Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

89: Jésus azi sioni na yâ ti temple

89: Jésus azi sioni na yâ ti temple

BÂ JÉSUS ge. Ngonzo agbu lo mingi. Mo hinga nda ni? A yeke ngbanga ti so azo so na yâ ti temple ti Nzapa na Jérusalem ayeke kota bê mingi. Ala yeke gi ti wara gbâ ti nginza na tïtî azo so aga ti voro Nzapa na yâ ti temple ni.

Jésus ayeke kinda atable ti azo ti changengo nginza

Mo bâ abagara na ataba nga na andeke so ge? Azo so ayeke kä anyama so tâ gi na yâ ti temple ge. Ngbanga ti nyen? Ngbanga ti so azo ti Israël ayeke na bezoin ti anyama nga na andeke ti mû ni na sandaga na Nzapa.

Ndia ti Nzapa atene so tongana mbeni zo asara sioni, a lingbi lo mû sandaga na Nzapa. Ambeni ngoi nde ayeke nga dä so a hunda na azo ti Israël ti mû sandaga na Nzapa. Me ala yeke wara anyama ni nga na andeke ni na ndo wa ti mû na sandaga na Nzapa?

Ambeni zo ni ayeke na andeke na anyama ti ala wani, na ala lingbi ti mû ni na Nzapa. Me ambeni mingi ayeke na anyama wala andeke ti ala wani pëpe. Ambeni nga alango a yo na Jérusalem si ala lingbi ti mû nga oko ti anyama ti ala ti ga na ni na temple pëpe. Tongaso, azo ni ayeke ga ge ti vo anyama wala andeke so ala yeke na bezoin ni. Me azo ti kango ye so azia ngere ti aye ni ahon ndo ni. Ala yeke nzi azo. Mbeni ye ni nga ayeke so a yeke na lege ni pëpe ti tene ala kä ye tâ gi na yâ ti temple ti Nzapa.

Aye so la azia ngonzo na bê ti Jésus mingi. Lo kinda atable ti azo ni so na lo tuku anginza ti ala na sese kirikiri. Lo mû nga akamba lo leke na zaza si lo tomba na anyama ni kue na gigi. Lo tene na azo ti kango andeke: ‘Ala mû andeke ti ala, ala hon na ni! Ala zia ti sara si da ti Babâ ti mbi aga ndo ti warango nginza ti ala.’

Ambeni disciple ti Jésus ayeke na lo ge na yâ ti temple ni. Li ti ala kue akpe na ye so Jésus asara. Na pekoni, ala dabe ti ala na tënë so Mbeti ti Nzapa atene na ndo Molenge ti Nzapa, a tene: ‘Nzara ti da ti Nzapa agbi na yâ lo tongana wâ!’

Na ndembe so Jésus ade na Jérusalem ndali ti matanga ti Pâque, lo sara amiracle mingi. Na pekoni, lo londo na Judée, lo hon na yâ ti Samarie ti kiri na Galilée. Zia e bâ ye so asi na Samarie.

Jean 2:13-25; 4:3, 4.



Ahundango tënë

  • Ngbanga ti nyen a yeke kä anyama na yâ ti temple?
  • Ngonzo agbu Jésus ndali ti nyen?
  • Tongana ti so mo bâ na lê ti foto ni, Jésus asara nyen? Lo tene nyen na azo ti kango andeke?
  • Tongana adisciple ti Jésus abâ ye so lo yeke sara, ala dabe ti ala na nyen?
  • Tongana Jésus ayeke na lege ti kiri na Galilée, lo hon na yâ ti kodoro wa?

Mbeni hundango tënë

  • Diko Jean 2:13-25.

    Na bango ngonzo so Jésus asara na tere ti azo so ayeke changé nginza na yâ ti temple, nzoni bango ndo wa a lingbi e duti na ni na ndo ti akusala ti dengo buze na yâ ti Da ti Royaume? (Jean 2:15, 16; 1 aCor. 10:24, 31-33).

TI HINGA AMBENI TËNË

Tënë ti tâ vorongo Nzapa agbu bê ti Jésus mingi

Ndia ti Nzapa ahunda lani na azo ti vo anyama na Jérusalem ti mû na sacrifice. Ka ngbanga ti nyen la Jésus asara ngonzo na tere ti azo so ayeke kä ye na yâ ti temple?