Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

54: Koli so ayeke na ngangu mingi

54: Koli so ayeke na ngangu mingi

MO HINGA iri ti koli so ayeke na ngangu ahon akoli ti ndo lê ti sese kue? Iri ti lo ayeke Samson, na lo yeke mbeni juge. A yeke Jéhovah si amû na lo ngangu so. Même kozoni si a dü Samson, Jéhovah atene na mama ti lo, lo tene: ‘Na yâ ti kete ngoi, mo yeke dü mbeni molenge ti koli. Lo yeke sö ande Israël na maboko ti aPhilistin.’

Samon ayeke tiri na mbeni bamara

A-Philistin ayeke lani asioni zo so aduti na sese ti Canaan. Ala yeke na gbâ ti aturugu, na ala sara sioni mingi na azo ti Israël. Mbeni lâ, tongana Samson ayeke gue na ndo so aPhilistin ayeke dä, lo tingbi na mbeni kota bamara so ayeke ga na mbage ti lo na dekongo. Me Samson afâ bamara ni na maboko ti lo senge. Lo fâ nga asioni Philistin ngbangbo mingi.

Na pekoni, Samson atï mbeni wali so iri ti lo ayeke Dalila. Amokonzi ti aPhilistin atene na Dalila so ala oko oko kue ayeke mû na lo nginza ti argent 1 100 tongana lo fa na ala ye so asara si Samson ayeke na ngangu mingi tongaso. Dalila aye ti wara nginza so kue. Ti tâ tënë ni, lo ye Samson pëpe na lo ye azo ti Nzapa nga pëpe. Tongaso, lo hunda lakue na Samson ti fa na lo ye so asara si lo yeke na ngangu mingi.

Dalila na Samson

Na nda ni, Dalila asara si Samson afa na lo ye so asara si lo yeke na ngangu. Samson atene: ‘A fâ kuä ti li ti mbi lâ oko pëpe. Tâ gi na ngoi so a dü mbi, Nzapa asoro mbi ti ga wakua ti lo so ayeke nde. So ti tene mbi yeke Naziréen. Tongana a fâ kuä ti li ti mbi, ngangu ti mbi ayeke hunzi.’

Tongana Dalila amä tënë so, lo sara si Samson alango na ndo ti gere ti lo. Na pekoni, lo iri mbeni zo ti ga ti fâ kuä ti li ti Samson. Tongana Samson azingo na lango, ngangu ti lo ahunzi awe. A-Philistin alï na yâ ti da ni na ala gbu lo. Ala koro lê ti lo use kue, na ala sara si lo ga ngbâa ti ala.

Samson ayeke kungbi apilier ti da

Mbeni lâ aPhilistin asara kota matanga ti voro nzapa ti ala Dagon. Ala zi Samson na da ti kanga na ala ga na lo na ndo ti matanga ni ti he lo. Na ngoi so lo ngbâ lani na da ti kanga, kuä ti li ti lo akiri apusu. Samson atene na molenge-koli so agbu maboko ti lo ti fa lege na lo, lo tene: ‘Zia mbi ndu apilier so da ni aluti na ndo ni.’ Na pekoni, lo sambela Jéhovah ti mû ngangu na lo, na lo gbu apilier ni. Lo dekongo, lo tene: ‘Zia mbi kui legeoko na aPhilistin!’ Wungo ti aPhilistin so aga na kota matanga so ayeke 3 000 tongaso, na tongana Samson apusu apilier ni, da ni akungbi na ndo ti asioni zo so, si a fâ ala kue.

aJuge chapitre 13 ti si na 16.



Ahundango tënë

  • Iri ti koli so ayeke na ngangu ahon akoli ti ndo lê ti sese kue ayeke nyen? Zo wa la amû na lo ngangu so?
  • Mbeni lâ, Samson asara nyen na mbeni kota bamara? (Bâ foto ni.)
  • Na lê ti foto ni ge, tënë wa so Samson aye si zo oko ahinga ni pëpe lo yeke tene ni na Dalila? Tongana nyen ye so azi lege na aPhilistin ti gbu lo?
  • Samson asara tongana nyen si awato ti lo aPhilistin 3 000 akui na lango ti kuâ ti lo?

Ambeni hundango tënë

  • Diko aJuge 13:1-14.

    Tongana nyen Manoah na wali ti lo azia nzoni tapande na ababâ na amama na ngoi so ala yeke bata amolenge ti ala? (aJu. 13:8; Ps. 127:3; aEph. 6:4).

  • Diko aJuge 14:5-9 na 15:9-16.

    Mbaï ti Samson afa so lo fâ bamara, lo fâ yâ ti afini kamba so a kanga na lo na lo fâ azo 1 000 na bio ti ngbangba ti mbeni lele. Aye so kue afa nyen na ndo ti lege so yingo ti Jéhovah ayeke sara kusala?

    Tongana nyen yingo vulu ayeke mû maboko na e laso? (aJu. 14:6; 15:14; Zach. 4:6; Kus. 4:31).

  • Diko aJuge 16:18-31.

    Asioni kamarade asara nyen na ndo ti Samson? E lingbi ti manda nyen dä? (aJu. 16:18, 19; 1 aCor. 15:33).