Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

64: Salomon aleke temple

64: Salomon aleke temple

KOZONI si David akui, lo mû na Salomon ambeti so na ndo ni a wara ye kue so Jéhovah afa na lo David ni na ndo ti tënë ti lekengo temple ti Nzapa. Na ngu osio ni ti komandema ti Salomon, Salomon akomanse ti leke temple ni, na a hunda ngu mbasambala na ndambo ti hunzi kusala ni. Azo saki mingi mingi amû mbage na kusala ti lekengo temple ni. A hunda nga nginza mingi ti sara ni, ngbanga ti so a sara kusala na gbâ ti lor na argent ndali ni.

Temple ni ayeke na achambre use, kota ni na kete ni, legeoko tongana ti tabernacle ândö. Me achambre ni akono ahon ati tabernacle ni fani use. Salomon asara si a zia arche ti mbele na yâ ti kete chambre ti temple ni, na a zia na yâ ti kota chambre ni tanga ti aye so ayeke lani na yâ ti tabernacle.

Tongana a hunzi ti leke temple ni awe, azo asara kota matanga. Salomon akuku na devant ti temple ni na lo sambela, tongana ti so mo bâ na lê ti foto so. Lo tene na Jéhovah: ‘Ayayu alingbi na mo pëpe, na temple so kue akono alingbi nga na mo pëpe. Me atâa so kue, O Nzapa ti mbi, e hunda mo ti mä azo ti mo tongana ala sambela na mo, lê ti ala na mbage ti temple so.’

Gbia Salomon ayeke sambela

Tongana Salomon ahunzi ti tene sambela ti lo ni awe, wâ alondo na yayu atï na ndo ti anyama so a zia ala kozoni awe na ndo ti gbalaka na agbi ala kue. Lumière ti Jéhovah asu nga ngangu na yâ ti temple ni kue. Ye so afa so Jéhovah adengi mê na tënë ti ala, na lo yeda na temple so Salomon aleke na lo nga na sambela ti lo ni. Temple ni aga fadeso ndo so azo ayeke gue dä ti voro Jéhovah, me a yeke tabernacle ni mbeni pëpe.

Teti angoi mingi Salomon akomande na lege ti ndara, na azo ti Israël kue ayeke na ngia. Me Salomon amû awali mingi ti akodoro wande so avoro Jéhovah pëpe. Mo bâ mbeni oko ti ala na vorongo yanda ti lo? Na nda ni, awali ti Salomon asara si lo voro ambeni nzapa nde nga. Mo hinga ye so asi tongana Salomon asara tongaso? Lo sara ye nzoni na azo mbeni pëpe. Lo ga sioni, na azo ni ayeke na ngia mbeni pëpe.

Gbia Salomon ayeke voro yanda

Ye so azia ngonzo na bê ti Jéhovah na tere ti Salomon, si lo tene na Salomon, lo tene: ‘Mbi yeke zi royaume ni na tïtî mo ti mû na mbeni zo nde. Mbi yeke sara ni ande na lâ ti fini ti mo pëpe, me na ngoi so molenge ti mo ayeke komande. Mbi yeke zi ande azo ti Royaume ni kue pëpe na gbe ti molenge ti mo.’ Zia e bâ tongana nyen tënë so aga tâ tënë.

1 Chronique 28:9-21; 29:1-9; 1 aGbia 5:1-18; 2 Chronique 6:12-42; 7:1-5; 1 aGbia 11:9-13.



Ahundango tënë

  • Salomon amû ngoi oke ti leke na temple ti Jéhovah kue? Ngbanga ti nyen a hunda nginza mingi ti sara ni?
  • Achambre ayeke oke na yâ ti temple ni? A zia nyen na yâ ti kete chambre ti temple ni?
  • Salomon atene nyen na yâ ti sambela ti lo tongana a hunzi lekengo temple ni?
  • Tongana nyen Jéhovah afa so lo yeda na sambela ti Salomon?
  • Awali ti Salomon apusu lo ti sara nyen? Nyen la asi na Salomon?
  • Jéhovah asara ngonzo na tere ti Salomon ngbanga ti nyen? Jéhovah atene na lo nyen?

Ambeni hundango tënë

  • Diko 1 Chronique 28:9, 10.

    Na lege ti atënë so David atene na 1 Chronique 28:9, 10, a lingbi e gi lege kue ti sara nyen na yâ ti fini ti e ti lâ oko oko? (Ps. 19:15; aPhil. 4:8, 9).

  • Diko 2 Chronique 6:12-21, 32-42.

    Tongana nyen Salomon afa so da so maboko ti zo asara ayeke lingbi lâ oko pëpe na Nzapa ti Nduzu Ahon Kue? (2 Chron. 6:18; Kus. 17:24, 25).

    Atënë ti Salomon na 2 Chronique 6:32, 33 afa nyen na ndo ti Jéhovah? (Kus. 10:34, 35; aGal. 2:6).

  • Diko 2 Chronique 7:1-5.

    Na bango gloire ti Jéhovah, amolenge ti Israël asepela lo. Legeoko nga laso, tongana e bâ tufa ti Jéhovah na ndo ti azo ti lo, a lingbi bê ti e apusu e ti sara nyen? (2 Chron. 7:3; Ps. 22:23; 34:2; 96:2).

  • Diko 1 aGbia 11:9-13.

    Tongana nyen fini ti Salomon afa nene ti ngbâ be-ta-zo juska na nda ni? (1 aGbia 11:4, 9; Mat. 10:22; Apoc. 2:10).