Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

71: Paradis so Nzapa amû zendo ni

71: Paradis so Nzapa amû zendo ni

FOTO so ayeke foto ti paradis so akpa ti so Nzapa asara tënë ni lani na prophète Esaïe. Esaïe abâ gigi kete na peko ti kuâ ti Jonas.

Azo na yâ ti paradis

Paradis aye ti tene “pendere ndo”. Foto so adabe ti mo na mbeni ye so e bâ awe na yâ ti mbeti so? A kpa mingi ni pendere ndo so Jéhovah Nzapa asara lani ndali ti Adam na Eve pëpe? Me fade sese so kue ayeke ga paradis mbeni lâ?

Jéhovah atene na prophète ti lo Esaïe ti sara na mbeti aye nde nde na ndo ti fini paradis so Nzapa ayeke sara ande ndali ti azo ti lo. Lo tene: ‘Ambo ti ngonda na amolenge ti ngasangbaga ayeke duti ndo oko na siriri. Akete bagara na akete bamara ayeke te kobe ndo oko, na mbeni kete molenge ayeke bâ lege ti ala. Même mbeni bébé ayeke wara sioni oko pëpe tongana lo sara ngia na tere ti mbeni sioni ngbo.’

Azo mingi ayeke tene: ‘Ye so ayeke si lâ oko pëpe. Ngbene ye giriri la si sioni ayeke na yâ ti sese so, na a yeke ngbâ lakue gi tongaso.’ Me gbu li ti mo na ndo ti ye so kete e bâ: Ndo so lani Nzapa azia Adam na Eve dä ayeke tongana nyen?

Nzapa azia ala lani na yâ ti mbeni paradis. A yeke gi ngbanga ti so ala ke yanga ti lo si ala duti na yâ ti pendere ndo ti ala ni mbeni pëpe, ala ga mbakoro na ala kui. Nzapa amû yanga ti mû na azo so aye lo tâ gi aye so Adam na Eve agirisa ni.

Na yâ ti fini paradis so ayeke ga, mbeni ye oko ti sara sioni wala ti buba ndo ayeke duti dä pëpe. Tâ siriri ayeke duti dä. Azo kue ayeke duti na nzoni tere nga na ngia. Ye kue ayeke duti tongana ti so Nzapa aye lani na tango so lo leke zo. Me e yeke bâ ande tongana nyen Nzapa ayeke sara ni.

Esaïe 11:6-9; Apocalypse 21:3, 4.



Ahundango tënë

  • Esaïe ayeke zo wa? Lo duti na fini na ngoi wa? Jéhovah atene nyen na lo?
  • Tënë “paradis” aye ti tene nyen? Ye so adabe ti mo na nyen?
  • Jéhovah atene na Esaïe ti sû nyen na ndo ti fini paradis?
  • Ngbanga ti nyen a tomba lani Adam na Eve na yâ ti pendere ndo ti ala ni?
  • Jéhovah amû yanga ti sara nyen na azo so aye lo?

Ambeni hundango tënë

  • Diko Esaïe 11:6-9.

    Tongana nyen Mbeti ti Nzapa afa so siriri ayeke duti ande na popo ti anyama nga na azo na yâ ti fini sese? (Ps. 148:10, 13; Es. 65:25; Ezéch. 34:25).

    Tongana nyen atënë ti Esaïe ayeke ga tâ tënë laso na lege ti yingo na popo ti azo ti Jéhovah? (aRom. 12:2; aEph. 4:23, 24).

    Tongana azo agbian sarango ye ti ala, atâa laso wala na yâ ti fini sese, gonda ni ayeke gue na zo wa? (Es. 48:17, 18; aGal. 5:22, 23; aPhil. 4:7).

  • Diko Apocalypse 21:3, 4.

    Tongana nyen Mbeti ti Nzapa afa so tongana Nzapa aduti na azo na ndo ti sese, a ye ti tene so lo yeke na popo ti ala na lege ti fä, me pëpe so e yeke bâ tâ lo na popo ti e? (Lév. 26:11, 12; 2 Chron. 6:18; Es. 66:1; Apoc. 21:2, 3, 22-24).

    Toto wa nga na vundu wa si ayeke hon ande? (Luc 8:49-52; aRom. 8:21, 22; Apoc. 21:4).