Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

99: Na yâ ti mbeni da na nduzu

99: Na yâ ti mbeni da na nduzu

E YEKE fadeso na bï ti jeudi, lango use na peko ti so Jésus asara lisoro na abazengele ti lo na hoto ti akeke ti olive. Jésus na abazengele ti lo 12 aga na yâ ti da so ti te kobe ti Pâque. Koli so mo bâ lo lo yeke sigigi so ayeke Judas Iscariote. Lo yeke gue ti fa na aprêtre tongana nyen ala lingbi ti gbu Jésus.

Kobe ti Seigneur

Lango oko kozoni, Judas ague abâ aprêtre, na lo hunda ala, lo tene: ‘Ala yeke mû na mbi nyen tongana mbi mû maboko na ala ti gbu Jésus?’ Ala tene: ‘E yeke mû na mo lê ti nginza ti argent bale-ota.’ Ni la, Judas ayeke gue fadeso ti wara ala si ala lingbi ti ga ti gbu Jésus. So tâ ye ti sioni!

Ala hunzi ti te kobe ti Pâque awe. Me Jésus ayeke sara fadeso mbeni ye nde so ayeke kota mingi. Lo mû mapa lo fâ yâ ni, na lo mû ni na abazengele ti lo, lo tene: ‘Ala te ni, teti so ayeke fä ti tere ti mbi so mbi mû ni ndali ti ala.’ Na pekoni, lo mû na ala kopo ti vin, na lo tene: ‘Ala nyon ni, teti so ayeke fä ti mênë ti mbi so mbi yeke tuku ni ndali ti ala.’ Bible airi ye so ‘Kobe ti Seigneur.’

Azo ti Israël ate Pâque ti dabe ti ala na ye so asi lani na Egypte tongana ange ti Nzapa ahon na ndo ti ada ti ala, me lo fâ akozo molenge ti azo ti Egypte. Me ti fadeso, Jésus aye si adisciple ti lo adabe ti ala na lo, nga tongana nyen lo mû fini ti lo ndali ti ala. A yeke nda ni la si lo tene na ala ti sara ye so ngu oko oko.

Na peko ti so ala hunzi ti te Kobe ti Seigneur awe, Jésus atene na abazengele ti lo ti sara mbeto pëpe na ti zia si mabe ti ala akpengba. Na nda ni, ala he abia na Nzapa. Na pekoni, ala sigigi ala hon. L’heure ahon mingi awe, peut-être a yeke na bê ti bï. Zia e bâ ndo so ala yeke gue dä.

Matthieu 26:14-30; Luc 22:1-39; Jean chapitre 13 ti si na 17; 1 aCorinthien 11:20.



Ahundango tënë

  • Tongana ti so foto ni afa, ngbanga ti nyen Jésus na abazengele ti lo 12 ayeke na yâ ti da so?
  • Zo wa la ayeke sigigi so? Lo yeke gue ti sara nyen?
  • Na peko ti so ala hunzi ti te kobe ti Pâque, kobe wa, so ayeke ti lo nde, Jésus ato nda ti te na abazengele ti lo?
  • Pâque adabe ti azo ti Israël na nyen? Me kobe so abazengele ate na peko ti Pâque ni adabe ti ala na nyen?
  • Na peko ti so ala hunzi ti te Kobe ti Seigneur, Jésus atene nyen na abazengele ti lo? Ala sara nyen?

Ambeni hundango tënë

  • Diko Matthieu 26:14-30.

    Tongana nyen Matthieu 26:15 afa so Judas lo wani na bê ti lo la ague akä Jésus?

    Mênë ti Jésus so ayuru amû lege ti sara aye use wa? (Mat. 26:27, 28; Jér. 31:31-33; aEph. 1:7; aHéb. 9:19, 20).

  • Diko Luc 22:1-39.

    Tongana nyen la Satan alï na yâ ti Judas? (Luc 22:3; Jean 13:2; Kus. 1:24, 25).

  • Diko Jean 13:1-20.

    Tongana a bâ tënë so ayeke na Jean 13:2, a lingbi ti tene so tënë ayeke na li ti Judas teti ye so lo sara? Awakua ti Nzapa alingbi ti manda nyen ge? (Gen. 4:7; 2 aCor. 2:11; aGal. 6:1; Jacq. 1:13, 14).

    Ye so Jésus asara afa kota ye ti manda wa? (Jean 13:15; Mat. 23:11; 1 Pi. 2:21).

  • Diko Jean 17:1-26.

    So Jésus asambela ti tene adisciple ti lo ‘aga oko’, lo ye ti tene nyen? (Jean 17:11, 21-23; aRom. 13:8; 14:19; aCol. 3:14).

TI HINGA AMBENI TËNË

Kobe ti Seigneur

Jésus azia na sese dango bê na kuâ ti lo ti tene adisciple ti lo asara mara ni na lango 14 ti Nisan ti ngu oko oko.