Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

96: Jésus azi kobela na tere ti azo

96: Jésus azi kobela na tere ti azo

TONGANA Jésus ayeke tambela na yâ ti kodoro ni kue, lo zi kobela na tere ti azo. Tënë ni atï na mê ti azo ti akete kodoro ni kue. Tongaso, ala ga na Jésus azo so mbeni mbage ti tere ti ala abuba, azo so lê ti ala abuba, ala so mê ti ala akanga nga azo ti kobela nde nde. Jésus azi kobela na tere ti ala kue.

Ngu ota na ndo ni tongaso ahon awe ngbene ye so Jean abatize Jésus. Jésus atene na abazengele ti lo so lo ga nduru ti gue na Jérusalem. Kâ, a yeke fâ ande lo si na pekoni lo yeke zingo na kuâ. Me kozoni si lo gue, lo ngbâ lakue ti zi kobela na tere ti azo.

Jésus ayeke zi kobela na tere ti mbeni wali

Mbeni lâ, Jésus ayeke fa ye na azo. A yeke lango ti Sabbat. Sabbat ayeke lango so aJuif ayeke wu tere. Wali so mo yeke bâ lo ge so, tere ti lo aso mingi. Teti angu 18, peko ti lo aba gi bango, na lo lingbi ti luti nzoni pëpe. Tongaso, Jésus azia maboko ti lo na ndo ti wali ni, na lo to nda ti luti nzoni. Tere ti lo aga nzoni awe!

Ye so azia ngonzo na bê ti amokonzi-nzapa ni. Mbeni oko ti ala adekongo, a tene: ‘E yeke na alango omene ti sara kusala. A yeke na alango so la si ala lingbi ti ga ti tene a zi kobela na tere ti ala, me na lango ti Sabbat pëpe.’

Me Jésus akiri tënë na ala, lo tene: ‘Ala asioni zo so. Na lango ti Sabbat, ala yeke zi lele ti ala ti gue na lo ti nyon ngu. Ka ti wali so kobela asara lo teti ngu 18 so, a yeke nzoni ti tene a zi kobela so na tere ti lo na lango ti Sabbat pëpe?’ Tënë ti Jésus abi kamene na lê ti asioni koli so

Tongana ala sigigi na kodoro ti Jéricho, ambeni zo ti iringo ye use so lê ti ala abuba amä so Jésus ayeke hon na lege. Tongaso, ala dekongo, ala tene: ‘Jésus, mû maboko na e!’

Jésus airi ala ti ga, na lo hunda na ala, lo tene: ‘Ala ye mbi sara nyen na ala?’ Ala tene: ‘Seigneur, zi lê ti e.’ Jésus andu lê ti ala. Tâ gi na ngoi ni so, lê ti ala azi! Mo hinga nda ni so Jésus asara anzoni ye so kue? A yeke ngbanga ti so lo ndoye azo na lo ye si ala mä na bê na lo. Ye so afa na e biani so ande na gbe ti komandema ti Jésus, zo oko ayeke tï kobela mbeni pëpe.

Matthieu 15:30, 31; Luc 13:10-17; Matthieu 20:29-34.



Ahundango tënë

  • Jésus asara nyen tongana lo yeke tambela na yâ ti akodoro nde nde?
  • Angu ota tongaso na peko ti batême ti lo, Jésus atene nyen na abazengele ti lo?
  • Azo wa la ayeke na lê ti foto so? Jésus asara nyen na wali ni?
  • Ngbanga ti nyen kiringo tënë ti Jésus abi kamene na lê ti awato ti lo?
  • Tongana Jésus na abazengele ti lo asigigi na Jéricho, Jésus asara nyen na azo ti iringo ye use so lê ti ala abuba?
  • Ngbanga ti nyen Jésus asara amiracle?

Ambeni hundango tënë

  • Diko Matthieu 15:30, 31.

    Tongana nyen Jéhovah afa pendere mingi ngangu so lo yeke na ni na lege ti Jésus? Tongana nyen a lingbi ye so asara ngangu na ndo ti gbungo nda ti ye ti e na ndo zendo ti fini sese so Jéhovah amû? (Ps. 37:29; Es. 33:24).

  • Diko Luc 13:10-17.

    Na lege wa ambeni kota miracle so Jésus asara na lâ ti Sabbat afa mara ti dengo bê so lo yeke ga na ni ande na azo na ngoi ti Komandema ti lo ti Ngu Saki Oko? (Luc 13:10-13; Ps. 46:10; Mat. 12:8; aCol. 2:16, 17; Apoc. 21:1-4).

  • Diko Matthieu 20:29-34.

    Tongana nyen mbaï so afa so atâa so Jésus ayeke na akusala mingi ti sara, lo yeke lakue nduru ti mû maboko na azo? E lingbi ti manda nyen na lege ti ye so? (Deut. 15:7; Jacq. 2:15, 16; 1 Jean 3:17).