Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

59: David akpe

59: David akpe

NA PEKO ti so David afâ Goliath, Abner, mokonzi ti aturugu ti Israël, aga na lo na gbele Saül. Tere ti Saül anzere mingi ndali ti ye so David asara. Lo zia lo tongana mokonzi na popo ti aturugu ti Israël, na Saül amû lo ti duti na da ti lo mveni.

Na pekoni, aturugu ti Israël akiri ague atiri bira na aPhilistin. Na kiringo ti ala, awali ahe bia, ala tene: ‘Saül afâ azo saki oko, me David afâ ti lo saki bale-oko.’ Tënë so asara si bê asara Saül, ngbanga ti so a gonda David mingi ahon lo. Me Jonathan, molenge ti Saül ti koli, asara kota bê pëpe. Lo ye David mingi, na David nga aye Jonathan mingi. Tongaso, ala use kue amû yanga ti ngbâa lakue akamarade.

Gbia Saül ayeke bi mbeni likongo

David ayeke pika harpe pendere mingi, na Saül aye mozoko so David ayeke pika ka ni. Me mbeni lâ kota bê ti Saül apusu lo ti sara mbeni ye ti sioni. Na ndembe so David ayeke pika harpe, Saül amû likongo ti lo na lo bi ni na mbage ti David, lo tene: ‘Mbi yeke kpo lo na tere ti mur!’ Me David adengi tere ti lo, na likongo ni awara lo pëpe. Mbeni lâ, Saül akiri abi likongo ti kpo David, ti so ni so nga likongo ni awara lo pëpe. Tongaso, David abâ so a lingbi lo sara hange mingi.

Mo dabe ti mo na ye so Saül atene ni yeke mû na zo so ayeke fâ Goliath? Lo tene ni yeke mû na lo molenge ti ni ti wali ti ga wali ti lo. Saül atene na David so lo lingbi ti mû Mical, molenge ti lo ti wali, me kozoni kue a lingbi lo fâ awato ti ala aPhilistin 100 si. Bâ kete si! Saül aye ti lo ti tene aPhilistin afâ David. Me ala fâ lo pëpe, tongaso Saül amû molenge ti lo ti wali ni na David.

Mbeni lâ Saül atene na Jonathan nga na azo ti kua ti lo kue so lo ye ti fâ David. Me Jonathan atene na babâ ti lo, lo tene: ‘Sara sioni na David pëpe. Lo sara sioni na mo lâ oko pëpe. Me ye kue so lo sara amû maboko na mo mingi. Lani so lo fâ Goliath, lo zia fini ti lo na lê ti kuâ, na mo yeke lani na ngia tongana lo fâ Goliath.’

David ayeke dengi tere ti lo si likongo ni akpo lo pëpe

Saül amä molenge ti lo, na lo tene so ni yeke sara sioni na David pëpe. Tongaso, a kiri na David na da ti Saül, na lo sara kusala na tere ti lo tongana ti kozo. Me, mbeni lâ, tongana David ayeke pika mozoko na harpe ti lo, Saül akiri abi likongo ti lo ti kpo David. David adengi tere ti lo si likongo ni akpo mur. Fani ota ni ti tene Saül asara tongaso la! David abâ so ti so ni so a lingbi lo kpe!

Na bï ni so, David ague na da ti lo. Me Saül atokua ambeni zo ti fâ lo. Mical ahinga ye so babâ ti lo aye ti sara na David. Tongaso lo tene na koli ti lo, lo tene: ‘Tongana mo kpe na bï so pëpe, kekereke a yeke wara gi kuâ ti mo.’ Gi na oko bï ni so, Mical amû maboko na David ti sigigi na fenêtre ti kpe. Teti ngu mbasambala tongaso, David ahonde tere ti lo na ando nde nde si Saül awara lo pëpe.

1 Samuel 18:1-30; 19:1-18.



Ahundango tënë

  • Ngbanga ti nyen Saül asara kota bê na tere ti David? Me tongana nyen Jonathan ayeke nde na babâ ti lo Saül?
  • Nyen la asi mbeni lâ tongana David ayeke pika harpe na Saül?
  • Saül atene na David ti sara nyen kozoni si lo mû molenge ti lo Mical ti ga wali ti lo? Saül atene tongaso ngbanga ti nyen?
  • Tongana David ayeke pika harpe na Saül, nyen la akiri asi ti fani ota ni? (Bâ foto ni.)
  • Mical amû maboko na David tongana nyen ti sö fini ti lo? Na peko ti ye so, David asara nyen teti ngu mbasambala?

Ambeni hundango tënë

  • Diko 1 Samuel 18:1-30.

    Tongana nyen kota ndoye so Jonathan ayeke na ni na mbage ti David aduti fä ti ndoye so ayeke na popo ti “ambeni ngasangbaga” na “kete kundu”? (1 Sam. 18:1; Jean 10:16; Luc 12:32; Zach. 8:23).

    Teti so a yeke fade na lege ni ti tene Jonathan amû mbata ti gbia na peko ti Saül, tongana nyen 1 Samuel 18:4 afa so Jonathan ayeda na bê kue ti duti na gbe ti komandema ti lo so Nzapa asoro lo ti ga gbia?

    Tongana nyen tapande ti Saül afa so kota bê alingbi ti gue na zo ti sara kota siokpari? Ye so afa na e ti sara hange na nyen? (1 Sam. 18:7-9, 25; Jacq. 3:14-16).

  • Diko 1 Samuel 19:1-17.

    Na ngoi so Jonathan asara tënë na Saul, lo zia fini ti lo na lê ti kuâ tongana nyen? (1 Sam. 19:1, 4-6; aProv. 16:14).

TI HINGA AMBENI TËNË

David: Lo zia bê ti lo kue na Nzapa

David asara afaute nga lo wara akpale na yâ ti gigi ti lo, me lo zia lâ oko ape ti sara na Nzapa. Nzoni tapande ti lo alingbi ti mû maboko na mo ti ngbâ be-ta-zo.