Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

72: Nzapa amû maboko na Ezéchias

72: Nzapa amû maboko na Ezéchias

MO HINGA ngbanga ti nyen koli so ayeke sambela Jéhovah? Ndali ti nyen lo tanda ambeti so na gbele gbalaka ti Jéhovah? Koli so ayeke Ezéchias, gbia ti royaume ti akete mara use ti Israël. Lo yeke na yâ ti kota kpale. Ngbanga ti nyen?

Gbia Ezéchias ayeke sambela

Ngbanga ti so aturugu ti Assyrie afuti royaume ti akete mara 10 ti Israël awe. Jéhovah azia ala ti sara tongaso ndali ti so akete mara 10 so asara sioni mingi. Fadeso, aturugu ti Assyrie aga ti tiri bira na royaume ti akete mara use ti Israël.

Gbia ti Assyrie atokua lani ambeti na gbia Ezéchias. Ni la si Ezéchias azia ni na gbele Nzapa. Atënë ti yâ ti ambeti so ayeke atënë ti hengo Jéhovah, na a tene na Ezéchias ti tiri pëpe. A yeke nda ni la si Ezéchias asambela Jéhovah, lo tene: ‘O Jéhovah, zi e na tïtî gbia ti Assyrie, si amara kue ahinga so gi mo oko ayeke Nzapa.’ Fade Jéhovah ayeke mä Ezéchias?

Ezéchias ayeke nzoni gbia. Lo yeke pëpe tongana asioni gbia ti royaume ti akete mara 10 ti Israël. Lo yeke nga tongana babâ ti lo Achaz pëpe, so ayeke nga lani mbeni sioni gbia. Ezéchias ayeke sara kue ti sara ye alingbi na andia ti Jéhovah kue. Ni la si tongana lo hunzi ti tene sambela ti lo ni awe, prophète Esaïe atokua na lo ti fa atënë so Jéhovah atene: ‘Gbia ti Assyrie ayeke si na Jérusalem pëpe. Turugu ti lo oko ayeke ga même nduru na ni pëpe. Ala yeke pika likongo oko na tere ti kodoro so pëpe.’

Bâ foto so na gbe ni ge. Mo hinga aturugu so akui kue so? A yeke aturugu ti Assyrie. Jéhovah atokua ange ti lo, na ange ni afâ aturugu 185 000 ti Assyrie gi na yâ ti bï oko. Me, gbia ti Assyrie akpe ti lo, lo kiri na kodoro.

Akuâ ti aturugu ti Assyrie

Jéhovah azi royaume ti akete mara use ti Israël na tïtî awato ti ala, na azo ni kue aduti na siriri teti mbeni ngoi. Me na peko ti so Ezéchias akui, molenge ti lo Manassé aga gbia. Manassé na molenge ti lo Amon so akomande na peko ti lo ayeke asioni gbia. Sioni nga na sarango ngangu akiri amû ndo na yâ ti kodoro ni. Tongana awakua ti gbia Amon afâ Amon, molenge ti lo Josias alë gbia na ndo ti royaume ti akete mara use ti Israël na peko ti lo.

2 aGbia 18:1-36; 19:1-37; 21:1-25.



Ahundango tënë

  • Koli wa la ayeke na lê ti foto so? Nyen la asara si lo yeke na yâ ti kota kpale?
  • Ambeti wa la Ezéchias azia na gbele Nzapa? Ezéchias atene nyen na yâ ti sambela ti lo?
  • Ezéchias ayeke mara ti gbia wa? Jéhovah atene na lo nyen na lege ti prophète Esaïe?
  • Tongana ti so foto ni afa, ange ti Jéhovah asara nyen na azo ti Assyrie?
  • Atâa so royaume ti akete mara use ti Juda aduti na siriri teti mbeni ngoi, nyen la asi na peko ti kuâ ti Ezéchias?

Ambeni hundango tënë

  • Diko 2 aGbia 18:1-36.

    Tongana nyen Rabsaké, so afa peko ti yanga ti gbia ti Assyrie, agi ti woko mabe ti azo ti Israël? (2 aGbia 18:19, 21; Ex. 5:2; Ps. 64:4).

    Na yâ ti sarango ye ti ala na mbage ti awato ti ala, tongana nyen aTémoin ti Jéhovah ayeke mû tapande ti Ezéchias? (2 aGbia 18:36; Ps. 39:2; aProv. 26:4; 2 Tim. 2:24).

  • Diko 2 aGbia 19:1-37.

    Tongana nyen azo ti Jéhovah ayeke sara ye laso tongana Ezéchias na ngoi ti ye ti ngangu? (2 aGbia 19:1, 2; aProv. 3:5, 6; aHéb. 10:24, 25; Jacq. 5:14, 15).

    Aye ota wa asi na gbia Sennakérib so asara si lo mû Jérusalem pëpe? Sennakérib aduti fä ti zo wa? (2 aGbia 19:32, 35, 37; Apoc. 20:2, 3).

  • Diko 2 aGbia 21:1-6, 16.

    Ndali ti nyen a lingbi ti tene so Manassé ayeke oko ti agbia ti Jérusalem so asara sioni ahon atanga ni kue? (2 Chron. 33: 4-6, 9).