Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

61: David aga gbia

61: David aga gbia

SAÜL akiri agi ti gbu David. Lo mû angangu turugu ti lo 3 000 na lo gue ti gi lo. Tongana David amä tënë ni, lo tokua ambeni zo ti lo ti bâ ndo so Saül na aturugu ti lo asara kando ti ala dä teti bï ni. Na pekoni, David ahunda na aturugu ti lo use, lo tene: ‘Zo wa ayeke gue na kando ti Saül legeoko na mbi?’

David ayeke iri Gbia Saül

Abisaï atene: ‘Mbi.’ Abisaï ayeke molenge ti Tseruja, ita ti David ti wali. Tongana Saül na aturugu ti lo ayeke lango, David na Abisaï ahara yeke yeke na yâ ti kando ti ala. Ala mû likongo ti Saül na ta ti ngu ti lo, so aduti tâ gi nduru na li ti Saül. Zo oko abâ ala wala amä ala pëpe teti so ala lango ngangu.

Bâ David na Abisaï. Ala sigigi zê na yâ ti kando ti Saül. Fadeso ala yeke na li ti mbeni hoto. David adekongo na mokonzi ti aturugu ti Israël, lo tene: ‘Abner, ngbanga ti nyen mo bata gbia ti mo pëpe? Likongo nga na ta ti ngu ti lo ayeke na ndo wa?’

Saül azingo, lo mä go ti zo ni, a yeke go ti David, lo hunda ndo, lo tene: ‘David, mo la?’ Mo bâ Saül na Abner na gbe ni ge?

David akiri tënë, lo tene: ‘Mbi la, seigneur na gbia ti mbi.’ Na pekoni, lo hunda Saül, lo tene: ‘Ngbanga ti nyen mo yeke gi ti gbu mbi? Sioni ti nyen si mbi sara? Bâ likongo ti mo la, O gbia. Tokua mbeni zo ti mo ti ga ti mû ni.’

Gbia Saül na Abner

Saül atene: ‘Mbi sara sioni na mbi sara ye na lege ni pëpe.’ Tongaso, David ahon, na Saül akiri na kodoro. Me David atene na bê ti lo, lo tene: ‘Mbeni lâ Saül ayeke fâ mbi ande. Zia mbi kpe na sese ti aPhilistin.’ Lo sara tongaso. David ahanda aPhilistin ti tene ala pensé so lo duti na mbage ti ala.

Ambeni ngoi na pekoni, aPhilistin ague ti sara bira na Israël. Na yâ ti bira so, Saül na Jonathan kue akui. Ye so azia vundu mingi na bê ti David na lo sara mbeni pendere bia. Na yâ ti bia so, lo tene: ‘O ita ti mbi Jonathan, mbi yeke na vundu teti mo. Mbi ye tënë ti mo lani mingi!’

Na peko ti bira so, David akiri na Israël na kodoro ti Hébron. Bira atï na popo ti azo so aye si Isboseth, molenge ti Saül, aga gbia na azo so aye ti tene David si aga gbia. Me na nda ni, azo ti David ahon na ngangu. David ayeke na ngu 30 tongana lo ga gbia. Teti ngu mbasambala na ndambo lo komande kodoro ti Hébron. Ambeni molenge ti lo ti koli so a dü ala kâ ayeke Amnon, Absalom na Adonija.

Na mbeni ngoi, David na azo ti lo ague ti mû pendere kodoro ti Jérusalem na ngangu. Joab, mbeni molenge ti Tseruja nga, ita ti David, amû li ni na yâ ti tiri so. Lo nga kue lo yeke molenge ti Tseruja. Tongaso, ti futa lo, David azia lo na ndo ti aturugu ti lo. Fadeso, David ato nda ti komande na kodoro ti Jérusalem.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Chronique 11:1-9.



Ahundango tënë

  • David na Abisaï asara nyen na ngoi so Saül ayeke lango na yâ ti kando ti lo?
  • David ahunda tënë wa na Saül?
  • Na peko ti so David azia Saül lo hon, lo gue na ndo wa?
  • Nyen la azia vundu na bê ti David mingi si lo sara mbeni pendere bia?
  • David ayeke lani na ngu oke na ngoi so lo ga gbia na Hébron? Iri ti ambeni molenge ti lo ti koli ayeke nyen?
  • Na pekoni, David akomande tongana gbia na kodoro wa?

Ambeni hundango tënë

  • Diko 1 Samuel 26:1-25.

    Tënë ti David so a wara na 1 Samuel 26:11 afa so bango ndo ti lo ayeke so wa na mbage ti ala so Jéhovah azia ala ti mû li ni? (Ps. 37:7; aRom. 13:2).

    Tongana e sara nzoni na mbeni zo kue gbä, atënë ti David na 1 Samuel 26:23 alingbi ti mû maboko na e tongana nyen ti duti lakue na nzoni bango ndo? (1 aGbia 8:32; Ps. 18:21).

  • Diko 2 Samuel 1:26.

    Tongana nyen aChrétien laso alingbi ti duti na mara ti “tâ ndoye” so ayeke lani na popo ti David na Jonathan? (1 Pi. 4: 8; aCol. 3:14; 1 Jean 4:12).

  • Diko 2 Samuel 5:1-10.

    David akomande tongana gbia teti ngu oke? A kangbi yâ ti angu so tongana nyen? (2 Sam. 5:4, 5).

    Nyen la asara si David aga kota? Ye so adabe ti e na nyen laso? (2 Sam. 5:10; 1 Sam. 16:13; 1 aCor. 1:31; aPhil. 4:13).

TI HINGA AMBENI TËNË

David asara mbeto lani ape

Diko pendere mbaï so na yâ ti Bible ti hinga ye so asara lani si David ayeke na mbeto ape.