Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

93: Jésus amû kobe na azo mingi

93: Jésus amû kobe na azo mingi

MBENI kota ye ti sioni asi. A fâ Jean Baptiste. Hérodiade, wali ti gbia, aye tënë ti Jean oko pëpe. Lo sara si gbia ni amû yanga ti tene a dë go ti Jean.

Tongana Jésus amä tënë ni, vundu asara lo mingi. Lo gue lo oko na mbeni ndo so zo ayeke dä pëpe. Me azo amû peko ti lo. Tongana Jésus abâ gbâ ti azo so, mawa ti ala asara lo, si lo fa tënë ti Royaume ti Nzapa na ala nga lo zi kobela na tere ti ala.

Tongana ndo ayeke gue ti vuko, adisciple ti lo aga atene na lo: ‘L’heure ahon mingi awe, na e yeke yongoro na kodoro. Tene na azo ni ti gue na akete kodoro ti vo kobe ndali ti ala mveni.’

Jésus ayeke mû kobe na azo mingi

Me Jésus akiri tënë na ala, lo tene: ‘A yeke nzoni azo ni ague pëpe. Ala wani amû na ala mbeni ye ti te.’ Jésus aturne na mbage ti Philippe, lo hunda lo, lo tene: ‘E lingbi ti vo kobe na ndo wa ti mû na azo so kue?’

Philippe akiri tënë, lo tene: ‘A yeke hunda ande nginza mingi ti vo kobe so alingbi, si zo oko oko awara mbeni kete mbage ni.’ Me André atene: ‘Molenge-koli so ayeke na mapa oku na susu use. Me a yeke lingbi na azo kue pëpe.’

Jésus atene na ala: ‘Ala tene na azo ni ti duti na ndo ti pere.’ Na pekoni, lo mû singila na Nzapa ndali ti mapa ni na susu ni, na lo to nda ti fâ yâ ni kete kete, si adisciple ti lo akangbi ni na azo kue. Akoli kue ayeke 5 000, na awali na amolenge ayeke saki mingi. Ala kue ate ngbii yâ ti ala asi. Tongana adisciple ti Jésus aro tanga ti kobe ni, a si sakpa 12!

Jésus ahunda fadeso na adisciple ti lo ti mû ngö ti fâ kota ngu ti Galilée. Na bï ni so, kota pupu asara na ayengi ngö ni mbage na mbage. Mbeto agbu adisciple ti lo mingi. Me na bê ti bï, ala bâ mbeni zo ayeke tambela na lê ti ngu, lo yeke ga na mbage ti ala. Mbeto asara ala si ala dekongo, ngbanga ti so ala hinga ye so ala yeke bâ so pëpe.

Jésus atene na ala: ‘Ala sara mbeto pëpe. Mbi la.’ Atâa so kue, ala yeke na kite. Tongaso Pierre atene: ‘Tâ tongana a yeke mo la, Seigneur, mû yanga na mbi ti tambela na lê ti ngu juska na mo kâ.’ Jésus atene na lo: ‘Ga!’ Pierre asigigi na yâ ti ngo ni si lo tambela na lê ti ngu! Me mbeto ato nda ti sara lo na lo komanse ti linda ngu me Jésus agbu lo.

Mbeni lâ, Jésus akiri amû kobe na azo saki mingi. Ti so ni, a yeke na lege ti mapa mbasambala na ambeni kete susu so ayeke mingi pëpe. Kobe ni alingbi na azo kue. So Jésus abâ lege ti azo tongaso so, a pika bê pëpe? Na ngoi so lo yeke komande tongana gbia, e yeke gi ande bê ti e na ndo ti ye oko pëpe!

Matthieu 14:1-32; 15:29-38; Jean 6:1-21.



Ahundango tënë

  • Sioni ye wa asi na Jean Baptiste? Ye so asara nyen na ndo ti Jésus?
  • Jésus asara nyen ti mû kobe na gbâ ti azo so amû peko ti lo so? A ro tanga ti kobe ni a si sakpa oke?
  • Tongana a si na bï, ngbanga ti nyen mbeto asara adisciple? Nyen la asi na Pierre nyen?
  • Jésus asara tongana nyen ti mû kobe ti fani use ni na azo saki mingi?
  • Ngbanga ti nyen aye ayeke duti ande pendere mingi tongana Jésus ayeke komande na ndo ti sese tongana Gbia?

Ambeni hundango tënë

  • Diko Matthieu 14:1-32.

    Mbaï so ayeke na Matthieu 14:23-32 amû lege ti hinga nyen na ndo ti sarango ye ti Pierre?

    Tongana nyen Mbeti ti Nzapa afa so Pierre aga biazo, na lo zia awe lege ti sarango ye ti lo so lo yeke sara ka gi hio hio so? (Mat. 14:27-30; Jean 18:10; 21:7; Kus. 2:14, 37-40; 1 Pi. 5:6, 10).

  • Diko Matthieu 15:29-38.

    Tongana nyen Jésus afa so lo bâ na nene ni aye so Babâ ti lo amû ni na lege ti mitele? (Mat. 15:37; Jean 6:12; aCol. 3:15).

  • Diko Jean 6:1-21.

    Tongana nyen aChrétien alingbi laso ti mû tapande ti Jésus na ndo ti tënë ti mango yanga ti azo ti komande? (Jean 6:15; Mat. 22:21; aRom. 12:2; 13:1-4).