Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

82: Mardochée na Esther

82: Mardochée na Esther

ZIA e kiri na peko angu kete kozoni si Esdras ague na Jérusalem. Na ngoi ni kâ, Mardochée na Esther ayeke akota zo ahon tanga ti azo ti Israël kue na yâ ti royaume ti Perse. Esther ayeke wali ti gbia ni, lo yeke molenge ti ita ti babâ ti Mardochée. Na peko ti gbia ni, Mardochée ayeke zo so komandema ti lo ahon ti tanga ti azo kue. Ye ni asi tongaso tongana nyen? Zia e bâ.

Babâ na mama ti Esther akui tongana lo de lani kete mingi, na Mardochée abata lo. Assuérus, gbia ti Perse, ayeke na mbeni kota da na kodoro ti Suse, na Mardochée ayeke oko ti awakua ti lo. Mbeni lâ, Vasthi, wali ti gbia ni, amä yanga ti koli ti lo pëpe, tongaso gbia ni amû mbeni fini wali ti ga wali ti lo. Wali so lo mû so ayeke zo wa? A yeke Esther, maseka-wali so ayeke pendere mingi.

Bê ti Haman ason mingi na tere ti Mardochée

Mo bâ koli ti baba so azo ayeke ba li ti ala na gbele lo so? A yeke Haman, mbeni kota zo ti Perse. Haman aye si Mardochée, zo so ayeke duti so, aba li ti lo nga na gbele lo. Me Mardochée ake. Ti lo, a yeke na lege ni pëpe ti ba li ti lo na gbele mara ti sioni zo tongaso. Ye so azia ngonzo na bê ti Haman mingi. Bâ ye so lo sara.

Haman atene mvene na gbia ni na ndo ti azo ti Israël. Lo tene: ‘Ala yeke asioni zo, ala yeke sara ye alingbi na andia ti mo pëpe. A lingbi a fâ ala.’ Assuérus ahinga pëpe so wali ti lo Esther ayeke mbeni zo ti Israël. Tongaso, lo mä tënë ti Haman, na lo sigigi na mbeni ndia so ahunda ti tene na mbeni lango a fâ azo ti Israël kue.

Tongana Mardochée amä tënë ti ndia so, bê ti lo agi lo mingi. Lo tokua mbeti na Esther, lo tene: ‘Tene tënë na gbia, na toto na lo ti sö e.’ Na lege ti ndia ti Perse, zo alingbi ti gue ti bâ gbia pëpe gi tongana gbia ni la atisa lo si, tongaso pëpe, a yeke fâ zo ni. Me Esther ague abâ gbia ni atâa so a tisa lo pëpe. Gbia ni ayôro keke ti lo ti lor na lo, so aye ti fa so a yeke fâ Esther pëpe. Esther ahunda na gbia ni nga na Haman ti ga na mbeni kota matanga so lo yeke sara ni. Na ndo ti matanga ni, gbia ni ahunda na Esther ye so lo ye ti tene ni sara na lo. Esther atene so ni yeke fa ni ande gi tongana lo na Haman akiri aga kekereke na mbeni matanga ni.

Na ngoi ti matanga so, Esther atene na gbia ni, lo tene: ‘A yeke fâ mbi na azo ti mbi.’ Ngonzo asara gbia ni. Lo hunda, lo tene: ‘Zo wa la atara ti sara mara ti ye tongaso, zo wa?’

Esther atene: ‘Zo ni so ayeke Haman, sioni zo na wato so.’

Gbia-wali Esther azia tënë na li ti Haman

Ti so ni, ngonzo agbu tâ gbia ni ngangu. Lo mû yanga ti tene a fâ Haman. Na pekoni, lo sara si Mardochée aga zo so komandema ti lo ahon ti tanga ti azo kue na peko ti lo gbia ni. Tongaso, Mardochée abâ si a sigigi na mbeni ndia so amû lege na azo ti Israël ti tiri ndali ti fini ti ala na lango so azo ayeke ga ti fâ ala. Teti so Mardochée ayeke fadeso kota zo mingi, azo mingi amû maboko na azo ti Israël, si ala sö fini ti ala na tïtî awato ti ala.

Mbeti ti Esther.



Ahundango tënë

  • Mardochée na Esther ayeke azo wa?
  • Ngbanga ti nyen gbia Assuérus aye ti mû mbeni wali nde? Lo mû zo wa?
  • Haman ayeke zo wa? Nyen la azia ngonzo mingi na bê ti lo?
  • A lu ndia wa? Esther asara nyen na peko ti so lo wara mbeni mbeti so alondo na Mardochée?
  • Nyen la asi na Haman? Nyen la asi na Mardochée?
  • A sara nyen ti sö azo ti Israël na tïtî awato ti ala?

Ambeni hundango tënë

  • Diko Esther 2:12-18.

    Tongana nyen Esther afa so a yeke kota ye ti duti na “yingo ti tâ be-ti-molenge na ti siriri”? (Esther 2:15; 1 Pi. 3:1-5).

  • Diko Esther 4:1-17.

    Legeoko tongana ti so lege azi na Esther ti sara ye ndali ti tâ vorongo, lege wa azi nga na e laso ti fa so e mû tere ti e na Jéhovah na e yeke be-ta-zo na lo? (Esther 4:13, 14; Mat. 5:14-16; 24:14).

  • Diko Esther 7:1-6.

    Tongana ti so Esther asara giriri, tongana nyen a yeke gi ti sara ngangu na awakua ti Nzapa mingi laso? (Esther 7:4; Mat. 10:16-22; 1 Pi. 2:12).