Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

87: Jésus na yâ ti temple

87: Jésus na yâ ti temple

BÂ KETE molenge-koli so ayeke sara tënë na akota zo so. Akoli so ayeke azo so ayeke fa ka ye na azo na yâ ti temple ti Nzapa na Jérusalem. Molenge so ayeke Jésus. Lo kono kete awe, na lo yeke na ngu 12.

Bê ti awafango ye ni adö mingi ti bâ so Jésus ahinga ye mingi na ndo ti Nzapa nga na aye so ayeke na yâ ti Mbeti ti Nzapa. Me Joseph na Marie ayeke ge pëpe. Ngbanga ti nyen? Ala yeke na ndo wa? Zia e bâ.

Jésus so angbâ kete ayeke sara tënë na awafango ye

Ngu oko oko, Joseph na sewa ti lo ayeke gue na Jérusalem ti sara matanga ti Pâque. Lege so alondo na Nazareth ti gue na Jérusalem ayo mingi. Kutukutu na vélo ayeke lani na ngoi ni kâ pëpe. Mingi ti azo ni ayeke gue na gere, na a hunda lango ota ti si na Jérusalem.

Yâ ti sewa ti Joseph akono awe. Jésus ayeke na angambe so a lingbi a bâ lege ti ala. Na ngu ni so, Joseph na Marie na amolenge ti ala alondo na Jérusalem ala yeke na lege ti kiri na Nazareth. Ala bâ ti ala atene Jésus ayeke na popo ti amba ti ala so ayeke kiri oko. Me tongana ala luti na lege na lakui, ala bâ so Jésus ayeke dä pëpe. Ala gi lo na popo ti asongo ti ala nga na akamarade ti ala, me ala wara lo pëpe. Tongaso ala kiri na Jérusalem ti gi lo.

Na nda ni, ala wara lo ge na popo ti awafango ye. Lo yeke mä awafango ye ni na lo yeke hunda tënë na ala. Bê ti azo ni kue adö ti bâ ndara so Jésus ayeke na ni. Me Marie atene: ‘Molenge ti mbi, mo sara na e ye tongaso ngbanga ti nyen? Mbi na babâ ti mo, bê ti e kue ayeke na nduzu tongana e yeke gi mo.’

Jésus akiri tënë na ala, lo tene: ‘Ala yeke gi mbi ngbanga ti nyen? Ala hinga a tene so a lingbi mbi duti na da ti Babâ ti mbi pëpe?’

Biani, Jésus aye ka ti duti na ndo so lo lingbi ti manda ye na ndo ti Nzapa. A yeke nzoni e nga kue e sara tongaso. Tongana Jésus akiri na Nazareth, yenga oko oko lo yeke gue na abungbi ti voro Nzapa. Ndali ti so lo yeke dengi lakue mê ti lo na abungbi ni, lo manda aye mingi na yâ ti Mbeti ti Nzapa. Zia e sara tongana Jésus na e mû peko ti tapande ti lo.

Luc 2:41-52; Matthieu 13:53-56.



Ahundango tënë

  • Na lê ti foto so, Jésus ayeke na ngu oke? Lo yeke na ndo wa?
  • Ngu oko oko, Joseph na sewa ti lo ayeke sara nyen?
  • Tongana ala sara lango oko na lege awe ti kiri na ndo ti ala, ngbanga ti nyen Joseph na Marie akiri na Jérusalem?
  • Joseph na Marie awara Jésus na ndo wa? Ngbanga ti nyen bê ti azo so ayeke mä Jésus adö?
  • Jésus atene nyen na mama ti lo Marie?
  • Tongana nyen e lingbi ti manda ye na ndo ti Nzapa legeoko tongana Jésus?

Ambeni hundango tënë

  • Diko Luc 2:41-52.

    Atâa so Ndia ti Moïse ahunda lani ti tene gi akoli si aga na amatanga so a sara ni ngu oko oko, nzoni tapande wa Joseph na Marie azia na ababâ na amama laso? (Luc 2:41; Deut. 16:16; 31:12; aProv. 22:6).

    Nzoni tapande wa ti mango yanga ti ababâ na amama Jésus azia na amolenge laso? (Luc 2:51; Deut. 5:16; aProv. 23:22; aCol. 3:20).

  • Diko Matthieu 13:53-56.

    Fa iri ti aita ti Jésus osio ti koli so Marie adü ala na peko ti Jésus, so Bible asara tënë ti ala. Use na popo ti ala asara kusala wa na pekoni na yâ ti kongregation ti aChrétien? (Mat. 13:55; Kus. 12:17; 15:6, 13; 21:18; aGal. 1:19; Jacq. 1:1; Jude 1).

TI HINGA AMBENI TËNË

Jésus na afami ti lo ague na Jérusalem

Bê ti Joseph na Marie agi ala tongana ala gi Jésus gbä ala wara lo ape, me li ti Jésus akpe kue ti bâ so ala hinga pëpe ndo so ala peut fade ti wara lo dä hio.