Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

55: Mbeni kete molenge ti koli asara na Nzapa

55: Mbeni kete molenge ti koli asara na Nzapa

MOLENGE-KOLI so ayeke pendere pëpe? Iri ti lo ayeke Samuel. Iri ti koli so azia maboko ti lo na li ti Samuel ayeke Eli, lo yeke kota prêtre ti Israël. Ala so aga na Samuel ti bâ Eli ayeke babâ ti lo Elkana na mama ti lo Hanna.

Samuel atingbi na hota prêtre Eli

Samuel ayeke gi na ngu osio wala oku tongaso. Me, lo yeke ngbâ ge na tabernacle ti Jéhovah na tere ti Eli na ambeni prêtre. Ngbanga ti nyen Elkana na Hanna amû kete molenge tongana Samuel so ti sara na Jéhovah na tabernacle ti lo? Zia e bâ nda ni.

Ngu kete kozoni, mawa asara Hanna mingi. Lo lingbi ti dü molenge lani pëpe, na nzara ti wara molenge asara lo ngangu mingi. Ni la, tongana lo gue mbeni lâ na tabernacle ti Jéhovah, lo sambela, lo tene: ‘O Jéhovah, girisa mbi pëpe. Tongana mo mû na mbi mbeni molenge ti koli, mbi yeke mû lo na mo ti sara kusala na mo na lâ ti fini ti lo kue.’

Jéhovah amä sambela ti Hanna, si kete na pekoni lo dü Samuel. Hanna aye molenge ti lo ni mingi, na lo fa na lo aye na ndo ti Jéhovah tongana lo de kete. Hanna atene na koli ti lo: ‘Tongana Samuel akpengba awe na mbi zi lo na yanga ti me awe, mbi yeke gue na lo na tabernacle ti tene lo sara na Jéhovah.’

Hanna na Elkana asara tongaso, tongana ti so mo bâ na lê ti foto so. Ndali ti so babâ na mama ti Samuel afa ye na lo nzoni, lo yeke na ngia ti ga ti sara na Jéhovah na yâ ti tabernacle ti lo. Ngu oko oko, Hanna na Elkana aga ti voro Jéhovah na ndo so na ti bâ molenge ti ala ti koli. Nga, ngu oko oko, Hanna ayeke sara mbeni fini bongo so maboko ni ayeke dä pëpe na lo ga na ni na Samuel.

Tongana angu ayeke hon, Samuel angbâ ti sara kusala na yâ ti tabernacle ti Jéhovah. Jéhovah na azo ti Israël aye lo mingi. Me Hophni na Phinéas, amolenge ti Eli, ayeke nzoni pëpe. Ala sara aye ti sioni mingi, na ala pusu ambeni zo ti ke yanga ti Jéhovah nga. A lingbi Eli azi ala fade na kusala ti ala ti prêtre, me lo sara tongaso pëpe.

Samuel azia lege pëpe na aye ti sioni so azo ayeke sara na tabernacle ni ti pusu lo ti zia ti sara na Jéhovah. Me ndali ti so gi azo oko oko si aye Jéhovah na bê ti ala kue, a sara ngoi mingi so Jéhovah asara tënë na zo oko pëpe. Ni la, bâ ye so asi tongana Samuel akono kete awe:

Mbeni lâ, tongana Samuel ayeke lango na yâ ti tabernacle, lo mä mbeni go azingo lo. Samuel akiri tënë, lo tene: ‘Mbi la.’ Lo londo lo gue na Eli, si lo tene: ‘Mo iri mbi, na mbi la ge.’

Me Eli atene: ‘Mbi iri mo pëpe; kiri mo lango.’ Tongaso, Samuel akiri alango.

Go ni airi Samuel ti fani use, a tene: ‘Samuel!’ Tongaso, Samuel alondo na lo kiri lo gue na Eli. Lo tene: ‘Mo iri mbi, na mbi la ge.’ Me Eli atene na lo: ‘Mbi iri mo pëpe, molenge ti mbi. Kiri mo gue mo lango.’ Tongaso, Samuel akiri ague alango.

