Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

74: Koli so mbeto ti ye oko asara lo pëpe

74: Koli so mbeto ti ye oko asara lo pëpe

BÂ AZO so! Ala yeke he koli so na ngia. Mo hinga koli so? A yeke Jérémie, kota prophète ti Nzapa.

Azo ayeke he Jérémie na ngia

Kete na peko ti so gbia Josias ato nda ti fâ yâ ti ayanda na sese ti Israël, Jéhovah airi Jérémie ti ga prophète ti lo. Me Jérémie abâ ti lo so lo de maseka mingi ti ga prophète. Tongaso, Jéhovah atene na lo so ni yeke mû maboko na lo.

Jérémie atene na azo ti Israël ti zia lege ti sioni so ala yeke sara. Lo tene: ‘Anzapa so azo ti akodoro wande ayeke voro so ayeke anzapa ti wataka.’ Me azo ti Israël mingi aye ti voro ayanda ahon ti voro tâ Nzapa Jéhovah. Tongana Jérémie atene na ala so Nzapa ayeke fâ ngbanga na ndo ti ala ndali ti asioni ye ti ala, ala he lo gi na ngia.

Ngu mingi ahon, na Josias akui. Nze ota na pekoni, molenge ti lo Jojakim aga gbia na peko ti lo. Jérémie angbâ ti tene na azo ni: ‘A yeke futi Jérusalem tongana ala zia lege ti sioni ti ala pëpe.’ Aprêtre agbu Jérémie na ala dekongo, ala tene: ‘A lingbi a fâ mo teti atënë so mo tene so.’ Na pekoni, ala tene na amokonzi ti Israël: ‘A lingbi a fâ Jérémie, ngbanga ti so lo tene sioni tënë na tere ti kodoro ti e.’

Jérémie ayeke sara nyen fadeso? Mbeto asara lo pëpe! Lo tene na ala kue: ‘Jéhovah atokua mbi ti tene atënë so na ala. Tongana ala zia sioni sarango ye ti ala pëpe, Jéhovah ayeke futi Jérusalem. Me ala girisa so pëpe: Tongana ala fâ mbi, andâ ala fâ zo so asara sioni lâ oko pëpe.’

Amokonzi afâ Jérémie pëpe, me azo ti Israël azia sioni sarango ye ti ala pëpe. Na pekoni Nébucadnezzar, gbia ti Babylone, aga asara bira na Jérusalem. Lo hon azo ti Israël na ngangu, si na nda ni ala ga angbâa ti lo. Lo gue na ala saki mingi na Babylone. Bâ kete si! Tongana ambeni wande aga agbu mo na ague na mo na kodoro ti ala, mo yeke duti ande tongana nyen?

Jérémie 1:1-8; 10:1-5; 26:1-16; 2 aGbia 24:1-17.



Ahundango tënë

  • Maseka-koli so ayeke na lê ti foto so ayeke zo wa?
  • Jérémie atene ti lo nyen tongana a iri lo ti ga prophète? Me Jéhovah atene nyen na lo?
  • Tënë wa Jérémie angbâ gi ti fa na azo ni?
  • Tongana nyen aprêtre ni atara ti kanga lege na Jérémie? Me tongana nyen lo fa so mbeto asara lo pëpe?
  • Nyen la asi tongana azo ti Israël ake ti zia lege ti asioni sarango ye ti ala?

Ambeni hundango tënë

  • Diko Jérémie 1:1-8.

    Tongana ti so tapande ti Jérémie afa, ye wa ayeke sara si mbeni zo alingbi na kusala ti Jéhovah? (2 aCor. 3:5, 6).

    Tapande ti Jérémie akpengba amaseka Chrétien laso tongana nyen? (Zo-ti. 12:3; 1 Tim. 4:12).

  • Diko Jérémie 10:1-5.

    Jérémie asara kusala na kpengba tapande wa ti fa so ti zia bê kue na ayanda ayeke gi ye senge? (Jér. 10:5; Es. 46:7; Hab. 2:19).

  • Diko Jérémie 26:1-16.

    Na ngoi so ala yeke fa tënë laso ti gboto mê ti azo, na lege wa tanga ti ala so a sa yingo na ndo ti ala ayeke bata komandema so Jéhovah amû na Jérémie ti “lungula mbeni tënë na yâ ni pëpe”? (Jér. 26:2; Deut. 4:2; Kus. 20:27).

    Nzoni tapande wa Jérémie azia na aTémoin ti Jéhovah laso na ndo ti tënë ti fango tënë ti ngbanga ti Jéhovah na azo? (Jér. 26:8, 12, 14, 15; 2 Tim. 4:1-5).

  • Diko 2 aGbia 24:1-17.

    Ye ti vundu wa asi na Juda ngbanga ti so lo ngbâ be-ta-zo na Jéhovah pëpe? (2 aGbia 24:2-4, 14).