Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

84: Mbeni ange aga ti bâ Marie

84: Mbeni ange aga ti bâ Marie

PENDERE wali so ayeke Marie. Lo yeke mbeni zo ti Israël na lo lango na gbata ti Nazareth. Nzapa ahinga so lo yeke nzoni zo mingi. Ni la si lo tokua ange Gabriel ti sara tënë na lo. Mo hinga tënë so ange Gabriel aga atene na Marie? Zia e bâ.

Gabriel atene na lo: ‘Bara mo, mo so Nzapa asara nzoni bê na mo mingi so. Jéhovah ayeke na mo.’ Ade Marie abâ zo so kozoni lâ oko pëpe. Bê ti lo agi lo, ndali ti so lo hinga li ti lo na tënë ni so pëpe. Me ange Gabriel asara tënë na lo hio ti dë bê ti lo.

Marie

Lo tene: ‘Zia mbeto asara mo pëpe, Marie. Mo zia ngia na bê ti Jéhovah mingi. Ni la si lo ye ti sara mbeni nzoni ye na mo. Na yâ ti ngoi kete, mo yeke dü molenge. Mo yeke iri lo Jésus.’

Gabriel akiri atene: ‘Fade iri ti molenge so ayeke ga kota, na a yeke iri lo Molenge ti Nzapa ti Nduzu Ahon Kue. Jéhovah ayeke zia lo na ndo ti mbata ti gbia, legeoko tongana David. Me Jésus ayeke komande teti lakue lakue, na royaume ti lo ayeke hunzi lâ oko pëpe!’

Me Marie ahunda lo, lo tene: ‘Ye ni ayeke si ande tongana nyen so ade mbi mû koli pëpe so? So ade mbi duti na koli pëpe so, mbi lingbi ti dü molenge tongana nyen?’

Ange Gabriel akiri tënë, lo tene: ‘Ngangu ti Nzapa ayeke ga na ndo ti mo. Nda ni la a yeke iri molenge ni so Molenge ti Nzapa.’ Lo kiri lo tene na Marie: ‘Bâ fami ti mo Elisabeth. Azo atene lani so lo yeke mbakoro mingi si lo lingbi ti dü molenge pëpe. Me fadeso, lo ga nduru ti dü molenge ti koli. Mo bâ, mbeni ye ti kara Nzapa ayeke dä pëpe.’

Na mango tënë so, Marie atene: ‘Mbi yeke wakua ti Jéhovah! Zia ye ni asi na mbi tongana ti so mo tene.’ Tongaso, ange ni azia lo.

Marie ague hio ti bâ Elisabeth. Tongana Elisabeth amä go ti Marie, molenge so ayeke na yâ ti lo adö na ngia. Elisabeth asi na yingo ti Nzapa, si lo tene na Marie: ‘Mo yeke wali so Nzapa airi tënë nzoni mingi na ndo ti lo na popo ti awali kue.’ Marie angbâ na Elisabeth nze ota, na pekoni, lo kiri na kodoro ti lo na Nazareth.

Marie aga nduru ti sara mariage na koli so iri ti lo ayeke Joseph. Me tongana Joseph amä so Marie ayeke na ngo, lo bâ so a lingbi lo mû lo pëpe. Ye oko, ange ti Nzapa atene na lo: ‘Sara mbeto ti mû Marie ti ga wali ti mo pëpe. Nzapa la amû na lo molenge so.’ Tongaso Joseph amû Marie na da ti lo, na ala ku dungo ti Jésus.

Luc 1:26-56; Matthieu 1:18-25.



Ahundango tënë

  • Wali so na lê ti foto so ayeke zo wa?
  • Gabriel atene nyen na Marie?
  • Tongana nyen Gabriel afa na Marie so lo yeke dü ande molenge atâa so lo de ti duti na koli pëpe?
  • Tongana Marie ague abâ Elisabeth, nyen la asi nyen?
  • Joseph aye ti sara nyen tongana lo mä so Marie ayeke na ngo? Ngbanga ti nyen lo sara tongaso pëpe?

Ambeni hundango tënë

  • Diko Luc 1:26-56.

    Na ngoi so a yeke mû fini ti Molenge ti Nzapa na yayu kâ ti zia ni na yâ ti Marie, Luc 1:35 afa nyen na ndo ti siokpari kue so ayeke na yâ ti para ti Marie so Jésus ague ti duti dä? (Ag. 2:11-13; Jean 6:69; aHéb. 7:26; 10:5).

    Tongana nyen a ne Jésus kozoni même si a dü lo? (Luc 1:41-43).

    Nzoni tapande wa Marie azia na aChrétien laso so awara ambeni pendere kusala na yâ ti bungbi ti Jéhovah? (Luc 1:38, 46-49; 17:10; aProv. 11:2).

  • Diko Matthieu 1:18-25.

    Atâa so a zia iri “Emmanuel” na li ti Jésus pëpe, tongana nyen kusala so lo sara na sese ge ague oko na nda ti iri so? (Mat. 1:22, 23; Jean 14:8-10; aHéb. 1:1-3).

TI HINGA AMBENI TËNË

Atokua use so alondo na Nzapa

Ange Gabriel afa lani ambeni tokua so ayeke ngangu na zo ti yeda na ni

Marie—‘Mbi yeke ngbâa ti Jéhovah!’

Kiringo tënë ti Marie na ange Gabriel afa nyen na ndo ti mabe ti lo? Ambeni nzoni sarango ye wa la lo fa ni nga?