Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

57: Nzapa asoro David

57: Nzapa asoro David
David ayeke zi mbeni kete taba na tïtî mbeni bamara

MO BÂ ye so asi? Mbeni nyama so iri ti lo ayeke ours aga amû kete taba so, na lo gue ti te lo. Me molenge-koli so akpe na peko ti ala, na lo zi kete taba so na yanga ti ours ni. Tongana ours ni aluti na ngonzo, molenge so agbu lo na lo pika lo na kuâ! Na mbeni ngoi nga, molenge-koli so azi mbeni kete taba na tïtî mbeni bamara. Molenge so ayeke na mbeto oko pëpe! Lo yeke zo wa? Mo hinga lo?

Iri ti lo ayeke David. Lo lango na kodoro ti Bethléhem. Âta ti lo ti koli ayeke Obed, molenge ti Ruth na Boaz. Mo dabe ti mo na ala? Babâ ti David ayeke Jessé. David ayeke bata ataba ti babâ ti lo. A dü David ngu 10 na peko ti so Saül aga gbia.

Mbeni lâ, Jéhovah atene na Samuel: ‘Mû mbeni mafuta so afun nzoni na gue na da ti Jessé na Bethléhem. Mbi soro mbeni oko ti amolenge ti lo ti koli ti ga gbia.’ Tongana Samuel asi kâ si lo bâ Eliab, kozo molenge ti Jessé, lo tene na bê ti lo, lo tene: ‘So a yeke tâ zo so Jéhovah asoro lo la.’ Me Jéhovah atene na lo: ‘Bâ pendere ti lo pëpe, na bâ nga yongo ti lo pëpe. Lo la mbi soro lo ti ga gbia pëpe.’

Tongaso Jessé airi molenge ti lo Abinadab, na lo ga na lo na Samuel. Me Samuel atene: ‘Jéhovah asoro nga lo pëpe.’ Na pekoni, Jessé aga na lo molenge ti lo Samma. Samuel atene: ‘Jéhovah asoro lo so nga pëpe.’ Jessé aga na amolenge ti lo mbasambala kue na Samuel, me Jéhovah asoro zo oko na popo ti ala pëpe. Samuel ahunda Jessé, lo tene: ‘Gi amolenge ti mo kue la?’

Jessé atene: ‘A ngbâ tanga ni, me lo gue ti bata ataba.’ Tongana a ga na David awe, Samuel abâ so lo yeke pendere molenge. Jéhovah atene na lo: ‘Zo ni la. Tuku mafuta na li ti lo.’ Samuel asara tongaso. Tongana ngoi ni alingbi ande, David ayeke ga gbia ti Israël.

1 Samuel 17:34, 35; 16:1-14.



Ahundango tënë

  • Iri ti molenge-koli so mo bâ na lê ti foto so ayeke nyen? E hinga tongana nyen so lo sara ye na mbeto pëpe?
  • David alango na kodoro wa? Iri ti babâ ti lo na ti âta ti lo ti koli ayeke nyen?
  • Jéhovah atene na Samuel ti gue na da ti Jessé na Bethléhem ti sara nyen?
  • Nyen la asi tongana Jessé afa amolenge ti lo mbasambala na Samuel?
  • Tongana a ga na David, Jéhovah atene nyen na Samuel?

Ambeni hundango tënë

  • Diko 1 Samuel 17:34, 35.

    Tongana nyen aye so asi afa biani so David ayeke zo ti mbeto pëpe nga so lo zia bê ti lo lakue na Jéhovah? (1 Sam. 17:37).

  • Diko 1 Samuel 16:1-14.

    Ye so Jéhovah atene na 1 Samuel 16:7 amû maboko na e tongana nyen ti bâ azo kue oko na ti zia si gi na bango ala e duti na sioni bango ndo pëpe na mbage ti ala? (Kus. 10:34, 35; 1 Tim. 2:4).

    Tongana nyen tapande ti Saül afa so tongana Jéhovah azi yingo vulu ti lo na ndo ti mbeni zo, mbeni sioni yingo wala mbeni ngangu nzara ti sara gi sioni alingbi ti mû place ni? (1 Sam. 16:14; Mat. 12:43-45; aGal. 5:16).