Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

104: Jésus akiri na yayu

104: Jésus akiri na yayu

TONGANA alango ayeke hon, Jésus afa tere ti lo na adisciple ti lo fani mingi. Mbeni lâ adisciple ti lo 500 tongaso abâ lo. Tongana lo si na ala, lo sara tënë ti nyen na ala? Mo hinga? Lo sara tënë ti Royaume ti Nzapa. Jéhovah atokua lani Jésus na ndo ti sese ti fa ye na azo na ndo ti Royaume so. Lo ngbâ ti sara tongaso lakue même na peko ti so a zingo lo na kuâ.

Jésus ayeke kiri na yayu

Royaume ti Nzapa ayeke nyen? Mo dabe ti mo na ni? A yeke ngorogbia ti Nzapa na yayu, na Jésus ayeke Lo so Nzapa asoro lo ti duti Gbia ni. Tongana ti so e manda awe, so lani Jésus amû kobe na azo ti nzara, lo zi kobela na tere ti azo nga lo zingo même akuâ, lo fa so lo yeke duti ande mbeni nzoni gbia.

Tongaso, tongana Jésus ayeke komande na yayu teti ngu saki oko, aye ayeke duti ande tongana nyen na ndo ti sese ge? Sese ni kue ayeke ga ande mbeni pendere paradis. Bira ayeke duti dä pëpe, sarango sioni, kobela na même kuâ ayeke duti dä nga pëpe. E hinga so a yeke tâ tënë ngbanga ti so Nzapa ayeke sara si sese ni aga paradis ti tene azo aduti dä na ngia. A yeke nda ni la si lo leke lani yaka ti Eden na tongo nda ni. Jésus ayeke sara kue ti tene ye so Nzapa aye ti sara aga tâ tënë.

Ngoi ni asi awe ti tene Jésus akiri na yayu. Teti alango 40, Jésus afa tere ti lo na adisciple ti lo, tongaso si ala hinga biani atene Jésus akiri na fini awe. Me kozoni si lo kiri na yayu, lo tene na adisciple ti lo: ‘Ala ngbâ na Jérusalem juska ala wara yingo vulu si.’ Yingo vulu ayeke ngangu ti Nzapa ti sara na kusala, na a yeke tongana pupu. Yingo so ayeke mû maboko na azo ti Nzapa ti sara ye so bê ti lo aye. Na nda ni, Jésus atene: ‘Ala fa tënë ti mbi juska na nda ti sese kue.’

Na peko ti so Jésus atene tënë so, mbeni ye ti ndima asi. Lo to nda ni yeke yeke ti gue na yayu, tongana ti so mo bâ ge. Na pekoni, mbeni mbinda angoro lo kue, si adisciple ti lo alingbi ti bâ lo mbeni pëpe. Jésus ague na yayu. Kâ, lo to nda ti komande na ndo ti adisciple ti lo na sese ge.

Adisciple ayeke bâ ndo na yayu

1 aCorinthien 15:3-8; Apocalypse 21:3, 4; Kusala 1:1-11.



Ahundango tënë

  • Mbeni lâ, adisciple oke abâ Jésus? Lo sara tënë ti nyen na ala?
  • Royaume ti Nzapa ayeke nyen? Gigi ayeke duti ande tongana nyen na ndo ti sese na ngoi so Jésus ayeke komande tongana Gbia teti ngu saki oko?
  • Teti lango oke Jésus afa tere ti lo na adisciple ti lo? Me ngoi asi fadeso awe ti tene lo sara nyen?
  • Tâ gi kozoni si lo zia adisciple ti lo ti gue, Jésus atene na ala ti sara nyen?
  • Nyen la asi na lê ti foto so? Tongana nyen Jésus agirisa na lê ti adisciple ti lo?

Ambeni hundango tënë

  • Diko 1 aCorinthien 15:3-8.

    Ngbanga ti nyen bazengele Paul alingbi lani ti sara tënë ti zingongo ti Jésus na kuâ na kite oko pëpe? A-Chrétien laso alingbi nga ti sara tënë ti nyen na kite oko pëpe? (1 aCor. 15:4, 7, 8; Es. 2:2, 3; Mat. 24:14; 2 Tim. 3:1-5).

  • Diko Kusala 1:1-11.

    Tongana ti so Kusala 1:8 atene kozoni, a fa tënë juska na ndo wa? (Kus. 6:7; 9:31; 11:19-21; aCol. 1:23).

TI HINGA AMBENI TËNË

Christ aduti na mbage ti maboko ti Nzapa ti koli

Na ngoi so Jésus angbâ ti ku yanga so a yeke mû na lo ti londo na tere ti awato ti lo, kua ti nyen la lo sara?