Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

102: Jésus azingo na kuâ

102: Jésus azingo na kuâ

WALI so na akoli use so ayeke azo wa? Wali ni ayeke Marie Madeleine, mbeni disciple ti Jésus. Akoli so ayü vuru bongo so ayeke a-ange. Kete da so Marie abâ ndo na yâ ni so ayeke ndo so a zia kuâ ti Jésus dä. Me kuâ ti Jésus ayeke na yâ ni mbeni pëpe! Zo wa la amû ni, zo wa? Zia e bâ.

A-ange ayeke sara tënë na Marie Madeleine

Na peko ti so Jésus akui, aprêtre atene na Pilate: ‘Lani so Jésus ade na fini, lo tene so lo yeke zingo ande na kuâ lango ota na pekoni. Tongaso, mû yanga ti tene a bata yanga ti dû so a zia kuâ ni dä si adisciple ti lo aga anzi kuâ ti lo pëpe, si ala tene pëpe so a zingo lo na kuâ!’ Pilate atene na aprêtre ni ti tokua aturugu ti bata yanga ti dû ni.

Me mo ye ti bâ, na kota yanga ti ndapre ti lango ota ni na peko ti so Jésus akui, mbeni ange ti Jéhovah asi. Lo pusu tênë so ayeke na yanga ti dû ti kuâ ni. Mbeto agbu aturugu ni mingi si ala lingbi ti sara ye oko pëpe. Na nda ni, tongana ala bâ ndo na yâ ti dû ni, ala bâ so kuâ ti Jésus ayeke dä pëpe! Ambeni turugu ni ague atene pekoni na aprêtre ni. Asioni prêtre so asara nyen? Ala mû pata na aturugu ni ti tene ala tene mvene. Aprêtre ni atene na ala: ‘Ala tene so adisciple ti lo aga na bï, na ndembe so ala ngbâ na lango, na ala nzi kuâ ti lo.’

Na ngoi ni so, ambeni wali so ayeke adisciple ti Jésus aga ti bâ ndo na yâ ti dû ti kuâ ni. Li ti ala akpe kue ti bâ so yâ ti dû ni ayeke senge! Me na ngoi so ala ngbâ ti bâ ndo, a-ange use asigigi, ala yü bongo so avuru mingi. Ala hunda ala, ala tene: ‘Ala yeke gi Jésus ge ngbanga ti nyen? A zingo lo na kuâ awe. Ala gue hio a sara tënë ni na adisciple ti lo.’ So tâ loro si awali so amû! Me na lege, mbeni koli ahunda na ala ti luti. Koli so ayeke zo wa? Mo hinga? A yeke Jésus. Lo tene: ‘Ala gue asara tënë ni na adisciple ti mbi.’

Tongana awali ni atene na adisciple ni so Jésus azingo na kuâ na so ala bâ lo, adisciple ni adë kite. Pierre na Jean akpe loro ti gue kâ na dû ni ti bâ na lê ti ala wani. Tongana ala si kâ, ala bâ so yâ ti dû ni ayeke senge, na ala kiri. Me Marie Madeleine angbâ ti lo na peko. A yeke na ngoi so la si lo bâ a-ange use so.

Mo hinga ye so asi na kuâ ti Jésus? Nzapa asara si a girisa. Nzapa azingo Jésus na kuâ na tere so lo kui na ni so pëpe. Lo mû na Jésus mbeni fini tere so ayeke ti yingo, legeoko tongana ti a-ange. Me ti fa na adisciple ti lo so lo yeke na fini, Jésus alingbi ti mû tere so zo alingbi ti bâ. E yeke bâ ande tënë na ndo ni.

Matthieu 27:62-66; 28:1-15; Luc 24:1-12; Jean 20:1-12.



Ahundango tënë

  • Wali so ayeke na lê ti foto so ayeke zo wa? Akoli use so ayeke azo wa? Ala yeke na ndo wa la?
  • Ngbanga ti nyen Pilate atene na aprêtre ti tokua aturugu ti bata yanga ti dû so a zia kuâ ti Jésus dä?
  • Tongana ndo ahan awe na lango ota ti peko ti kuâ ti Jésus, mbeni ange asara nyen? Me aprêtre ni asara nyen?
  • Ngbanga ti nyen bê ti ambeni wali so aga ti bâ dû so a zia kuâ ti Jésus dä adö?
  • Ngbanga ti nyen Pierre na Jean akpe loro juska na dû so a zia kuâ ti Jésus dä? Ala bâ nyen kâ?
  • Nyen la asi na kuâ ti Jésus? Me lo sara nyen ti fa na adisciple ti lo so lo kiri na fini?

Ambeni hundango tënë

  • Diko Matthieu 27:62-66 na 28:1-15.

    Na peko ti so Jésus azingo na kuâ, tongana nyen aprêtre, aFarizien na a-ancien ti aJuif asara siokpari na tere ti yingo vulu? (Mat. 12:24, 31, 32; 28:11-15).

  • Diko Luc 24:1-12.

    Tongana nyen mbaï ti zingongo ti Jésus na kuâ afa so Jéhovah abâ awali tongana atémoin so a lingbi ti zia bê kue na ala? (Luc 24:4, 9, 10; Mat. 28:1-7).

  • Diko Jean 20:1-12.

    Tongana nyen Jean 20:8, 9 amû maboko na e ti bâ so a yeke kota ye ti kanga bê ti e ti ku tongana e hinga mbilimbili kue pëpe tongana nyen mbeni prophétie ti Bible ayeke ga tâ tënë? (aProv. 4:18; Mat. 17:22, 23; Luc 24:5-8; Jean 16:12).

TI HINGA AMBENI TËNË

Jésus afa tere ti lo na azo mingi na peko ti londongo ti lo na kuâ

Nyen la Jésus asara ti fa na adisciple ti lo so lo kiri na fini awe?

Kuâ ti Jésus nga na zingongo ti lo: Aga na aye ti nzoni wa na mo?

Zia e bâ atënë omene so Bible atene ti fa tongana nyen la na lege ti kuâ ti zo oko azo mingi alingbi ti wara fini.