Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

94: Lo ye akete molenge

94: Lo ye akete molenge

BÂ JÉSUS ge, lo gbu mbeni kete molenge na maboko ti lo. Biani, Jésus aye tënë ti akete molenge mingi. Azo so ayeke bâ Jésus so ayeke abazengele ti lo. Tënë ti nyen la lo yeke tene na ala? Zia e bâ.

Jésus na abazengele ti lo alondo ti sara mbeni yongoro tambela. Tongana ala ngbâ fade na lege, abazengele ni apapa na popo ti ala. Tongana ala si awe, Jésus ahunda na ala, lo tene: ‘Ala papa fade na lege na ndo ti nyen?’ Jésus ahinga biani ye so ala papa ndali ni. Me lo hunda tënë so ti bâ wala ala yeke fa ni na lo.

Jésus na mbeni kete molenge

Abazengele ni azi yanga pëpe, ngbanga ti so, na lege, ala papa fade ti hinga zo wa si ayeke kota ahon amba ti lo. Ambeni na popo ti ala aye ti duti kota ahon amba ti ala. Jésus ayeke sara tongana nyen ti fa na ala so a yeke na lege ni pëpe ti gi ti duti kota ahon amba ti ala?

Lo iri kete molenge so, na lo zia lo na gbele ala kue. Na pekoni, lo tene na ala: ‘Mbi ye si ala hinga tënë so nzoni: tongana ala ga tongana kete molenge so pëpe, ala lingbi ti lï na yâ ti Royaume ti Nzapa pëpe. Zo so ayeke kota na yâ ti Royaume ayeke zo so aga tongana kete molenge so.’ Mo hinga nda ni so Jésus atene tënë so?

A yeke ngbanga ti so akete molenge ayeke gi ka pëpe ti duti kota ahon amba ti ala. Tongaso, a yeke nzoni abazengele ni agi ti duti tongana amolenge na ti papa pëpe ti hinga zo wa si ayeke kota ahon amba ti lo.

Na ambeni ngoi, Jésus afa nga so lo ye akete molenge mingi. Anze kete na pekoni, azo aga na amolenge ti ala ti bâ Jésus. Ye oko, abazengele atara ti kanga lege na ala. Me Jésus atene na abazengele ti lo, lo tene: ‘Ala zia amolenge aga na mbi, ala kanga lege na ala pëpe, teti Royaume ti Nzapa ayeke ti azo so ayeke tongana amolenge.’ Na pekoni Jésus amû amolenge ni na maboko ti lo, na lo iri tënë nzoni na ndo ti ala. Ti hinga so Jésus aye akete molenge anzere na bê pëpe?

Matthieu 18:1-4; 19:13-15; Marc 9:33-37; 10:13-16.



Ahundango tënë

  • Tongana ala londo na mbeni yongoro tambela ti kiri, abazengele ti Jésus apapa fade na ndo ti nyen na lege?
  • Ngbanga ti nyen Jésus airi mbeni kete molenge na Lo zia lo na gbele abazengele ti Lo?
  • Na yâ ti ye wa a lingbi abazengele ni amanda ti sara ye tongana amolenge?
  • Anze kete na pekoni, tongana nyen Jésus afa so lo ndoye amolenge?

Ambeni hundango tënë

  • Diko Matthieu 18:1-4.

    Ngbanga ti nyen Jésus asara kusala na atapande ti fa ye na azo? (Mat. 13:34, 36; Marc 4:33, 34).

  • Diko Matthieu 19:13-15.

    Asarango ye wa, so akete molenge ayeke na ni, a lingbi e mû tapande ni tongana e ye ti wara anzoni ye so Royaume ti Nzapa ayeke ga na ni? (Ps. 25:9; 138:6; 1 aCor. 14:20).

  • Diko Marc 9:33-37.

    Ye wa Jésus afa na adisciple ti lo na ndo ti nzara ti warango kota ndo? (Marc 9:35; Mat. 20:25, 26; aGal. 6:3; aPhil. 2:5-8).

  • Diko Marc 10:13-16.

    A yeke lani ngangu na azo ti pusu nduru na Jésus? Ye wa a-ancien alingbi ti manda na ndo ti tapande ti lo? (Marc 6:30-34; aPhil. 2:1-4; 1 Tim. 4:12).

TI HINGA AMBENI TËNË

Lo sara tënë na ndo ti divorce nga lo fa ndoye na mbage ti amolenge

Bango ndo ti Jésus ayeke nde mingi na ti adisciple ti lo na ndo ti akete molenge. Ngbanga ti nyen?