Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

58: David na Goliath

58: David na Goliath

APHILISTIN akiri aga ti tiri bira na Israël. Eliab, Abinadab na Samma, ayaya ti David ota kue, aga fadeso aturugu ti Saül. Mbeni lâ, Jessé atene na David: ‘Mû ambeni lê ti kobe nga na mapa, mo gue na ni na aita ti mo. Bâ wala ala yeke nzoni kâ.’

Goliath

Tongana David asi na ndo so aturugu ti Israël ayeke dä, lo gue ti bâ aita ti lo na ndo so ala na aPhilistin ayeke tingbi tere dä. Goliath, mbeni Philistin so ayo na nduzu mingi, asigigi ti he azo ti Israël na ngia. A sara lango 40 awe si lo yeke sara tongaso lakue na ndapre nga na lakui. Lo dekongo, lo tene: ‘Ala mû mbeni zo ti ala oko aga atiri na mbi e bâ! Tongana lo hon ndo ti mbi na lo fâ mbi, e yeke ga angbâa ti ala. Me tongana mbi la mbi hon ndo ti lo si mbi fâ lo, ala yeke ga angbâa ti e. Ala ga na mbeni zo ti ala, mbi na lo e tiri.’

David ahunda na ambeni turugu, lo tene: ‘Zo so afâ Philistin so na azi Israël na yâ ti kamene so ayeke wara nyen na pekoni?’

Mbeni turugu ni atene: ‘Saül ayeke mû na lo mosoro mingi. Lo yeke mû nga molenge ti lo ti wali na zo ni ti ga wali ti lo.’

Me azo ti Israël kue asara mbeto ti Goliath ngbanga ti so lo kono mingi. Lo yo nduru na mètre 3, na mbeni turugu nde si ayô vala ti lo.

Ambeni turugu ni ague atene na gbia Saül so David aye ti tiri na Goliath. Me Saül atene na David: ‘Mo lingbi ti tiri na Philistin so pëpe. Mo de kete mingi, na ngbene ye so a dü lo, lo yeke turugu.’ David akiri tënë, lo tene: ‘Mbi fâ lani mbeni ours nga na mbeni bamara so amû ataba ti mbi. Philistin so ayeke ga nga tongana ala. Jéhovah ayeke mû ande maboko na mbi.’ Tongaso, Saül atene: ‘Gue, na zia Jéhovah aduti na mo.’

David ague na tere ti ngu, lo ro atênë oku so lê ni aza zango si lo zia ni na yâ ti bozo ti lo. Na pekoni, lo mû lance ti lo na lo gue ti tingbi na Goliath. Tongana Goliath abâ lo, li ti lo akpe kue. Ti lo, lo tene so a yeke duti ngangu pëpe ti fâ David.

David ayeke bi mbeni tênë

Goliath atene na David: ‘Ga ge, mbi yeke mû tere ti mo na andeke nga na anyama ti te!’ Me David atene na lo: ‘Mo ga na mbi na épée na kota likongo nga na kete likongo, me mbi gue na mo na iri ti Jéhovah. Laso, Jéhovah ayeke zia mo na tïtî mbi, na mbi yeke fâ mo.’

Tongana David atene tënë so, lo mû loro ti tingbi na Goliath. Lo mû mbeni tênë na yâ ti bozo ti lo, lo zia ni na yâ ti lance, na lo bi ni na ngangu ti tere ti lo kue. Tênë ni ague alï tâ gi na yâ ti li ti Goliath, si lo tï lo kui! Tongana aPhilistin abâ so ngangu zo ti ala ni atï na sese awe, ala kue akpe. Azo ti Israël akpe na peko ti ala na ala hon aPhilistin na ngangu.

1 Samuel 17:1-54.



Ahundango tënë

  • Goliath atene nyen ti pusu aturugu ti Israël ti ga ti tiri na lo?
  • Goliath akono tongana nyen? Gbia Saül atene ni yeke mû nyen na zo so ayeke fâ Goliath?
  • Tongana Saül atene na David so lo lingbi pëpe ti tiri na Goliath teti so lo de kete mingi, David atene nyen?
  • Na yâ ti tënë so lo tene na Goliath, tongana nyen David afa so lo zia bê ti lo kue na Jéhovah?
  • Tongana ti so mo bâ na lê ti foto ni, David afâ Goliath na nyen? Nyen la asi na aPhilistin na peko ti ye so?

Ambeni hundango tënë

  • Diko 1 Samuel 17:1-54.

    Nyen la ayeke lani na gunda ti sarango ye ti David na mbeto pëpe? Tongana nyen e lingbi ti sara ye na mbeto pëpe tongana lo? (1 Sam. 17:37, 45; aEph. 6:10, 11).

    Tongana aChrétien ayeke sara ambeni ngia, ngbanga ti nyen a lingbi ala gi ti hon amba ti ala pëpe tongana ti so Goliath asara? (1 Sam. 17:8; aGal. 5:26; 1 Tim. 4:8).

    Tongana nyen atënë ti David afa so lo hinga na bê ti lo so Nzapa ayeke mû maboko na lo? (1 Sam. 17:45-47; 2 Chron. 20:15).

    Mbaï so afa pëpe gi peko ti mbeni senge tiri na popo ti abungbi ti aturugu use, me a fa so tiri ni atingbi biani anzapa ti wataka na tâ Nzapa, Jéhovah. A fa ni tongana nyen? (1 Sam. 17:43, 46, 47).

    Tongana nyen tanga ti ala so a sa yingo na ndo ti ala amû tapande ti David so azia bê ti lo kue na Jéhovah? (1 Sam. 17:37; Jér. 1:17-19; Apoc. 12:17).

TI HINGA AMBENI TËNË

David asara mbeto lani ape

Diko pendere mbaï so na yâ ti Bible ti hinga ye so asara lani si David ayeke na mbeto ape.