Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

92: Jésus azingo akuâ

92: Jésus azingo akuâ

MOLENGE-WALI so ayeke na ngu 12. Jésus agbu maboko ti lo, nga babâ na mama ti molenge ni aluti na tere ti gbogbo ti lo. Mo hinga ngbanga ti nyen tere ti ala anzere mingi tongaso? Zia e bâ.

Jésus ayeke zingo molenge-wali ti Jaïrus na kuâ

Babâ ti molenge ni ayeke mbeni kota zo. Iri ti lo ayeke Jaïrus. Mbeni lâ, molenge ni atï kobela si a zia lo na gbogbo. Me tere ti lo akaï pëpe. Kobela ti lo ni ayeke ga gi ngangu. Bê ti Jaïrus na ti wali ti lo ayeke gi na nduzu, ngbanga ti so ala bâ so molenge ti ala ni ayeke gue ti kui. Gi oko molenge ti ala la. Tongaso, Jaïrus ague ti gi Jésus teti lo mä tënë ti amiracle so Jésus ayeke sara.

Tongana Jaïrus awara Jésus awe, gbâ ti azo angoro Jésus. Me Jaïrus alï na popo ti azo ni na lo gue lo tï na gere ti Jésus. Lo tene: ‘Tere ti molenge ti mbi aso mingi. Mbi gbu gere ti mo, ga mo sö lo.’ Jésus atene ni yeke ga.

Tongana ala ngbâ na lege, azo ayeke gbugburu tere ti ga nduru na Jésus. Mo ye ti bâ, Jésus aluti. Lo hunda ndo, lo tene: ‘Zo wa la andu mbi, zo wa?’ Lo hinga so mbeni zo andu lo ngbanga ti so mbeni ngangu asigigi na tere ti lo. Me zo ni so ayeke zo wa? A yeke mbeni wali so ayeke na mbeni kota kobela so a sara ngu 12 na tere ti lo. Lo pusu fade nduru na tere ti Jésus ti ndu bongo ti lo, na kobela ni ahon na tere ti lo!

Ye so adë bê ti Jaïrus, ngbanga ti so lo bâ tongana nyen mbeni kobela ti kara Jésus ayeke dä pëpe. Me mo ye ti bâ, mbeni zo aga atene na Jaïrus, a tene: ‘Hunda na Jésus ti gue kâ senge senge pëpe. Molenge ti mo ni akui awe.’ Jésus amä tënë so, si lo tene na Jaïrus: ‘Gi bê ti mo pëpe, lo yeke ga ande nzoni.’

Tongana ala si na da ti Jaïrus, azo ayeke toto kuâ ni ngangu. Me Jésus atene na ala: ‘Ala toto pëpe. Molenge ni akui pëpe. Lo lango gi langongo.’ Me ala he Jésus, ngbanga ti so ala hinga atene molenge ni akui awe.

Na pekoni, Jésus amû babâ na mama ti molenge ni nga na ambeni bazengele ti lo ota, ala lï na yâ ti chambre so a zia molenge ni dä. Lo gbu maboko ti molenge ni, na lo tene: ‘Londo!’ Molenge ni akiri na fini tongana ti so mo bâ ge. Lo londo lo tambela. Nda ni la si tere ti babâ na mama ti lo anzere mingi tongaso!

Molenge-wali so ayeke kozo zo so Jésus azingo na kuâ la pëpe. Kozo zo ni so Bible asara tënë ni ayeke molenge ti mbeni womua ti kodoro ti Naïn. Na pekoni, Jésus azingo nga Lazare, ita ti Marie na Marthe. Na ngoi so Jésus ayeke komande tongana gbia, lo yeke zingo ande gbâ ti azo na kuâ. Tënë so azia ngia na bê ti e pëpe?

Luc 8:40-56; 7:11-17; Jean 11:17-44.



Ahundango tënë

  • Zo wa la ayeke babâ ti molenge-wali so ayeke na lê ti foto so? Lo na wali ti lo agi bê ti ala fade ngbanga ti nyen?
  • Jaïrus asara nyen tongana lo wara Jésus?
  • Tongana Jésus ayeke gue na da ti Jaïrus, nyen la asi na lo na lege? Tënë wa a tene na Jaïrus na lege?
  • Ngbanga ti nyen azo so ayeke na yâ ti da ti Jaïrus ahe Jésus?
  • Na peko ti so Jésus amû abazengele ti lo ota, nga babâ na mama ti molenge-wali ni, na lo lï na ala na yâ ti chambre ti molenge ni, lo sara nyen?
  • Jésus azingo nga azo wa na kuâ? Ye so afa nyen?

Ambeni hundango tënë

  • Diko Luc 8:40-56.

    Tongana nyen Jésus asara ye na nzoni bê na wali so kobela ti mênë asara lo, nga lo fa so lo hinga pasi ti wali ni? Ye wa a-ancien alingbi ti manda dä laso? (Luc 8:43, 44, 47, 48; Lév. 15:25-27; Mat. 9:12, 13; aCol. 3:12-14).

  • Diko Luc 7:11-17.

    Ngbanga ti nyen tënë so Jésus atene na womua ti Naïn alingbi ti dë bê ti azo so ambeni zo ti ala akui awe? (Luc 7:13; 2 aCor. 1:3, 4; aHéb. 4:15).

  • Diko Jean 11:17-44.

    Tongana nyen Jésus afa so a yeke na lege ni ti sara vundu na ndo ti kuâ ti mbeni zo ti e so e ye lo mingi? (Jean 11:33-36, 38; 2 Sam. 18:33; 19:1-4).

TI HINGA AMBENI TËNË

JÉSUS: LEGE NI, TÂ TËNË NA FINI

A zingo mbeni maseka-wali na kuâ

Azo ahe Jésus na ngia ndali ti so lo tene so molenge-wali so akui ayeke lango. Nyen la Jésus ahinga ni so azo ni ahinga ape?

JÉSUS: LEGE NI, TÂ TËNË NA FINI

Jésus azingo molenge ti mbeni wali-mua

Ambeni zo agbu nda ti miracle so Jésus asara.

JÉSUS: LEGE NI, TÂ TËNË NA FINI

A zingo Lazare na kuâ

Ambeni ye use na yâ ti mbaï so afa so awato ti Jésus ayeke nga na raison ape ti ke miracle so lo sara.