Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

67: Josaphat azia bê ti lo na Jéhovah

67: Josaphat azia bê ti lo na Jéhovah

MO HINGA akoli so nga na ye so ala yeke sara so? Ala yeke gue ti tiri bira, na ala so ayeke na devant so ayeke he bia. Me peut-être mo hunda tere ti mo, mo tene: ‘Ngbanga ti nyen azo ti hengo bia ni so ayeke na épée nga na likongo pëpe?’ Zia e bâ.

Azo ti Israël ayeke gue ti tiri bira

Josaphat ayeke gbia ti royaume ti akete mara use ti Israël. Lo duti lani na fini na ngoi so gbia Achab na Jézabel ayeke komande royaume ti akete mara 10 ti Israël. Me Josaphat ayeke nzoni gbia, legeoko tongana babâ ti lo Asa. Na gbe ti komandema ti lo, azo ti royaume ni kue aduti nzoni teti angu mingi.

Me fadeso mbeni ye asi so azia mbeto na bê ti azo ni. Ambeni zo aga na Josaphat, ala tene na lo: ‘Gbâ ti aturugu ti sese ti Moab, ti Ammon na ti hoto ti Séir aga ti sara bira na mo.’ Azo ti Israël mingi abungbi na Jérusalem ti hunda na Jéhovah ti mû maboko na ala. Ala gue na temple, na Josaphat asambela Jéhovah, lo tene: ‘O Jéhovah Nzapa ti e, e hinga ye so e lingbi ti sara pëpe. E yeke na ngangu pëpe ti tiri na gbâ ti aturugu so. Lê ti e ayeke na mbage ti mo ti mû maboko na e.’

Jéhovah amä sambela ti ala ni. Lo tene na mbeni wakua ti lo ti tene na azo ni: ‘Bira so ayeke ti ala pëpe, me a yeke ti Nzapa. Ala yeke tiri pëpe. Me ala yeke bâ ti ala gi ye so ayeke si, na ala yeke bâ tongana nyen Jéhovah ayeke sö ala.’

Na ndade ni na ndapre, Josaphat atene na azo ni, lo tene: ‘Ala zia bê ti ala na Jéhovah!’ Na pekoni, lo mû azo ti hengo bia lo zia ala ti hon kozo na aturugu ni, na ala yeke he bia ti gonda Jéhovah. Mo hinga ye so asi tongana ala ga nduru na ndo ti bira ni? Jéhovah asara si awato ti ala atiri na popo ti ala wani si ala fâ tere. Tongana azo ti Israël asi, awato ni kue akui ti ala awe!

So Josaphat azia bê ti lo na Jéhovah, lo sara ye na ndara la pëpe? E nga kue e yeke sara ye na ndara tongana e zia bê ti e na Jéhovah.

1 aGbia 22: 1-53; 2 Chronique 20:1-30.


Ahundango tënë

  • Josaphat ayeke zo wa? Lo duti lani na fini na ngoi wa?
  • Ngbanga ti nyen mbeto agbu azo ti Israël? Mingi na popo ti ala asara nyen?
  • Jéhovah akiri tënë wa na sambela ti Josaphat?
  • Jéhovah asara nyen kozoni na bira ni?
  • E lingbi ti manda nyen na lege ti Josaphat?

Ambeni hundango tënë

  • Diko 2 Chronique 20:1-30.

    Tongana nyen Josaphat afa ye so a lingbi awakua be-ta-zo ti Nzapa asara na ngoi ti aye ti ngangu? (2 Chron. 20:12; Ps. 25:15; 62:2).

    Jéhovah ayeke sara lakue kusala na mbeni ye ti fa lege na azo ti lo. Laso, lo yeke sara kusala na nyen ti fa ye na azo ti lo? (2 Chron. 20:14, 15; Mat. 24:45-47; Jean 15:15).

    Na ngoi so “bira ti kota lâ ti Nzapa, Lo Ti Ngangu Ahon Kue”, ayeke londo, tongana nyen dutingo ti e ayeke kpa ti Josaphat? (2 Chron. 20:15, 17; 32:8; Apoc. 16:14, 16).

    Na tapande ti azo ti mara ti Lévi, tongana nyen apionnier na amissionnaire ayeke mû maboko na kusala ti fango tënë na ndo ti sese kue laso? (2 Chron. 20:19, 21; aRom. 10:13-15; 2 Tim. 4:2).