Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

68: A zingo amolenge-koli use na kuâ

68: A zingo amolenge-koli use na kuâ

TONGNA mo kui si a zingo mo, bê ti mama ti mo ayeke duti tongana nyen? Bê ti lo ayeke duti ande na ngia mingi! Me zo so akui awe, lo lingbi ti kiri na fini? Mara ti ye tongaso asi mbeni lâ awe?

Bâ koli so na lê ti foto so. Bâ nga wali ni na kete molenge-koli so. Koli so ayeke prophète Elie. Wali ni ayeke mbeni womua ti kodoro ti Sarepta, na molenge-koli so ayeke molenge ti lo. Mbeni lâ, tere ti molenge ni aso juska lo kui. Tongaso, Elie atene na wali ni, lo tene: ‘Mû na mbi molenge ni.’

Elie na mbeni womua na molenge ti lo so akiri na fini

Elie ayô kuâ ti molenge ni, lo gue na ni na chambre na nduzu na lo zia lo na gbogbo. Na pekoni lo sambela Jéhovah, lo tene: ‘O Jéhovah, sara si molenge ni akiri na fini.’ Kete na pekoni, molenge ni akomanse ti wu pupu. Tongaso, Elie akiri lo na mama ti lo, na lo tene: ‘Bâ! molenge ti mo ayeke na fini!’ Ni la si mama ti molenge ni ayeke na ngia mingi tongaso.

Elisée ayeke nga mbeni kota prophète ti Jéhovah. Lo sara lani kua na gbe ti Elie. Me na mbeni ngoi, Jéhovah asara nga kusala na lo ti sara amiracle. Mbeni lâ, Elisée ague na kodoro ti Sunem. Kâ, mbeni wali asara nzoni na lo mingi. Na pekoni, wali ni adü molenge ti koli.

Molenge ni akono kete awe. Tongaso, na mbeni ndapre, lo gue ti sara kua na tere ti babâ ti lo na yaka. Me mo ye ti bâ, molenge ni atoto li ti lo, lo tene: ‘Li ti mbi aso!’ Tongana a kiri na lo na kodoro, lo kui. Vundu asara mama ti lo mingi, si na lê ni lê ni, lo gue ti bâ Elisée.

Tongana Elisée aga awe, lo yô kuâ ti molenge ni, na lo gue na ni na yâ ti mbeni chambre. Lo sambela Jéhovah, na lo lango na ndo ti molenge ni. Kete na pekoni, tere ti molenge ni akiri amû wâ na lo ngasi fani mbasambala. Tongana mama ni alï na yâ ti chambre ni na lo bâ molenge ti lo na fini, tere ti lo anzere ngangu.

Laso, azo akui gbani. Ye so azia vundu mingi na bê ti afami ti ala nga na akamarade ti ala. E yeke na ngangu ti zingo akuâ pëpe. Me Jéhovah ayeke na ngangu so. E yeke bâ ande tongana nyen lo yeke zingo akuâ kutu mingi.

1 aGbia 17:8-24; 2 aGbia 4:8-37.


Ahundango tënë

  • Azo ota wa la ayeke na lê ti foto so? Nyen la asi na molenge-koli so?
  • Elie atene nyen tongana lo yeke sambela teti molenge ni? Nyen la asi na pekoni nyen?
  • Iri ti wakua ti Elie ayeke nyen?
  • A iri Elisée na da ti mbeni wali ti kodoro ti Sunem ngbanga ti nyen?
  • Elisée asara nyen? Nyen la asi na molenge ni so akui?
  • Tongana ti so lo fa ni na lege ti Elie nga na Elisée, Jéhovah ayeke na ngangu ti sara nyen?

Ambeni hundango tënë

  • Diko 1 aGbia 17:8-24.

    Jéhovah asara nyen ti tara mabe ti Elie nga ti bâ wala lo yeke mä yanga? (1 aGbia 17:9; 19:1-4, 10).

    Nyen la afa so womua ti kodoro ti Sarepta ayeke na kota mabe? (1 aGbia 17:12-16; Luc 4:25, 26).

    Tongana nyen ye so asi na womua ti Sarepta afa so atënë so Jésus atene na Matthieu 10: 41, 42 ayeke tâ tënë? (1 aGbia 17:10- 12, 17, 23, 24).

  • Diko 2 aGbia 4:8-37.

    Wali ti kodoro ti Sunem afa nyen na e na ndo ti tënë ti yambango agene? (2 aGbia 4:8; Luc 6:38; aRom. 12:13; 1 Jean 3:17).

    E lingbi ti sara nzoni bê na awakua ti Nzapa laso tongana nyen? (Kus. 20:35; 28:1, 2; aGal. 6:9, 10; aHéb. 6:10).