Go ni airi Samuel ti fani ota ni, a tene: ‘Samuel!’ Tongaso Samuel ague na Eli. Lo tene: ‘Mbi la ge, teti mbi hinga biani so mo iri mbi.’ Eli ahinga fadeso awe so a lingbi ti duti Jéhovah si airi lo. Tongaso, lo tene na Samuel: ‘Kiri mo gue mo lango ti so ni so nga, na tongana lo kiri lo iri ndo, mo tene: “Sara tënë, Jéhovah, teti wakua ti mo ayeke mä mo.” ’

A yeke tënë so si Samuel atene tongana Jéhovah akiri airi lo. Jéhovah atene na Samuel so ni yeke se Eli na amolenge ti lo ndali ti sioni so ala sara. Ngoi kete na pekoni, Hophni na Phinéas akui na yâ ti bira so azo ti Israël atiri na aPhilistin. Tongana Eli amä tënë ni, lo tï na sese, na go ti lo akungbi si lo kui. Tongaso, tënë ti Jéhovah aga tâ tënë.

Samuel aga kota koli, na lo yeke ndangba juge ti Israël. Tongana lo ga mbakoro awe, azo ti Israël ahunda lo, ala tene: ‘Soro mbeni zo ti ga gbia ti e.’ Samuel aye ti sara so pëpe, ngbanga ti so Jéhovah ayeke tâ gbia ti ala. Me Jéhovah atene na lo ti mä tënë ti azo ni.

1 Samuel 1:1-28; 2:11-36; 3:1-18; 4:16-18; 8:4-9.



Ahundango tënë

  • Iri ti molenge-koli so na lê ti foto so ayeke nyen? Azo wa la ayeke na tere ti lo so?
  • Sambela wa Hanna atene na mbeni lango so lo gue na tabernacle ti Jéhovah? Jéhovah akiri tënë na sambela ti lo tongana nyen?
  • Samuel ayeke na ngu oke tongana a gue na lo na tabernacle ti sara na Jéhovah? Mama ti lo ayeke sara nyen ndali ti lo ngu oko oko?
  • Iri ti amolenge ti Eli ayeke nyen? Me sarango ye ti ala ayeke lani tongana nyen?
  • Nyen la asi na Samuel mbeni lâ tongana lo yeke lango? Tënë ti nyen la a tene na lo?
  • Tongana Samuel akono, lo ga zo wa? Nyen la asi tongana Samuel aga mbakoro?

Ambeni hundango tënë

  • Diko 1 Samuel 1:1-28.

    Nzoni tapande wa Elkana azia na ababâ ti sewa na ndo ti tënë ti mungo li ni na yâ ti tâ vorongo? (1 Sam. 1:3, 21; Mat. 6:33; aPhil. 1:10).

    E lingbi ti manda nyen na ndo ti lege so Hanna agi ti hon ndo ti mbeni kpale so asara si lo gi bê ti lo mingi? (1 Sam. 1:10, 11; Ps. 55:23; aRom. 12:12).

  • Diko 1 Samuel 2:11-36.

    Tongana nyen Eli ane amolenge ti lo ahon Jéhovah? Ye so afa na e nyen? (1 Sam. 2:22-24, 27, 29; Deut. 21:18-21; Mat. 10:36, 37).

  • Diko 1 Sam. 4:16-18.

    Mbeni zo alondo na lê ti bira aga na mbeni tokua ti vundu. Atënë osio wa ayeke na yâ ni? Ye so asara nyen na ndo ti Eli?

  • Diko 1 Samuel 8:4-9.

    Israël asara nyen so aso bê ti Jéhovah ngangu? Tongana nyen e lingbi ti fa so e ngbâ lakue ti mû mbage ti Royaume ti lo? (1 Sam. 8:5, 7; Jean 17:16; Jacq. 4:4).

TI HINGA AMBENI TËNË

Samuel asara gi ye so ayeke nzoni

Atâa so ambeni zo ayeke sara aye ti sioni, mo lingbi ti sara ye ti nzoni tongana ti Samuel tongana nyen?

Samuel angbâ lakue ti maï na gbele Jéhovah’

Ye wa asi na Samuel na so ayeke si ka na amolengue kue ape? Nyen la asara si mabe ti lo akono na ngoi so lo yeke na yâ ti tabernacle?