Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

97: Jésus aga tongana gbia

97: Jésus aga tongana gbia

NGOI kete na peko ti so Jésus azi lê ti azo ti iringo ye use so, lo si na mbeni kete kodoro nduru na Jérusalem. Lo tene na ambeni disciple ti lo use, lo tene: ‘Ala lï na yâ ti kodoro ni. Kâ ala yeke wara mbeni molenge ti lele. Ala zi lo a ga na ni na mbi.’

Tongana ala ga na lele ni na Jésus awe, lo duti na ndo ni, na lo gue na Jérusalem. A yo pëpe na kodoro so ala yeke fade dä. Tongana lo si nduru na Jérusalem, gbâ ti azo asigigi ti yamba lo. Mingi ti ala azi bongo ti ala ti ndo ni na ala tanda ni na ndo ti lege. Ambeni afâ amaboko ti akeke ti mburu, si ala zia ni nga na ndo ti lege ni. Ala dekongo, ala tene: ‘Zia Nzapa asara na gbia so aga na iri ti Jéhovah!’

Azo so ayeke yamba Jésus

Ândö giriri na sese ti Israël, afini gbia ayeke lï na Jérusalem na ndo ti mbeni molenge ti lele ti fa tere ti ala na azo. A yeke ye so Jésus ayeke sara la. Azo so ayeke fa na gigi so ala ye ti tene Jésus aga gbia ti ala. Me azo kue la ayeda na lo pëpe. E lingbi ti bâ ni na lege ti ye so ayeke si na Jésus tongana lo gue na temple.

Na yâ ti temple, Jésus azi lê ti azo nga lo sava azo so mbeni mbage ti tere ti ala abuba. Tongana akete molenge abâ ye so, ala dekongo ala sepela Jésus. Me ye so azia ngonzo na bê ti aprêtre, na ala tene na Jésus: ‘Mo mä tënë so amolenge so ayeke tene so?’

Jésus akiri tënë na ala, lo tene: ‘En, mbi mä. Ala de ti diko tënë so na yâ ti Mbeti ti Nzapa pëpe? A tene: “Nzapa ayeke sara si tënë ti sepela ayeke sigigi na yanga ti akete molenge.” ’ Tongaso, amolenge ni angbâ ti sepela gbia so Nzapa asoro lo.

E ye ti sara ye tongana amolenge so. Mo bâ ti mo ye ni nga tongaso? Ambeni zo alingbi ti gi ti kanga lege na e si e sara tënë ti Royaume ti Nzapa pëpe. Me e yeke ngbâ lakue ti fa na azo anzoni ye so Jésus ayeke sara ande ndali ti azo kue.

Lani so Jésus ayeke na ndo ti sese ge, ngoi ni ade asi pëpe ti tene lo komande tongana Gbia. Me ngoi ni ayeke si ande lawa? Adisciple ti Jésus aye ti hinga tënë na ndo ni. E yeke diko ande ye na ndo ni na chapitre ti peko.

Matthieu 21:1-17; Jean 12:12-16.



Ahundango tënë

  • Tongana Jésus asi na mbeni kete kodoro nduru na Jérusalem, lo tene na adisciple ti lo ti sara nyen?
  • Na lê ti foto ni, nyen la asi tongana Jésus aga nduru na gbata ti Jérusalem?
  • Tongana akete molenge abâ so Jésus azi lê ti azo nga lo sava azo so mbeni mbage ti tere ti ala abuba, ala sara nyen?
  • Jésus atene nyen na aprêtre so ngonzo agbu ala?
  • Tongana nyen e lingbi ti sara ye tongana amolenge so agonda Jésus?
  • Adisciple aye ti hinga nyen?

Ambeni hundango tënë

  • Diko Matthieu 21:1-17.

    Tongana nyen lingo ti Jésus tongana Gbia na Jérusalem ayeke nde na sarango ye ti aturugu ti kota kamba ti Rome so ahon awato ti ala na ngangu? (Mat. 21:4, 5; Zach. 9:9; aPhil. 2:5-8; aCol. 2:15).

    Amolenge alingbi ti manda nyen na mbage ti amolenge ti Israël so atene peko ti atënë so ayeke na Psaume 118 na ngoi so Jésus alï na temple? (Mat. 21:9, 15; Ps. 118:25, 26; 2 Tim. 3:15; 2 Pi. 3:18).

  • Diko Jean 12:12-16.

    So azo asepela Jésus na amaboko ti keke ti mburu aduti fä ti nyen? (Jean 12:13; aPhil. 2:10; Apoc. 7:9, 10).

TI HINGA AMBENI TËNË

Gbia ni alï na Jérusalem na ndo ti mbeni kete kororo

Lo sara si mbeni prophétie so a tene ni a sara angu mingi awe aga tâ tënë.