Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

101: A fâ Jésus

101: A fâ Jésus

BÂ TÂ ye ti sioni so ayeke si so! A ye ti fâ Jésus. A zia lo na ndo ti keke, na a pika maboko ti lo nga na gere ti lo na pointe. Ngbanga ti nyen azo asara ye tongaso na Jésus?

Jésus ayeke kui

A yeke ngbanga ti so ambeni zo aye tënë ti Jésus oko pëpe. A yeke azo wa? Mbeni oko ti ala ayeke sioni ange Satan Zabolo. Lo yeke zo so ahanda lani Adam na Eve ti ke yanga ti Jéhovah. A yeke lo si apusu awato ti Jésus ti sara kota ye ti sioni so.

Même kozoni si a pika Jésus na ndo ti keke, awato ti lo asara sioni na lo. Mo dabe ti mo tongana nyen ala ga lani na yaka ti Gethsémané ti gbu lo? Awato ti lo ni ayeke azo wa? Biani, a yeke amokonzi-nzapa. Zia e bâ ye so asi na pekoni.

Na ngoi so amokonzi-nzapa ni agbu Jésus, mbeto asara abazengele ti lo si ala kue akpe. Ala zia Jésus lo oko na tïtî awato ti lo. Me bazengele Pierre na Jean akpe a yo pëpe. Ala mû peko ti azo ni ti bâ ye so ala yeke sara na Jésus.

Aprêtre amû Jésus ala gue na lo na da ti Anne, mbeni ngbene kota prêtre so aga mbakoro awe. Me ala ngbâ kâ a ninga pëpe. Ala kiri amû lo ague na lo na da ti Caïphe, so ayeke kota prêtre fadeso. Andâ amokonzi-nzapa mingi ayeke bungbi na da ti lo kâ.

Kâ na da ti Caïphe, ala to nda ti fâ ngbanga ti Jésus. A ga na ambeni zo ti tene atënë ti mvene na ndo ti lo. Amokonzi-nzapa ni kue atene: ‘Jésus alingbi na kuâ.’ Ala tuku ngu ti yanga na lê ti lo, na ala gu lo na maboko ti ala.

Na ndembe so ala ngbâ ti sara aye so kue na Jésus, Pierre ayeke ti lo na gigi na yâ ti gbagba ni. Ndo avuko awe, na dê asara mingi. Azo atingo wâ na ala duti na tere ni. Mo ye ti bâ, mbeni wali so asara kua na ndo ni so abâ Pierre ngbii si lo tene: ‘Koli so kue ayeke lani na tere ti Jésus.’

Pierre akiri tënë, lo tene: ‘Mvene! Mbi yeke lani na tere ti lo pëpe.’

Lege ota, azo ni atene na Pierre so lo yeke lani na tere ti Jésus. Me Pierre abere ti lo gi berengo. Tongana lo kiri lo bere ti fani ota ni, Jésus aturne abâ lê ti lo. Vundu asara Pierre mingi ndali ti so lo tene mvene, na lo gue lo toto ngangu.

A yeke vendredi, ndo akomanse ti han awe. Aprêtre ni amû Jésus ala gue na lo na Sanhédrin, kota ndo so ala yeke bungbi ka dä. Kâ, ala gbu li ti ala na ndo ti ye so ala ye ti sara na lo. Na pekoni, ala gue na lo na Ponce Pilate, zo so ayeke komande sese ti Judée kue.

Ala tene na Pilate: ‘Koli so ayeke sioni mingi. Lo lingbi na kuâ.’ Na peko ti so Pilate ahunda atënë na Jésus, lo tene na ala: ‘Mbi bâ ye ti sioni oko na mbage ti lo pëpe.’ Tongaso, Pilate atokua Jésus na Hérode Antipas, zo so ayeke komande sese ti Galilée kue, me na ngoi ni so, lo ga na Jérusalem. Hérode nga kue abâ ye ti sioni oko na mbage ti Jésus pëpe, na lo kiri na lo na Pilate.

Pilate aye ti zi Jésus. Me awato ti Jésus aye si lo zi mbeni zo nde na place ti lo. Zo ni ayeke Barabbas, mbeni zo ti nzi. Tongana Pilate asigigi na Jésus, midi aga nduru awe. Lo tene na azo ni, lo tene: ‘Ala bâ! Gbia ti ala!’ Me amokonzi ti aprêtre adekongo, ala tene: ‘Hon na lo kâ! Fâ lo! Fâ lo!’ Tongaso, Pilate azi Barabbas, na ala gue na Jésus ti fâ lo.

