Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

83: Gbagba ti Jérusalem

83: Gbagba ti Jérusalem
Awakua ni akiri aleke gbagba ti Jérusalem

BÂ AKUA kue so azo ayeke sara ge. Azo ti Israël ayeke leke gbagba ti Jérusalem. Tongana gbia Nébucadnezzar afuti lani Jérusalem a sara ngu 152 awe, lo kungbi gbagba ni na sese na lo gbi ayanga ti gbagba ni kue. Na ngoi so azo ti Israël alondo kpâ na Babylone akiri, ala leke gbagba ni pëpe.

Ti mo, so gbagba angoro lani gbata ni pëpe, azo ni aduti lani kâ tongana nyen na yâ ti angu so kue? Ala duti na mbeto, ngbanga ti so a lingbi ti duti ngangu pëpe na awato ti ala ti ga ti tiri na ala. Me fadeso, koli so na lê ti foto so aga ti mû maboko na ala ti kiri ti leke gbagba ni. Iri ti lo ayeke Néhémie. Lo yeke zo wa?

Néhémie ayeke mbeni zo ti Israël. Lo londo na kodoro ti Suse, ndo so Mardochée na Esther ayeke dä. Néhémie asara kua na yâ ti da ti gbia, na peut-être lo hinga Mardochée na gbia-wali Esther nzoni. Me Bible atene pëpe so lo yeke sara kua na gbia Assuérus, koli ti Esther. Lo sara kua na gbia Artaxerxès, so aga na peko ti gbia Assuérus.

Girisa pëpe, Artaxerxès ayeke nzoni gbia so amû lani nginza mingi na Esdras ti kiri na Jérusalem na ti leke temple ti Jéhovah pendere. Esdras aleke lani gbagba ti Jérusalem pëpe. Zia e bâ tongana nyen Néhémie awara lege ti sara kusala so.

Ngu 13 ahon awe ngbene ye so Artaxerxès amû nginza na Esdras ti leke na temple ni. Néhémie ayeke fadeso zo so ayeke bâ lege ti vin ti gbia Artaxerxès. Kusala ti lo ahunda ti tene lo tuku vin na gbia ni, na lo bâ si zo atuku yorö na yâ ti vin ni pëpe. So tâ kota kusala!

Mbeni lâ, Hanani, ita ti Néhémie, na ambeni zo alondo na sese ti Israël ala ga ti bâ Néhémie. Ala fa na lo kpale so azo ti Israël ayeke na yâ ni, nga tongana nyen gbagba ti Jérusalem angbâ na bubango ni. Tënë so azia vundu na bê ti Néhémie mingi, si lo sambela Jéhovah ndali ni.

Mbeni lâ, gbia Artaxerxès abâ so Néhémie ayeke na vundu, na lo hunda lo, lo tene: ‘Ngbanga ti nyen mo yeke na vundu tongaso?’ Néhémie atene na lo so a yeke ngbanga ti so aye mingi na Jérusalem nga gbagba ni angbâ na bubango ni. Gbia ahunda na lo, lo tene: ‘Mo ye nyen?’

Néhémie ayeke fa lege na kusala ni

Néhémie atene: ‘Zia mbi gue na Jérusalem ti leke gbagba ni.’ Gbia Artaxerxès ayeke nzoni gbia mingi. Lo tene na Néhémie so lo lingbi ti gue, na lo mû maboko na lo ti wara akeke ti leke na ambeni ye ni. Tongana Néhémie asi na Jérusalem awe, lo fa na azo aye so lo ye ti sara. Tënë ni anzere na ala, si ala tene: ‘Zia e komanse ti sara kusala ni.’

Tongana awato ti azo ti Israël abâ so kua ti lekengo temple ni ayeke gue na li ni, ala tene: ‘E gue e fâ ala, tongaso si ala zia lege ti lekengo gbagba ni.’ Me Néhémie amä tënë ni, na lo mû a-épée na alikongo na azo so ayeke sara kua ni. Lo tene na ala: ‘Ala sara mbeto ti awato ti ala pëpe. Ala tiri ndali ti aita ti ala, amolenge ti ala, awali ti ala nga ndali ti ada ti ala.’

Mbeto asara azo ni oko pëpe. Ala bata lakue a-épée na alikongo na tere ti ala, na ala ngbâ lakue ti leke gbagba ni. Tongaso, gi na yâ ti alango 52, ala hunzi ti leke gbagba ni. Fadeso azo alingbi ti duti nzoni na yâ ti kodoro ti ala. Néhémie na Esdras afa andia ti Nzapa na ala, na azo ni ayeke na ngia mingi.

Me aye ni ayeke tongana ti ândö mbeni pëpe kozoni si a gue na ala na ngbâa na Babylone. Gbia ti Perse ayeke komande ala fadeso na a lingbi ala sara na lo. Me Jéhovah amû yanga so ni yeke tokua ande na ala mbeni fini gbia, na gbia ni so ayeke ga na siriri na ala. Zo wa si ayeke gbia so, zo wa? Lo yeke ga ande na siriri na ndo ti sese tongana nyen? Angu 450 tongaso ahon awe si zo amä tënë na ndo ni. Na nda ni, a dü mbeni molenge, na dungo molenge ni so ayeke kota ye mingi ahon atanga ni kue. E yeke manda ande ye mingi na ndo ni.

Néhémie chapitre 1 ti si na 6.



Ahundango tënë

  • So gbagba angoro Jérusalem pëpe, azo ti Israël abâ tere ti ala lani tongana nyen?
  • Néhémie ayeke zo wa?
  • Néhémie ayeke sara kua ti nyen? Ngbanga ti nyen a yeke mbeni kota kua?
  • Tënë wa azia vundu na bê ti Néhémie? Lo sara nyen?
  • Tongana nyen gbia Artaxerxès asara nzoni na Néhémie?
  • Néhémie aleke yâ ti kusala ti lekengo gbagba ni tongana nyen ti tene awato ti Israël akanga lege na ni pëpe?

Ambeni hundango tënë

  • Diko Néhémie 1:4-6 na 2:1-20.

    Tongana nyen Néhémie agi ti tene Jéhovah afa lege na lo? (Néh. 2:4, 5; aRom. 12:12; 1 Pi. 4:7).

  • Diko Néhémie 3:3-5.

    A-ancien na aserviteur ti mungo maboko alingbi ti manda nyen na lege ti kangbi so ayeke na popo ti azo ti kodoro ti Tekoa na “akota zo ti ala”? (Néh. 3:5, 27; 2 aThes. 3:7-10; 1 Pi. 5:5).

  • Diko Néhémie 4:1-23.

    Nyen la apusu lani azo ti Israël ti ngbâ ti leke gbagba ni atâa so a gi ti kanga lege ngangu na ala? (Néh. 4:6, 8, 9; Ps. 50:15; Es. 65:13, 14).

    Tapande ti azo ti Israël akpengba e laso tongana nyen?

  • Diko Néhémie 6:15.

    Tongana nyen hunzingo gbagba ti Jérusalem gi na yâ ti nze use afa na gigi ngangu so mabe ayeke na ni? (Ps. 56:4, 5; Mat. 17:20; 19:26).