Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

70: Jonas na kota susu

70: Jonas na kota susu

BÂ KOLI so ayeke na yâ ti ngu so. Lo yeke na yâ ti kota kpale. Kota susu so aye ti mene lo. Koli so ayeke zo wa? Mo hinga lo? Iri ti lo ayeke Jonas. Zia e bâ ngbanga ti nyen lo yeke na yâ ti kota kpale tongaso.

Jonas ayeke mbeni prophète ti Jéhovah. Ngoi kete na peko ti so prophète Elisée akui, Jéhovah atene na Jonas: ‘Gue na kota kodoro ti Ninive. Azo ni asara sioni ahon ndo ni, na mbi ye si mo sara tënë ni na ala.’

Jonas na kota susu ni

Me Jonas aye ti gue pëpe. Tongaso, lo mû mbeni bateau so ayeke gue na mbeni ndo nde, me na Ninive pëpe. Ye so Jonas asara so anzere na bê ti Jéhovah pëpe. Tongaso, Jéhovah asara si kota pupu aya, na bateau ni aye ti linda ngu. Mbeto ahon ndo ti azo ti bateau ni, si ala toto na anzapa ti ala ti mû maboko na ala.

Na nda ni, Jonas atene na ala: ‘Mbi voro Jéhovah, Nzapa so asara yayu na sese, na mbi yeke kpe yongoro na lo ti sara pëpe ye so lo tene na mbi ti sara.’ Tongaso, azo ti bateau ni ahunda lo, ala tene: ‘E lingbi ti sara nyen na mo ti tene pupu ni akaï?’

Jonas atene na ala: ‘Ala bi mbi na ngu, na ngu ni ayeke kiri ti duti kpô.’ Azo ti bateau ni aye pëpe, me tongana pupu ni akiri aga gi ngangu, ala bâ gbä ala mû Jonas ala bi lo na yâ ti ngu ni. Mo ye ti bâ, kota pupu ni akaï, na ngu ni akiri aduti kpô.

Tongana Jonas ayeke linda ngu, kota susu so amene lo. Me Jonas akui pëpe. Lo ngbâ na yâ ti susu ni lango ota na bï ota. Vundu asara Jonas mingi ndali ti so lo mä yanga ti Jéhovah pëpe nga lo gue na Ninive pëpe. Tongaso, lo sara nyen? Mo hinga?

Jonas asambela Jéhovah ti mû maboko na lo, na Jéhovah asara si kota susu so adë lo na ndo ti kuru sese. Na pekoni, Jonas ague na Ninive. Ye so afa na e so a yeke kota ye ti sara ye kue so Jéhovah ahunda na e ti sara.

Mbeti ti Jonas.



Ahundango tënë

  • Jonas ayeke zo wa? Jéhovah atene na lo ti sara nyen?
  • Ndali ti so lo ke ti gue na ndo so Jéhovah atene na lo ti gue dä, Jonas asara nyen?
  • Jonas atene na azo ti bateau ni ti sara nyen ti tene kota pupu ni akaï?
  • Tongana ti so mo bâ na lê ti foto ni, nyen la asi tongana Jonas alinda ngu?
  • Jonas asara lango oke na yâ ti kota susu ni? Lo sara nyen kâ?
  • Na peko ti so lo sigigi na yâ ti kota susu ni, Jonas ague na ndo wa? Ye so afa nyen na e?

Ambeni hundango tënë

  • Diko Jonas 1:1-16 na 2:1.

    Na nda ni, tongana nyen Jonas abâ kusala so a mû na lo ti fa tënë na azo ti Ninive? (Jonas 1:2, 3; aProv. 3:7; Zo-ti. 8:12).

  • Diko Jonas 2:2, 3, 11.

    Tongana nyen ye so asi na Jonas apusu e ti duti na kite oko pëpe so Jéhovah ayeke kiri tënë na asambela ti e? (Ps. 22:25; 34:7; 1 Jean 5:14).

  • Diko Jonas 3:1-10.

    Atâa so Jonas ake kozo ti sara ye so Jéhovah ahunda na lo, Jéhovah angbâ lakue ti sara kusala na lo. Tongaso, e manda nyen dä so akpengba e? (Ps. 103:14; 1 Pi. 5:10).

    Ye so Jonas asara na mbage ti azo ti Ninive afa na e nyen na ndo ti tënë ti fango ngbanga hio na ndo ti azo ti territoire ti e? (Jonas 3:6-9; Zo-ti. 11:6; Kus. 13:48).