Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

63: Salomon, gbia ti ndara

63: Salomon, gbia ti ndara

SALOMON aga gbia tongana lo de lani maseka mingi. Lo ye Jéhovah, na lo sara ye alingbi na anzoni wango so babâ ti lo David amû lani na lo. Salomon anzere na lê ti Jéhovah. Ni la si, na mbeni bï, Jéhovah atene na lo na yâ ti bango li, lo tene: ‘Salomon, mo ye mbi mû na mo nyen?’

Salomon akiri tënë, lo tene: ‘Jéhovah Nzapa ti mbi, mbi de maseka mingi, na mbi hinga lege ti komande mbilimbili pëpe. Mû na mbi ndara ti komande azo ti mo na lege ni.’

Ye so Salomon ahunda anzere na bê ti Jéhovah. Tongaso, Jéhovah atene na lo: ‘Ndali ti so mo hunda mbi ti mû na mo ndara, me mo hunda pëpe ti duti na fini a ninga wala ti wara mosoro, mbi yeke mû na mo ndara so ahon ndara ti azo kue. Mbi yeke mû nga na mo ye so mo hunda pëpe, mosoro na yango-iri.’

Kete na pekoni, awali use aga ti bâ Salomon ti tene lo leke mbeni kota tënë. Mbeni oko ti awali ni atene: ‘Mbi na wali so, e lango da oko. Mbi dü molenge ti koli,…lo kue lo dü mbeni molenge ti koli. Na mbeni bï, molenge ti lo akui. Me tongana mbi ngbâ na lango, lo zia kuâ ti molenge ti lo na tere ti mbi, si lo mû ti mbi molenge ni. Tongana mbi zingo awe, mbi bâ kuâ ti molenge ni, a yeke molenge ti mbi pëpe.’

Mba ti lo ni atene: ‘Mvene! Molenge so ayeke na fini so ayeke ti mbi, na molenge so akui awe so ayeke ti lo!’ Kozo wali ni atene: ‘Ên-ën! Molenge so akui awe so ayeke ti mo, na molenge so angbâ na fini so ayeke ti mbi.’ Papa ni akporo na popo ti ala tongaso. Salomon ayeke sara ande nyen?

Salomon atokua ti tene a ga na mbeni yongoro zembe, na lo tene: ‘Fâ yâ ti molenge ni use, na kangbi ni na awali ni.’

Tâ mama ti bébé ni adekongo, lo tene: ‘Fâ molenge ni pëpe. Mû lo na wali so!’ Me mba ti lo ni atene: ‘Mû molenge ni na zo oko na popo ti e pëpe. Fâ gi yâ ti lo use, awe!’

Gbia Salomon ayeke leke mbeni kpengba tënë

Na nda ni, Salomon atene: ‘Fa molenge ni pëpe! Mû lo na kozo wali ni. So tâ mama ti bébé ni la.’ Salomon ahinga ni ngbanga ti so tâ mama ni aye molenge ti lo mingi si lo yeke nduru ti mû lo na mba ti lo ni ti tene a fâ lo pëpe. Tongana azo amä tongana nyen Salomon aleke tënë so, ala yeke na ngia ti duti na mara ti gbia ti ndara tongaso.

Na lâ ti komandema ti Salomon, Nzapa airi tënë nzoni na ndo ti azo ti Israël. Lo sara si alê ti kobe nde nde, tongana blé, araisin na afigue, asigigi gbani gbani. Azo ti kodoro ni ayü anzoni bongo na ala lango na yâ ti anzoni da. Anzoni ye asi singo ndali ti azo kue.

1 aGbia 3:3-28; 4:29-34.



Ahundango tënë

  • Jéhovah ahunda nyen na Salomon? Salomon akiri tënë, lo tene nyen?
  • Ndali ti so ye so Salomon ahunda anzere na Jéhovah, Jéhovah atene lo yeke mû nyen na Salomon?
  • Kpengba tënë wa awali use aga na ni na gbele Salomon?
  • Tongana ti so mo bâ na lê ti foto ge, Salomon aleke tënë ni tongana nyen?
  • Aye ayeke lani tongana nyen na gbe ti komandema ti Salomon? Ngbanga ti nyen aye ni ayeke lani tongaso?

Ambeni hundango tënë

  • Diko 1 aGbia 3:3-28.

    Akoli so ayeke na akusala na yâ ti bungbi ti Nzapa laso alingbi ti manda nyen na yâ ti atënë so Salomon atene na bê ti lo kue na 1 aGbia 3:7? (Ps. 119:105; aProv. 3:5, 6).

    Tongana nyen ye so Salomon ahunda na Jéhovah ayeke mbeni nzoni tapande ti aye so a yeke nzoni ti hunda na yâ ti sambela? (1 aGbia 3:9, 11; aProv. 30:8, 9; 1 Jean 5:14).

    Lege so Salomon aleke na tënë ti awali use so afa na e nyen so e yeke na kite oko dä pëpe na ndo ti lege so Kota Salomon, Jésus Christ, ayeke komande ande na ni? (1 aGbia 3:28; Es. 9:5, 6; 11:2-4).

  • Diko 1 aGbia 4:29-34.

    Tongana nyen Jéhovah akiri tënë na sambela ti Salomon so lo hunda ti wara bê ti ndara? (1 aGbia 4:29).

    Tongana e bâ ngangu so azo asara ti ga ti mä ndara ti Salomon, a lingbi e bâ mandango Mbeti ti Nzapa tongana nyen? (1 aGbia 4:29, 34; Jean 17:3; 2 Tim. 3:16).