Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

85: Dungo Jésus

85: Dungo Jésus

MOLENGE so ayeke zo wa? A yeke Jésus. A londo ti dü lo na da so a yeke bata anyama dä. Marie aye ti zia Jésus na yâ ti sanduku so alele na ambeni nyama nde ayeke te ka ye dä. Me ngbanga ti nyen Joseph na Marie ayeke na yâ ti da ti anyama so? So ayeke ndo ti tene a dü molenge dä la?

Oko pëpe. Me ala yeke ge ngbanga ti so gbia ti Rome, César Auguste, asigigi na mbeni ndia so ahunda na azo kue ti kiri na kodoro so a dü ala dä ti zia iri ti ala na mbeti. A dü Joseph ge na Bethléhem. Me tongana lo na Marie asi fade, ndo ti lango ayeke dä pëpe. Nda ni la si ala ga ge na yâ ti da ti anyama so. Tâ gi na lango ni so, Marie adü Jésus! Me, tongana ti so mo yeke bâ na lê ti foto so, sioni asi na molenge ni pëpe.

Joseph, Marie na bébé ti lo, Jésus

Mo bâ azo ti batango ataba so ayeke ga ti bâ Jésus so? Ala yeke bata fade ataba ti ala na benyama, na ala bâ kota lumière aza na ndo ti ala. Mbeni ange la asi na ala! Mbeto asara azo ti batango taba so mingi. Me ange ni atene: ‘Ala sara mbeto pëpe! Mbi yeke na mbeni nzoni tënë ndali ti ala. Laso, na Bethléhem, a dü Christ Seigneur. Lo yeke sö ande azo. Ala yeke wara lo na yâ ti sanduku ti tengo kobe ti anyama, na a kanga lo na bongo.’ Mo ye ti bâ, gbâ ti a-ange aga, na ala to nda ti gonda Nzapa. Gi na lê ni lê ni, azo ti batango ataba ni ague hio ti gi Jésus, na fadeso ala wara lo awe.

Mo hinga nda ni so Jésus ayeke tâ nde mingi? Lo yeke zo wa biani? Na yâ ti mbaï so asara tënë ti sarango sese, e manda lani ye na ndo ti kozo Molenge ti Nzapa. Mo dabe ti mo na ni? Molenge so asara kusala na tere ti Jéhovah na ngoi so lo sara ayayu na sese nga na aye kue so ayeke na yâ ni. Jésus ayeke Molenge so!

Biani, Jéhovah amû lani fini ti Molenge ti lo na yayu lo zia ni na yâ ti Marie. Tâ gi na ngoi ni so, molenge ni ato nda ti kono yeke yeke na yâ ti mama ti lo tongana atanga ti amolenge kue. Me molenge so ayeke ti Nzapa. Na nda ni, a dü Jésus ge na da ti anyama na Bethléhem. Mo hinga fadeso nda ni so a-ange ayeke fade na ngia ti tene na azo so a dü Jésus awe?

Luc 2:1-20.



Ahundango tënë

  • Kete bébé wa la ayeke na lê ti foto so? Marie ayeke zia lo ti lango na ndo ti nyen?
  • Ngbanga ti nyen a dü Jésus na yâ ti da so ayeke bata anyama dä?
  • Na lê ti foto ni, akoli so ayeke lï na yâ ti da ni ayeke azo wa? Tënë wa mbeni ange atene na ala kozo?
  • Ngbanga ti nyen Jésus ayeke nde mingi?
  • Ngbanga ti nyen a lingbi ti iri Jésus Molenge ti Nzapa?

Ambeni hundango tënë

  • Diko Luc 2:1-20.

    César Auguste asara nyen si prophétie so andu dungo Jésus aga tâ tënë? (Luc 2:1-4; Mi. 5:1).

    Tongana nyen mbeni zo alingbi ti duti na popo ti ala so a tene ala ‘mû ngia na [Nzapa]’? (Luc 2:14; Mat. 16:24; Jean 17:3; Kus. 3:19; aHéb. 11:6).

    Asenge zo ti batango ataba ti Judée so aduti lani na ngia ti bâ so a dü mbeni Sauveur. Ka ti awakua ti Nzapa laso, ala yeke na kota ngia ngbanga ti nyen? (Luc 2:10, 11; aEph. 3:8, 9; Apoc. 11: 15; 14:6).