Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

66: Jézabel, mbeni sioni gbia-wali

66: Jézabel, mbeni sioni gbia-wali

NA PEKO ti kuâ ti gbia Jéroboam, agbia oko oko kue so akomande na yâ ti royaume ti akete mara 10 ti Israël ayeke sioni mingi. Gbia Achab ayeke sioni ahon agbia so kue. Mo hinga ngbanga ti nyen? A yeke tâ mingi ni ngbanga ti so wali ti lo, Jézabel, ayeke sioni mingi.

Jézabel ayeke mbeni zo ti Israël pëpe. Lo yeke molenge-wali ti gbia ti Sidon. Lo voro nzapa ti wataka so iri ti lo ayeke Baal, na lo sara si Achab na azo ti Israël mingi avoro Baal nga. Jézabel aye tënë ti Jéhovah oko pëpe na lo fâ aprophète ti Jéhovah mingi. Ambeni prophète ni ahonde tere ti ala na yâ ti akota dû ti tênë si lo fâ ala pëpe. Tongana Jézabel aye mbeni ye, lo yeke gue même ti fâ mbeni zo ti wara ye ni.

Mbeni lâ gbia Achab ayeke na vundu mingi. Tongaso Jézabel ahunda lo, lo tene: ‘Vundu asara mo laso ngbanga ti nyen?

Achab atene na lo: ‘A yeke ngbanga ti tënë so Naboth atene na mbi. Mbi ye fade ti vo yaka ti vigne ti lo, me lo tene na mbi so lo yeke kä ni na mbi pëpe.’

Jézabel atene: ‘Gi bê ti mo pëpe. Mbi yeke mû ni na mo.’

Tongaso Jézabel atokua ambeti na ambeni mokonzi ti kodoro so Naboth ayeke dä. Lo tene na ala, lo tene: ‘Ala mû ambeni zo use so mbeni nzoni ye ti ala ayeke dä pëpe ti tene so Naboth azonga Nzapa nga na gbia. Na pekoni, ala sigigi na Naboth na gigi ti kodoro ni na ala bo lo na tênë juska na kuâ.’

Tongana Jézabel amä so Naboth akui awe, lo tene na Achab: ‘Fadeso gue mo mû yaka ti vigne ti Naboth.’ So Jézabel asara mara ti sioni ye tongaso so, mo bâ so a lingbi lo wara futa ti sioni so lo sara so pëpe?

Gbia-wali Jézabel

Mbeni lâ, Jéhovah atokua Jéhu ti futa Jézabel ndali ti sioni so lo sara. Tongana Jézabel amä so Jéhu ayeke ga, lo to aye ti pendere na lê ti lo na lo leke tere ti lo pendere ti ku na lo. Me tongana Jéhu aga, si lo bâ Jézabel na fenêtre, lo tene na akoli so ayeke na yâ ti da ti gbia ni, lo tene: ‘Ala bi lo na sese!’ Akoli ni abi lo na sese, tongana ti so mo yeke bâ na lê ti foto so. Ala bi lo na sese, na lo kui. A yeke tongaso si sioni gbia-wali Jézabel akui.

1 aGbia 16:29-33; 18:1-4; 21:1-16; 2 aGbia 9:30-37.



Ahundango tënë

  • Jézabel ayeke zo wa?
  • Gbia Achab asara vundu mbeni lâ ngbanga ti nyen?
  • Jézabel asara nyen ti mû yaka ti vigne ti Naboth na koli ti lo, Achab?
  • Jéhovah atokua zo wa ti futa Jézabel ndali ti sioni so lo sara?
  • Tongana ti so foto ni afa, nyen la asi tongana Jéhu asi na da ti Jézabel?

Ambeni hundango tënë

  • Diko 1 aGbia 16:29-33 na 18:3, 4.

    Aye ayeke lani sioni tongana nyen na Israël na ngoi ti gbia Achab? (1 aGbia 14:9).

  • Diko 1 aGbia 21:1-16.

    Tongana nyen Naboth afa so lo sara mbeto pëpe na lo yeke be-ta-zo na Jéhovah? (1 aGbia 21:1-3; Lév. 25:23-28).

    Tapande ti Achab afa na e nyen na ndo ti lege ti hon ndo ti vundu so asara e? (1 aGbia 21:4; aRom. 5:3-5).

  • Diko 2 aGbia 9:30-37.

    Kota nzara so Jéhu ayeke na ni ti sara ye so bê ti Jéhovah aye afa nyen na e? (2 aGbia 9:4-10; 2 aCor. 9:1, 2; 2 Tim. 4:2).