gboto mê ti abazengele ni ti fa tënë ti Jésus mbeni pëpe, na ala zia ala ti gue.

Tongana ngoi ayeke hon, abazengele angbâ lakue ti fa tënë ti Jésus na ti zi kobela na tere ti azo. Tënë ti amiracle so amû ndo kue, si gbâ ti azo ti akodoro so ayeke nduru na Jérusalem aga na azo ti tene abazengele akaï kobela ti ala. Ye so asara si kota bê asara amokonzi-nzapa ni. Tongaso, ala gbu abazengele ni na ala bi ala na da ti kanga. Me ala ngbâ kâ a ninga pëpe.

Na bï ni, mbeni ange ti Nzapa aga azi yanga-da ni, tongana ti so mo bâ ge. Lo tene na abazengele ni: ‘Ala gue aluti na yâ ti temple, na ala fa tënë lakue na azo.’ Na ndade ni na ndapre, tongana amokonzi-nzapa atokua azo na da ti kanga ni ti mû abazengele, andâ ala hon ti ala awe. Na pekoni, azo ni awara abazengele ni na yâ ti temple, ala yeke fa tënë. Ala gbu ala na ala gue na ala na da ti Sanhédrin.

Amokonzi-nzapa ni atene: ‘E ke fade na ala ti fa tënë na ndo ti Jésus. Me ala sara si fango ye ti ala amû yâ ti Jérusalem kue.’ Me abazengele akiri tënë, ala tene: ‘A yeke ngbanga ti e ti mä Nzapa, mokonzi ti e, ahon ti mä azo.’ Tongaso, ala ngbâ lakue ti fa ‘nzo tënë’. E nga kue e ye ti sara tongaso pëpe?

Kusala chapitre 3 ti si na 5.



Ahundango tënë

  • Nyen la asi na Pierre na Jean mbeni lâ na peko ti midi tongana ala yeke gue na temple?
  • Pierre atene nyen na mbeni koli so gere ti lo abuba? Ye wa Pierre amû na lo so ngere ni ahon ti nginza?
  • Ngbanga ti nyen amokonzi-nzapa asara ngonzo? Ala sara nyen na Pierre nga na Jean?
  • Pierre atene nyen na amokonzi-nzapa ni? Amokonzi-nzapa ni asuku na ala, ala tene nyen?
  • Amokonzi-nzapa ni asara kota bê ngbanga ti nyen? Me nyen la asi tongana a bi abazengele ni na da ti kanga ti fani use ni?
  • Abazengele akiri tënë tongana nyen na ngoi so a mû ala a gue na ni na da ti Sanhédrin?

Ambeni hundango tënë

  • Diko Kusala 3:1-10.

    Atâa so a mû na e ngangu ti sara amiracle laso pëpe, tongana nyen atënë ti Pierre na Kusala 3:6 amû maboko na e ti bâ na nene ni tënë ti Royaume so e yeke fa ni? (Jean 17:3; 2 aCor. 5:18-20; aPhil. 3:8).

  • Diko Kusala 4:1-31.

    Tongana azo agi ti kanga lege na kusala ti e, a lingbi e mû tapande ti aita ti e aChrétien ti ngoi ti abazengele tongana nyen? (Kus. 4:29, 31; aEph. 6:18-20; 1 aThes. 2:2).

  • Diko Kusala 5:17-42.

    Tongana nyen ambeni zo so ayeke aTémoin pëpe, atâa ti giriri wala ti laso, afa nzoni bango ndo na mbage ti kusala ti e ti fango tënë? (Kus. 5:34-39).