Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

80: Ala sigigi na Babylone

80: Ala sigigi na Babylone

NGU use tongaso ahon awe na peko ti so aMède na aPerse amû kodoro ti Babylone. Bâ ye so asi fadeso! Azo ti Israël ayeke sigigi na Babylone. A zi ala tongana nyen? Zo wa si azi ala?

Cyrus, gbia ti Perse, la azi ala. Ândö giriri, kozoni si a dü Cyrus, Jéhovah atene na prophète ti lo Esaïe ti zia na mbeti atënë so na ndo ti lo: ‘Mo yeke sara tâ gi ye so bê ti mbi aye. Ayanga ti gbagba ni ayeke ngbâ na zingo ni, si mo lingbi ti mû kodoro ni na ngangu.’ A yeke tâ gi ye so asi la. Cyrus amû li ni na yâ ti bira ti mû kodoro ti Babylone. A-Mède na aPerse alï na yâ ti kodoro ni na bï na ngoi so ayanga ti gbagba ni angbâ na zingo ni.

Me Esaïe, prophète ti Jéhovah, atene nga so Cyrus ayeke mû yanga ti tene a kiri a leke Jérusalem nga na temple ti Jéhovah so ayeke kâ. Cyrus amû yanga so biani? En, lo mû ni. Lo tene na azo ti Israël, lo tene: ‘Ala gue na Jérusalem, na ala leke temple ti Jéhovah, Nzapa ti ala.’ A yeke ye so azo ti Israël ayeke gue ti sara la.

Azo ti Israël ayeke sigigi na Babylone

Me a yeke azo ti Israël kue pëpe si alingbi ti sara yongoro tambela so ti kiri na Jérusalem. Lege ni ayo mingi, a yo akilomètre 800, na ambeni mingi aga mbakoro awe na kobela asara ala mingi. Ambeni ague pëpe ngbanga ti ambeni nda ti tënë nde. Me Cyrus atene na ala: ‘Ala mû argent na lor na ambeni matabisi na ala so ayeke gue ti leke Jérusalem nga na temple ni.’

Tongaso, a mû amatabisi mingi na azo ti Israël so ayeke kiri na Jérusalem. Nga, Cyrus amû na ala asembe na akopo so gbia Nébucadnezzar amû lani na yâ ti temple ti Jéhovah na ngoi so lo futi Jérusalem. Tongaso, azo ni ayeke na gbâ ti aye ti kiri na ni.

Na peko ti so ala tambela nze osio tongaso, azo ti Israël asi na Jérusalem na tâ ngoi ni. A sara biani ngu 70 awe ngbene ye so a futi kodoro ni nga so zo oko aduti na yâ ni pëpe. Me atâa so ala kiri na kodoro ti ala, ala yeke wara ande akpale. A yeke ye so e yeke bâ ande.

Esaïe 44:28; 45:1-4; Esdras 1:1-11.



Ahundango tënë

  • Na lê ti foto so, azo ti Israël ayeke sara nyen?
  • Tongana nyen Cyrus asara lani si prophétie so Jéhovah atene na lege ti Esaïe aga tâ tënë?
  • Cyrus atene nyen na azo ti Israël so alingbi pëpe ti kiri na Jérusalem?
  • Cyrus amû nyen na azo ni ti tene ala gue na ni na Jérusalem?
  • Azo ti Israël asara nze oke na lege ti kiri na Jérusalem?
  • A sara ngu oke si azo aduti na yâ ti kodoro ni pëpe?

Ambeni hundango tënë

  • Diko Esaïe 44:28 na 45:1-4.

    Tongana nyen Jéhovah afa so tënë so lo tene na ndo ti Cyrus ayeke ga biani tâ tënë? (Es. 55:10, 11; aRom. 4:17).

    Prophétie ti Esaïe so andu Cyrus afa nyen na ndo ti ngangu ti Jéhovah Nzapa ti fa aye kozoni si a si? (Es. 42:9; 45:21; 46:10, 11; 2 Pi. 1:20).

  • Diko Esdras 1:1-11.

    Na mungo tapande ti ala so awara lege pëpe ti kiri na Jérusalem, tongana nyen e lingbi nga laso ti ‘sara na’ ala so amû kusala ti ngoi kue? (Esdras 1:4, 6; aRom. 12:13; aCol. 4:12).