Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

86: Tongoro afa lege na azo

86: Tongoro afa lege na azo
Azo ti gingo nda ti atongoro

MO BÂ zango tongoro so mbeni oko ti akoli so ayeke fa ni so? Akoli ni so alondo na mbage ti tö na ala yeke azo ti gingo nda ti atongoro. Ala tene ti ala so tongoro ni ayeke gue na ala na mbeni kota zo.

Tongana akoli so asi na Jérusalem, ala hunda ndo, ala tene: ‘Molenge so ayeke ga gbia ti aJuif so ayeke na ndo wa?’ (“A-Juif” ayeke mbeni iri nde so a mû na azo ti Israël.) ‘E bâ tongoro ti molenge ni kpâ na mbage ti tö, na e ga ti voro lo.’

Tongana Hérode, gbia ti Jérusalem, amä tënë so, bê ti lo aso mingi. Lo ye si mbeni zo aga gbia na place ti lo pëpe. Tongaso, Hérode airi aprêtre na lo hunda ala, lo tene: ‘A yeke dü gbia so a mû zendo ti lo so na ndo wa?’ Ala kiri tënë, ala tene: ‘Mbeti ti Nzapa atene so a yeke dü lo na Bethléhem.’

Tongaso, Hérode airi azo so alondo na mbage ti tö na lo tene na ala: ‘Ala gue agi ndo so kete molenge so ayeke dä. Tongana ala wara lo, ala sara tënë ni na mbi. Mbi nga kue mbi ye ti gue ti voro lo.’ Me ti tâ tënë ni, Hérode aye ti lo gi ti fâ molenge ni!

Tongana azo ti gingo nda ti atongoro ni azia Jérusalem ti gue, tongoro so asigigi na ague na ala na Bethléhem juska aluti na ndo so molenge ni ayeke dä. Tongana azo ni alï na yâ ti da ni, ala wara Marie na Jésus so ade kete mingi. Ala sigigi na amatabisi na ala mû ni na Jésus. Me na pekoni, Jéhovah atene na azo ni na yâ ti mbeni bango li ti kiri na Hérode pëpe. Tongaso, ala kiri na kodoro ti ala na mbeni lege nde.

Tongana Hérode amä so azo ti mbage ti tö ni akiri na kodoro ti ala awe, ngonzo agbu lo ngangu. Tongaso, lo mû yanga ti tene a fâ amolenge-koli kue ti Bethléhem so ngu ti ala ahon ngu use pëpe. Me Jéhovah atene tënë ni na Joseph kozoni awe na yâ ti bango li. Tongaso Joseph amû sewa ti lo, ala gue na Egypte. Na pekoni, tongana Joseph amä so Hérode akui awe, lo mû Marie na Jésus, ala kiri na Nazareth. A yeke kâ si Jésus akono.

Ti mo, zo wa la asara si fini tongoro so aza ngangu? Girisa pëpe, akoli so ague kozoni na Jérusalem tongana ala bâ tongoro ni. Satan Zabolo aye fade ti fâ Molenge ti Nzapa, na lo hinga so Hérode ayeke gi ti fâ ande lo. Ni la, a lingbi ti duti gi Satan si asara si tongoro so aza ngangu.

Matthieu 2:1-23; Michée 5:1.



Ahundango tënë

  • Azo wa la ayeke na lê ti foto so? Ngbanga ti nyen mbeni oko ayeke fa zango tongoro so?
  • Ngbanga ti nyen bê ti gbia Hérode aso? Lo sara nyen?
  • Zango tongoro so ague na akoli so juska na ndo wa? Me ngbanga ti nyen ala kiri na kodoro ti ala na mbeni lege nde?
  • Hérode amû yanga ti tene a sara nyen? Ngbanga ti nyen lo hunda tongaso?
  • Jéhovah atene na Joseph ti sara nyen?
  • Zo wa la asara si fini tongoro so aza ngangu? Lo sara tongaso ngbanga ti nyen?

Mbeni hundango tënë

  • Diko Matthieu 2:1-23.

    Na ngoi so awandara aga ti bâ Jésus, lo yeke na ngu oke? Lo yeke lani na ndo wa? (Mat. 2:1, 11, 16).

TI HINGA AMBENI TËNË

Azo ti gingo nda ti aye na lege ti atongoro ague ti bâ Jésus

Ngbanga ti nyen la tongoro so ala bâ lani, na ngoi so ala ngbâ na est, ague na ala pëpe droit na Jésus, me a gue na ala na sioni Gbia Hérode?