Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

56: Saül, kozo gbia ti Israël

56: Saül, kozo gbia ti Israël
Samuel atuku mafuta na li ti Saül ti fa so a soro lo ti ga gbia

BÂ Samuel, lo yeke tuku mafuta na li ti koli so. A yeke ye so azo ayeke sara giriri na mbeni zo ti fa so a soro lo ti ga gbia. Jéhovah atene na Samuel ti tuku mafuta na li ti Saül. Mafuta so afun pendere mingi.

Saül atene ti lo so ni lingbi na kusala ti gbia pëpe. Lo tene na Samuel: ‘Mbi yeke ti mara ti Benjamin, na mara ti mbi ayeke kete ahon amara kue ti Israël. Teti nyen mo tene so mbi yeke ga ande gbia?’ Jéhovah aye Saül ngbanga ti so lo tene pëpe so ni yeke kota ahon amba ti ni. Ni la si Jéhovah asoro lo ti ga gbia.

Me Saül ayeke zo ti mawa wala kete zo pëpe. Lo londo na yâ ti mbeni sewa so ayeke na mosoro mingi, na lo yeke pendere mingi nga lo yeke yongoro koli. Lo yo lo hon tanga ti azo kue ti Israël. Saül ayeke nga zo so ayeke kpe loro hio mingi, na lo yeke na ngangu mingi. Azo ti Israël ayeke na ngia ndali ti so Jéhovah asoro Saül ti ga gbia. Ala kue adekongo, ala tene: ‘Zia gbia aninga na sese!’

Awato ti Israël ayeke lakue na ngangu, na ala ngbâ ti sara sioni mingi na azo ti Israël. Kete na peko ti so Saül aga gbia, azo ti Ammon aga ti tiri bira na Israël. Me Saül abungbi aturugu mingi, na lo hon azo ti Ammon na ngangu. Ye so asara si azo ti Israël ayeke na ngia mingi so Saül ayeke gbia.

Tongana angu ayeke hon, Saül asara si azo ti Israël ahon na ngangu awato ti ala mingi. Saül ayeke na mbeni molenge ti koli so ayeke sara ye na mbeto pëpe. Iri ti lo ayeke Jonathan. Jonathan amû maboko na Israël ti sö benda na yâ ti abira mingi. A-Philistin angbâ angangu wato ti Israël ahon atanga ni kue. Mbeni lâ, aPhilistin saki mingi mingi aga ti tiri bira na azo ti Israël.

Samuel atene na Saül ti ku juska ni ga awe si ala mû sandaga na Jéhovah. Me Samuel aga hio pëpe. Teti so Saül asara mbeto so aPhilistin ayeke komanse ti tiri bira, lo mû li ni ti mû sandaga ni lo mveni. Na nda ni, tongana Samuel aga, lo tene na Saül so lo, Saül, lo ke yanga ti Jéhovah. Samuel atene na lo: ‘Jéhovah ayeke soro mbeni zo nde ti ga gbia ti Israël.’

Ambeni ngoi na pekoni, Saül akiri ake yanga ti Jéhovah. Tongaso Samuel atene na lo: ‘A yeke nzoni ti mä yanga ti Jéhovah ahon ti mû na lo sandaga ti angasangbaga ti nzoni mingi. Ndali ti so mo ke yanga ti Jéhovah, lo yeke zia ande mo ti ngbâ gbia ti Israël pëpe.’

E lingbi ti manda mbeni nzoni ye na yâ ti tënë so. A fa na e so a yeke kota ye mingi ti mä yanga ti Jéhovah lakue. A fa nga na e so mbeni nzoni zo alingbi ti ga sioni, legeoko tongana Saül. E ye lâ oko pëpe ti ga sioni zo.

1 Samuel chapitre 9 ti si na 11; 13:5-14; 14:47-52; 15:1-35; 2 Samuel 1:23.



Ahundango tënë

  • Samuel ayeke sara nyen na lê ti foto so? Lo sara tongaso ngbanga ti nyen?
  • Jéhovah aye lani Saül ngbanga ti nyen? Saül ayeke tongana nyen nga lo londo na yâ ti sewa wa?
  • Iri ti molenge ti Saül ti koli ayeke nyen? Molenge so asara nyen?
  • Ngbanga ti nyen Saül amû sandaga ahon ti tene lo ku Samuel aga si a mû ni?
  • E lingbi ti manda nyen na lege ti mbaï ti Saül?

Ambeni hundango tënë

  • Diko 1 Samuel 9:15-21 na 10:17-27.

    So Saül asara tere ti lo kete amû maboko na lo tongana nyen ti kpe ti sara ye na loro tongana ambeni koli atene tënë ti mbana na lo? (1 Sam. 9:21; 10:21, 22, 27; aProv. 17:27).

  • Diko 1 Samuel 13:5-14.

    Siokpari wa Saül asara na Guilgal? (1 Sam. 10:8; 13:8, 9, 13).

  • Diko 1 Samuel 15:1-35.

    Kota siokpari wa Saül asara lani na ndo ti tënë ti Agag, gbia ti Amalek? (1 Sam. 15:2, 3, 8, 9, 22).

    Saül atara lani ti tene nyen ti zi tënë na li ti lo? Lo bi tënë ni na li ti azo wa? (1 Sam. 15:24).

    A lingbi e sara hange na nyen laso tongana a mû wango na e? (1 Sam. 15:19-21; Ps. 141:5; aProv. 9:8, 9; 11:2).