Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

88: Jean abatize Jésus

88: Jean abatize Jésus

BÂ VURU ndeke so ayeke ga na ndo ti koli so. Koli so ayeke Jésus. Ngu ti lo asi fadeso nduru na 30. Koli so ayeke na tere ti lo so ayeke Jean. E manda ambeni ye na ndo ti lo awe. Lani so Marie ague abâ ita ti lo Elisabeth, molenge so ayeke na yâ ti Elisabeth adö na ngia. Mo dabe ti mo na ni? Molenge ni so ayeke Jean. Me nyen la Jean na Jésus ayeke sara fadeso?

A batize Jésus

Jean alondo ti yôro Jésus na yâ ti ngu ti Jourdain. A yeke tongaso si a yeke batize zo. A yeke yôro zo ni na yâ ti ngu awe, na pekoni a sigigi na lo. Ndali ti so Jean ayeke sara tongaso na azo, a iri lo Jean Baptiste. Me Jean abatize Jésus ngbanga ti nyen?

Jean abatize Jésus ngbanga ti so Jésus la ahunda na lo ti sara ni. Jean ayeke batize azo so aye ti fa so ala yeke na vundu ndali ti asioni ye so ala sara. Me Jésus asara mbeni ye ti sioni lâ oko awe ti duti na vundu ndali ni? Lâ oko pëpe, ngbanga ti so lo yeke Molenge ti Nzapa, ngengele oko, so alondo na yayu. Tongaso, nda ni so lo hunda na Jean ti batize lo ayeke nde. A yeke nyen? Zia e bâ.

Kozoni si Jésus aga ge na Jean, lo sara kusala ti lekengo aye na keke. Lo leke aye tongana atable, achaise na abanc. Joseph, koli ti Marie, ayeke nga zo ti lekengo aye na keke. Ni la lo fa nga kusala ni na Jésus. Me Jéhovah atokua Molenge ti lo na sese ti ga zo ti lekengo aye na keke pëpe. Lo tokua lo ndali ti mbeni kusala nde, na ngoi asi awe ti tene Jésus asara kusala so. Ni la, ti fa so lo ga ti sara ye so bê ti Babâ ti lo aye, Jésus ahunda na Jean ti batize lo. Nzapa ayeda na batême ti lo ni?

Lo yeda na ni, ngbanga ti so tongana Jésus asigigi na gbe ti ngu awe, mbeni go na yayu atene: ‘So ayeke Molenge ti mbi, bê ti mbi anzere na lo mingi.’ Nga, yayu azi, na vuru ndeke so aga na ndo ti Jésus. Me ndeke so ayeke tâ ndeke pëpe. Lo kpa gi ndeke, me a yeke ti lo yingo vulu ti Nzapa.

Fadeso, Jésus ayeke na aye mingi ti gbu li na ndo ni, tongaso lo gue na mbeni ndo so zo oko ayeke dä pëpe. Lo duti kâ teti alango 40. Na ndo ni kâ, Satan aga ti tara lo. Satan atara fani ota ti handa lo ti sara mbeni ye so ague nde na ndia ti Nzapa. Me Jésus ake na lo.

Na pekoni, Jésus akiri na kodoro na lo tingbi na ambeni koli so aga akozo zo so amû peko ti lo wala adisciple ti lo. Iri ti ambeni ayeke André, Pierre (so a iri nga lo Simon), Philippe na Nathanaël (so a iri nga lo Barthélemy). Jésus na afini disciple ti lo so ague na Galilée. Kâ, ala luti na kodoro ti Cana, so ayeke kodoro ti Nathanaël. Ala gue na mbeni kota matanga ti mariage, na Jésus asara kozo miracle ti lo. Mo hinga miracle so lo sara? Lo sara si ngu aga vin.

Matthieu 3:13-17; 4:1-11; 13:55; Marc 6:3; Jean 1:29-51; 2:1-12.



Ahundango tënë

  • Akoli use so ayeke na lê ti foto so ayeke azo wa?
  • A yeke batize zo tongana nyen?
  • Azo wa si Jean ayeke batize ka ala?
  • Ndali ti nyen si Jésus ahunda na Jean ti batize lo?
  • Tongana nyen Nzapa afa so lo yeda na batême ti Jésus?
  • Nyen la asi tongana Jésus ague na mbeni ndo so zo oko ayeke dä pëpe teti lango 40?
  • Fa iri ti ambeni kozo disciple ti Jésus, nga kozo miracle so Jésus asara.

Ambeni hundango tënë

  • Diko Matthieu 3:13-17.

    Tapande wa Jésus azia so andu batême ti adisciple ti lo? (Ps. 40:8, 9; Mat. 28:19, 20; Luc 3:21, 22).

  • Diko Matthieu 4:1-11.

    Tongana nyen lege so Jésus asara kusala na kode na Mbeti ti Nzapa apusu e ti manda Bible lakue? (Mat. 4:5-7; 2 Pi. 3:17, 18; 1 Jean 4:1).

  • Diko Jean 1:29-51.

    Jean Baptiste ahunda na adisciple ti lo ti mû peko ti zo wa? Tongana nyen e lingbi ti mû tapande ti lo laso? (Jean 1:29, 35, 36; 3:30; Mat. 23:10).

  • Diko Jean 2:1-12.

    Tongana nyen kozo miracle ti Jésus afa so Jéhovah ayeke gbanzi anzoni ye na awakua ti lo pëpe? (Jean 2:9, 10; Ps. 84:12; Jacq. 1:17).