Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

95: Lege so Jésus afa ye na azo

95: Lege so Jésus afa ye na azo

MBENI lâ Jésus atene na mbeni koli so a lingbi lo ndoye amba ti lo. Koli ni ahunda na Jésus, lo tene: ‘Zo wa si ayeke mba ti mbi ni?’ Jésus ahinga tënë so ayeke na bê ti koli so. Ti lo, gi azo ti mara ti lo nga na ala so lo na ala ayeke voro Nzapa oko si ayeke amba ti lo. Tongaso, zia e bâ ye so Jésus atene na lo.

Ngoi na ngoi, Jésus ayeke fa ye na azo na lege ti atapande. A yeke ye so lo yeke sara fadeso. Lo mû tapande ti mbeni Juif na mbeni zo ti Samarie. E manda awe so mingi ti aJuif aye azo ti Samarie pëpe. Mä fadeso tënë so Jésus atene na koli so.

Mbeni lâ, mbeni Juif alondo na Jérusalem, lo hon na yâ ti ahoto ti gue na kodoro ti Jéricho. Me azo ti nzi agbu lo. Ala nzi nginza ti lo na ala pika lo nduru na kuâ.

Na pekoni, mbeni prêtre so ayeke Juif ahon na lege ni so. Lo bâ koli ni so azo ti nzi apika lo so. Ti mo, lo sara nyen? Lo fâ lege lo hon ti lo. Na pekoni, mbeni kota zo ti Nzapa aga nga. A yeke mbeni zo ti mara ti Lévi. Lo nga kue lo luti pëpe ti mû maboko na koli so. Bâ prêtre ni na zo ti mara ti Lévi ni kâ, ala yeke hon gi hongo.

Me bâ zo so ge na tere ti koli so azo apika lo so. A yeke mbeni zo ti Samarie. Lo yeke mû maboko na Juif so. Lo yeke zia yorö na lê ti kä ti lo. Na pekoni, lo gue na koli ni na mbeni ndo so Juif ni alingbi ti ngbâ dä na ti tene tere ti lo aga nzoni.

Zo ti Samarie so amû maboko na mba ti lo

Tongana Jésus ahunzi tënë ti lo ni awe, lo tene na zo so ahunda fade tënë na lo, lo tene: ‘Ti mo, zo wa na popo ti azo ota so asara tere ti lo mba ti zo so azo ti nzi apika lo so? A yeke prêtre ni? zo ti mara ti Lévi ni? wala zo ti Samarie ni?’

Koli ni akiri tënë, lo tene: ‘A yeke zo ti Samarie ni. Lo sara nzoni na zo so azo ti nzi apika lo so.’

Jésus atene: ‘Mo kiri tënë nzoni. Tongaso, mo gue na mo sara na azo tongana koli so nga.’

Lege so Jésus afa ye na azo anzere na mo? E lingbi ti manda anzoni ye mingi mingi tongana e mä tënë so Jésus atene na yâ ti Bible.

Luc 10:25-37.



Ahundango tënë

  • Tënë wa mbeni koli ahunda na Jésus? Lo hunda tënë so ngbanga ti nyen?
  • Ngoi na ngoi, Jésus ayeke sara kusala na nyen ti fa ye na azo? Nyen la e manda awe na ndo ti aJuif nga na azo ti Samarie?
  • Na yâ ti tapande so Jésus amû, nyen la asi na mbeni Juif tongana lo yeke na lege ti gue na Jéricho?
  • Nyen la mbeni prêtre so ayeke Juif na mbeni zo ti mara ti Lévi asara tongana ala yeke hon na lege ni?
  • Na lê ti foto ni, zo wa la ayeke mû maboko na Juif so azo ti nzi apika lo so?
  • Tongana Jésus ahunzi tënë ti lo awe, lo hunda tënë wa na koli ni? Koli ni akiri tënë, lo tene nyen?

Ambeni hundango tënë

  • Diko Luc 10:25-37.

    Ahon ti kiri tënë gi na hundango tënë ti lo ni, tongana nyen Jésus amû maboko na mbeni zo so ahinga Ndia ti Moïse mingi ti gbu li na ndo ti mbeni tënë? (Luc 10:26; Mat. 16:13-16).

    Tongana nyen Jésus asara lani kusala na atapande ti tene ala so amä lo aduti na sioni bango ndo pëpe na ndo ti amba ti ala? (Luc 10:36, 37; 18:9-14; Tite 1:9).

TI HINGA AMBENI TËNË

JÉSUS: LEGE NI, TÂ TËNË NA FINI

Mbeni zo ti Samarie afa so lo ye mba ti lo

Tongana nyen la Jésus afa mbeni pendere ye ti manda na sarango kua na tapande ti zo ti Samarie so asara nzoni na mbeni zo?

JÉSUS: LEGE NI, TÂ TËNË NA FINI

Molenge so agirisa lani, akiri awe

Nyen la e lingbi ti manda na ndo ti toli ti Jésus na ndo ti molenge so agirisa aye ti lo kue?