Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

60: Abigail na David

60: Abigail na David

MO HINGA pendere wali so ayeke ga na mbage ti David so? Iri ti lo ayeke Abigaïl. Lo yeke na ndara mingi, nga lo kanga lege na David ti sara mbeni ye ti sioni. Zia e bâ ye so asi na David kozoni si.

Tongana David akpe Saül, lo honde tere ti lo na yâ ti mbeni kota dû ti tênë. Aita ti lo na tanga ti afami ti lo ague awara lo kâ. Azo nduru na 400 amû peko ti David, na lo ga mokonzi ti ala. Na pekoni, David ague abâ gbia ti Moab na lo hunda lo, lo tene: ‘Pardon, zia babâ na mama ti mbi angbâ na mo juska mbi bâ ye so ayeke si na mbi si.’ Tongaso, David na azo ti lo ahonde tere ti ala na yâ ti akete hoto.

A yeke na pekoni si David atingbi na Abigaïl. Koli ti Abigaïl ayeke Nabal. Lo yeke na mosoro mingi nga lo yeke wa ti mbeni kota ndo. Lo yeke na ataba 3 000 nga na angasa 1 000. Nabal ayeke sioni zo. Me wali ti lo Abigaïl ayeke pendere mingi, nga lo hinga ti sara ye so ayeke nzoni. Lo zi même sewa ti lo mbeni lâ na yâ ti mbeni kpale. Lo sara ni tongana nyen? Zia e bâ.

David na azo ti lo asara nzoni na Nabal. Ala bata ataba ti lo si sioni asi na ala pëpe. Tongaso, mbeni lâ David atokua azo ti lo ti hunda na Nabal ti sara mbeni ye teti lo. Azo ti David asi na Nabal na ngoi so lo, Nabal, na awakua ti lo ayeke fâ kuä ti tere ti ataba. A yeke mbeni lango ti matanga, na Nabal ayeke na gbâ ti anzoni ye ti tengo ni. Tongaso, azo ti David atene na lo: ‘E sara nzoni na mo. E nzi taba ti mo oko pëpe, me e bata ala si sioni asi na ala pëpe. Fadeso, e hunda mo ti mû mbeni kobe na e ti te.’

Nabal atene: ‘Mbi yeke mû kobe ti mbi na mara ti azo tongana ala so pëpe.’ Lo sara tënë nzoni oko pëpe, na lo tene asioni tënë na ndo ti David. Tongana azo ni akiri, si ala tene pekoni na David, ngonzo agbu David ngangu. Lo tene na ala: ‘Ala mû épée ti ala!’ Tongaso, ala gue na tere ti Nabal na azo ti lo.

Na mango asioni tënë so Nabal atene, mbeni zo ti kua ti lo ague na Abigaïl, na lo fa na lo peko ti ye so asi. Hio, Abigaïl aleke ambeni kobe, lo zia ni na ndo ti alele si lo gue ti bâ David. Tongana lo tingbi David na lege, lo londo na ndo ti lele ti lo, lo kuku na sese, na lo tene: ‘Seigneur ti mbi, pardon, mä atënë ti koli ti mbi Nabal pëpe. Lo yeke buba zo, na lo yeke sara ye kirikiri mingi. Bâ matabisi so mbi ga na ni na mo. Mû ni, na pardone e ndali ti ye so asi.’

Abigaïl ayeke ga na ambeni kobe na David

David atene na Abigaïl: ‘Mo yeke wali ti ndara. Mo kanga lege na mbi ti fâ Nabal ndali ti sioni so lo sara na mbi. Fadeso, kiri na da ti mo na siriri.’ Na pekoni, tongana Nabal akui, Abigaïl aga mbeni oko ti awali ti David.

1 Samuel 22:1-4; 25:1-43.



Ahundango tënë

  • Iri ti wali so ayeke gue ti tingbi na David na lê ti foto so ayeke nyen? Lo yeke mara ti wali wa?
  • Nabal ayeke zo wa?
  • Ngbanga ti nyen David atokua ambeni zo ti lo ti hunda mbeni ye na Nabal?
  • Nabal atene nyen na azo ti David? Tongana David amä tënë ni, lo sara nyen?
  • Abigaïl asara nyen so afa atene lo yeke mbeni wali ti ndara?

Ambeni hundango tënë

  • Diko 1 Samuel 22:1-4.

    Tongana nyen azo ti da ti babâ ti David azia nzoni tapande na e na ndo ti lege so a lingbi e mû maboko na popo ti e na yâ ti bungbi ti aita ti e ti ndo lê ti sese kue? (aProv. 17:17; 1 aThes. 5:14).

  • Diko 1 Samuel 25:1-43.

    Ngbanga ti nyen e tene so Nabal abâ David tongana ye oko na lê ti lo pëpe? (1 Sam. 25:2-5, 10, 14, 21, 25).

    Awali Chrétien alingbi ti manda nyen laso na lege ti tapande ti Abigaïl? (1 Sam. 25:32, 33; aProv. 31:26; aEph. 5:24).

    Aye ti sioni use wa Abigaïl akanga lege na David ti sara? (1 Sam. 25:31, 33; aRom. 12:19; aEph. 4:26).

    Tongana nyen sarango ye ti David na mbage ti atënë so Abigaïl atene na lo amû maboko na akoli laso ti bâ awali tongana ti so Jéhovah ayeke bâ ala? (Kus. 21:8, 9; aRom. 2:11; 1 Pi. 3:7).

TI HINGA AMBENI TËNË

Abigaïl asara ye na ndara mingi

So gigi akpengba lani na Abigaïl na gbe ti koli ti lo Nabal, e manda nyen dä?