Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

75: Daniel na amba ti lo maseka ota

75: Daniel na amba ti lo maseka ota

GBIA Nébucadnezzar amû azo kue ti Israël so ahinga mbeti mingi, lo gue na ala na Babylone. Na pekoni, lo soro na popo ti ala amaseka-koli so ayeke pendere mingi nga so ahinga ndo ahon atanga ni kue. Amaseka-koli osio so mo bâ ge so ayeke a-oko ti ala. Iri ti mbeni ayeke Daniel, na atanga ni ota so, azo ti Babylone airi ala Sadrac, Mésac na Abed-Nego.

Nébucadnezzar aleke ti tene a fa ye na amaseka-koli ni si ala sara kusala na yangbo ti lo. Nga tongana a fa ye na ala na peko ti ngu ota awe, lo yeke soro gi ala so ahinga ndo mingi si ala lingbi ti mû maboko na lo ti leke akota tënë. Gbia ni aye si ala kono nzoni na ala wara ngangu na ngoi so a yeke fa ye na ala. Ni la, lo mû yanga na azo ti kua ti lo ti mû na amaseka so a-oko nzoni kobe na vin so lo na sewa ti lo ayeke te na ayeke nyon.

Daniel, Sadrac, Mésac na Abed-Nego ayeke fa ye so ala lingbi ti te ni pëpe

Bâ Daniel. Mo hinga tënë so lo yeke tene na Aspenaz, mokonzi ti azo ti kua ti Nébucadnezzar? Lo yeke tene na lo so lo ye ti te anzoni ye so alondo na table ti gbia so pëpe. Me Aspenaz agi bê ti lo. Lo tene: ‘Gbia la afa kobe so ala yeke te nga na ye so ala yeke nyon. Tongana lê ti ala aza pendere tongana ti amba ti ala pëpe, lo lingbi ti fâ mbi ande.’

Tongaso, Daniel ague abâ zo so Aspenaz amû lo ti bâ lege ti lo Daniel ni na amba ti lo ota ni. Daniel atene na lo: ‘Pardon, tara e teti lango 10. Mû na e akugbe ti kasa ti te nga na ngu ti nyon. Na pekoni bâ konongo ti e na ti amaseka so ate kobe ti gbia, na bâ azo wa si akono nzoni ahon mba.’

Zo ti batango ala ni ayeda ti sara tongaso. Tongana lango 10 ni alingbi awe, lê ti Daniel na ti amba ti lo ota ni aza pendere ahon ti tanga ti amaseka-koli ni kue. Tongaso, zo ti batango ala ni azia ala ti te akugbe ti kasa ahon ti tene ala te kobe so alondo na table ti gbia.

Na hunzingo ti ngu ota ni, a ga na amaseka-koli ni kue na Nébucadnezzar. Na peko ti so gbia ni asara lisoro na ala kue awe, lo bâ so Daniel na amba ti lo ota ni ahinga ndo ahon atanga ni kue. Tongaso, lo zia ala na yangbo ti lo ti tene ala mû maboko na lo. Tongana lo hunda tënë na Daniel, na Sadrac, na Mésac nga na Abed-Nego na ngoi kue so mbeni kota kpale alondo, wala lo hunda ala ti fa tongana nyen ti leke akpale, lo bâ so hingango ye ti ala ahon ti aprêtre ti lo nga na ti awandara ti lo kue fani 10.

Daniel 1:1-21.



Ahundango tënë

  • Amaseka-koli osio wa la ayeke na lê ti foto so? Ngbanga ti nyen ala yeke na Babylone?
  • Nébucadnezzar aleke ti sara nyen na amaseka-koli osio so? Lo mû yanga na awakua ti lo ti sara nyen?
  • Daniel ahunda ti tene a mû nyen na lo nga na amba ti lo ota so ti tene ala te na ala nyon?
  • Na peko ti so ala te akugbe ti kasa lango bale-oko, lê ti Daniel na ti amba ti lo ota so aga tongana nyen tongana a haka ni na ti tanga ti amaseka-koli ni?
  • Daniel na amba ti lo ota so asara tongana nyen si ala yeke ge na yâ ti da ti gbia so? Ala hon aprêtre na awandara ni na lege wa?

Ambeni hundango tënë

  • Diko Daniel 1:1-21.

    Tongana e ye ti luti na lê ti atara na ti hon ndo ti awokongo ti e, a hunda ti tene e sara ngangu wa? (Dan. 1:8; Gen. 39:7, 10; aGal. 6:9).

    Na yâ ti aye wa a lingbi ti tara amaseka laso wala ti pusu ala ti tara ye so ambeni zo abâ ni tongana “nzo kobe”? (Dan. 1:8; aProv. 20:1; 2 aCor. 6:17-7:1).

    Mbaï ti Bible na ndo ti amaseka Hébreu osio so amû maboko na e ti gbu nda ti ye wa so andu mandango mbeti? (Dan. 1:20; Es. 54: 13; 1 aCor. 3:18-20).