Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

90: Jésus na wali ti kodoro ti Samarie

90: Jésus na wali ti kodoro ti Samarie

JÉSUS aluti na tere ti mbeni dungu na sese ti Samarie ti wu tere ti lo. Adisciple ti lo ague na yâ ti mbeni kodoro ti vo kobe. Wali so Jésus ayeke sara tënë na lo so aga ti gboto ngu. Lo tene na wali ni: ‘Mû na mbi ngu mbi nyon.’

Jésus ayeke sara tënë na mbeni wali ti Samarie

Wali ni agi li ti lo na tënë ti Jésus so gbä. Ngbanga ti nyen? Ngbanga ti so Jésus ayeke Juif, na wali so ayeke zo ti Samarie. Mingi ti aJuif aye azo ti Samarie pëpe, ala ye même nga ti sara tënë na ala pëpe. Me Jésus aye ti lo azo ti amara kue. Tongaso lo tene: ‘Tongana mo hinga fade zo so ayeke hunda na mo ngu so, ka mo yeke hunda na lo ti mû na mo ngu so amû fini.’

Wali ni atene: ‘Seigneur, dungu ni alï mingi, mo yeke nga même na mbeni rambaï ti gboto na ni pëpe. Tongaso mo yeke wara ngu so amû fini so na ndo wa?’

Jésus akiri tënë, lo tene: ‘Tongana mo nyon ngu ti dungo so, nzara ti ngu ayeke kiri ti sara mo. Me ngu so mbi yeke mû na zo ayeke sara si zo angbâ na fini lakue lakue.’

Wali ni atene: ‘Mû na mbi ngu so, Seigneur! Tongaso si nzara ti ngu agbu mbi mbeni pëpe, na mbi kiri ge mbeni pëpe.’

Wali ni abâ ti lo atene Jésus ayeke sara tënë ti senge ngu. Me Jésus ayeke sara ti lo tënë ti tâ tënë na ndo ti Nzapa nga na royaume ti lo. Tâ tënë so ayeke tongana ngu so amû fini. A lingbi ti mû fini ti lakue lakue na zo.

Jésus atene fadeso na wali ni, lo tene: ‘Gue, mo iri koli ti mo ala ga.’

Wali ni atene na lo: ‘Mbi yeke na koli pëpe.’

Jésus atene na lo: ‘Mo kiri tënë nzoni. Ândö mo yeke na akoli oku, na koli so mo na lo ayeke duti fadeso ayeke koli ti mo pëpe.’

Bê ti wali ni adö, ngbanga ti so atënë so kue ayeke tâ tënë. Me Jésus ahinga aye so kue tongana nyen? A yeke ngbanga ti so lo yeke Lo so Nzapa atokua lo, na Nzapa la afa na lo aye so kue. Na ngoi ni so, adisciple ti Jésus akiri. Li ti ala akpe kue ti bâ Jésus na sarango tënë na mbeni wali ti kodoro ti Samarie.

Aye so kue afa nyen na e? A fa so Jésus asara nzoni na azo ti amara kue. A lingbi e sara nga tongaso. A lingbi e tene pëpe so ambeni zo ayeke sioni ngbanga ti so mara ti ala ayeke nde. Jésus aye si azo kue ahinga tâ tënë so ague na zo na fini ti lakue lakue. A lingbi e nga kue e mû maboko na azo ti hinga tâ tënë.

Jean 4:5-43; 17:3.



Ahundango tënë

  • Ngbanga ti nyen Jésus aluti na tere ti mbeni dungu na sese ti Samarie? Tënë ti nyen lo yeke tene na mbeni wali kâ?
  • Ngbanga ti nyen bê ti wali ni adö? Jésus atene nyen na lo? Lo tene tongaso ngbanga ti nyen?
  • Tongana Jésus asara tënë ti ngu na lo, wali ni apensé ti lo na ngu wa? Me Jésus ayeke sara ti lo tënë ti ngu wa?
  • Ngbanga ti nyen bê ti wali ni adö na aye kue so Jésus ahinga na ndo ti lo? Jésus ahinga atënë so kue tongana nyen?
  • E lingbi ti manda nyen na ndo ti mbaï ti wali so?

Ambeni hundango tënë

  • Diko Jean 4:5-43.

    Na tapande ti Jésus, a lingbi e duti na bango ndo wa na mbage ti azo so mara ti ala wala ndo so ala londo dä ayeke nde na ti e? (Jean 4:9; 1 aCor. 9:22; 1 Tim. 2:3, 4; Tite 2:11).

    Aye ti nzoni wa ala so aga adisciple ti Jésus ayeke wara na lege ti yingo? (Jean 4:14; Es. 58:11; 2 aCor. 4:16).

    Tongana nyen e lingbi ti fa bê ti kiri singila tongana ti wali ti Samarie so aduti nduru ti kangbi na amba ti lo ye so lo manda? (Jean 4:7, 28; Mat. 6:33; Luc 10:40-42).

TI HINGA AMBENI TËNË

Lo fa tënë na mbeni wali ti Samarie

Jésus atene na lo mbeni tënë so ade lo tene na yanga ti lo tongaso na mbeni zo ape.