Na oko lango ti vendredi ni so na peko ti midi, ala pika Jésus na ndo ti keke. Ala pika nga ambeni zo ti sioni use na ndo ti keke na tere ti lo mbage na mbage. Ala yeke na lê ti foto so pëpe. Ngoi kete kozoni si Jésus akui, mbeni oko ti ala atene na lo: ‘Girisa mbi pëpe tongana mo si na yâ ti Royaume ti mo.’ Jésus atene na lo: ‘Mbi tene na mo, mo yeke duti ande na mbi na yâ ti Paradis.’

So tâ pendere zendo la pëpe? Jésus asara tënë ti paradis wa? Nzapa asara lani kozo paradis na ndo wa? Tâ tënë, a yeke lani na ndo ti sese. Tongana Jésus aga Gbia na yayu, lo yeke zingo ande koli so ti duti na yâ ti fini Paradis na ndo ti sese. Tënë ni so anzere na e pëpe?

Matthieu 26:57-75; 27:1-50; Luc 22:54-71; 23:1-49; Jean 18:12-40; 19:1-30.



Ahundango tënë

  • Zo wa la ayeke mbilimbili na gunda ti kuâ ti Jésus?
  • Abazengele asara nyen tongana amokonzi-nzapa agbu Jésus ti hon na lo?
  • Nyen la asi kâ na da ti kota prêtre Caïphe?
  • Ngbanga ti nyen Pierre asigigi na lo toto mingi?
  • Na peko ti so a gue na Jésus na Pilate, aprêtre adekongo, ala tene nyen?
  • Azo asara nyen na Jésus na lango ti vendredi na peko ti midi? Jésus atene nyen na mbeni sioni zo so akanga lo na tere ti lo?
  • Paradis so Jésus asara tënë ni ayeke duti ande na ndo wa?

Ambeni hundango tënë

  • Diko Matthieu 26:57-75.

    Tongana nyen azo ti kota da-ngbanga ti aJuif afa so bê ti ala ayeke sioni? (Mat. 26:59, 67, 68).

  • Diko Matthieu 27:1-50.

    Ngbanga ti nyen e lingbi ti tene so vundu so Judas asara alondo tâ biani na bê ti lo pëpe? (Mat. 27:3, 4; Marc 3:29; 14:21; 2 aCor. 7:10, 11).

  • Diko Luc 22:54-71.

    So Pierre abere lo tene lo hinga Jésus pëpe na bï so a kä Jésus na a gbu lo, e lingbi ti manda nyen dä? (Luc 22:60-62; Mat. 26:31-35; 1 aCor. 10:12).

  • Diko Luc 23:1-49.

    Jésus asara ye tongana nyen na gbele sioni so a sara na lo? E lingbi ti manda nyen dä? (Luc 23:33, 34; aRom. 12:17-19; 1 Pi. 2:23).

  • Diko Jean 18:12-40.

    Atâa so mbeto ti azo ahon ndo ti Pierre lani kete, lo kiri lo ga mbeni kpengba bazengele. Ye so afa nyen na e? (Jean 18:25-27; 1 aCor. 4:2; 1 Pi. 3:14, 15; 5:8, 9).

  • Diko Jean 19:1-30.

    Nzoni bango ndo wa Jésus ayeke lani na ni na mbage ti aye ti mitele? (Jean 2:1, 2, 9, 10; 19:23, 24; Mat. 6:31, 32; 8:20).

    Atënë so Jésus atene kozoni si lo kui afa so lo sö benda na so lo mû mbage ti yanga-ti-komande ti Jéhovah tongana nyen? (Jean 16:33; 19:30; 2 Pi. 3:14; 1 Jean 5:4).

TI HINGA AMBENI TËNË

A gue na Jésus na Anne, na pekoni na Caïphe

Ngbanga so afâ na ndo ti Jésus ayeke na lege ni oko ape.

A gue na Jésus na gbele Sanhédrin, na pekoni na gbele Pilate

Amokonzi-nzapa ni afa na gigi tâ bibe ti ala.

Mbeni Gbia so tënë ayeke na li ti lo ape abâ pasi na ndo ti keke

Jésus amû mbeni zendo na mbeni zo ti nzi so a kanga lo na ndo ti keke na tere ti lo.