Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

53: Yanga so Jephté amû

53: Yanga so Jephté amû
Molenge-wali ti Jephté

A SI na mo awe ti mû yanga ti sara mbeni ye so na pekoni mo bâ a yeke ngangu ti sara ni? A yeke ye so asi na koli so mo bâ na lê ti foto so, ni la si mawa asara lo mingi. Koli so ayeke juge ti Israël. Iri ti lo ayeke Jephté, na lo sara ye na mbeto pëpe.

Jephté aduti lani na mbeni ngoi so azo ti Israël azia ti voro Jéhovah. Ala kiri asara sioni. Tongaso, Jéhovah azia azo ti Ammon ti sara sioni na ala. Ye so asara si azo ti Israël atoto na Jéhovah, ala tene: ‘E sara siokpari na tere ti mo. E toto na mo ti zi e.’

Jephté na azo ti lo

Vundu asara azo ti Israël ndali ti asioni ye so ala sara, na ala fa ni na lege so ala kiri avoro Jéhovah. Jéhovah akiri amû maboko na ala.

Azo ti Israël asoro Jephté ti tiri na awato ti ala, azo ti kodoro ti Ammon. Jephté aye mingi ti tene Jéhovah amû maboko na lo na yâ ti bira so. Tongaso lo mû yanga na Jéhovah, lo tene: ‘Tongana mo sara si mbi hon azo ti Ammon na ngangu, kozo zo so ayeke sigigi na yâ ti da ti mbi ti tingbi na mbi na kiringo ti mbi, mbi yeke mû lo na mo.’

Jéhovah amä tënë ti Jephté ni, na lo mû maboko na lo ti hon awato na ngangu. Tongana Jephté akiri na kodoro, mo hinga kozo zo so asigigi ti wara lo? A yeke molenge ti lo ti wali, so ayeke gi oko molenge ti lo. Jephté atene: ‘Aï! molenge ti mbi. Vundu asara mbi mingi ngbanga ti mo. Me mbi mû fade yanga na Jéhovah, na mbi lingbi ti kiri na ndo ni pëpe.’

Tongana molenge ti Jephté ni amä tënë ti yanga so babâ ti lo amû, vundu asara nga lo kozoni. Ngbanga ti so ye so ayeke hunda ande na lo ti zia babâ ti lo na akamarade ti lo, na ti gue ti sara na Jéhovah na tanga ti fini ti lo kue na yâ ti tabernacle ti lo na Silo. Tongaso, lo tene na babâ ti lo: ‘Tongana mo mû yanga na Jéhovah awe, a lingbi mo sara ye alingbi na ni.’

Tongaso, molenge ti Jephté ague na Silo, na lo sara na Jéhovah na yâ ti tabernacle ti lo na tanga ti fini ti lo kue. Lango osio na yâ ti ngu oko oko, awali ti kodoro ti Israël ayeke gue ti bâ lo na Silo, na lo na ala akangbi ngoi ti ngia. Azo aye molenge ti Jephté ngbanga ti so lo sara kusala nzoni mingi na Jéhovah.

aJuge 10:6-18; 11:1-40.



Ahundango tënë

  • Jephté ayeke zo wa? Lo duti na fini na ngoi wa?
  • Yanga wa Jephté amû na Jéhovah?
  • Ngbanga ti nyen vundu asara Jephté tongana lo kiri na kodoro na peko ti so lo hon azo ti Ammon na ngangu?
  • Molenge ti Jephté ti wali atene nyen tongana lo mä tënë ti yanga so babâ ti lo amû?
  • Ngbanga ti nyen azo ti Israël aye tënë ti molenge ti Jephté ti wali mingi?

Ambeni hundango tënë

  • Diko aJuge 10:6-18.

    Tongana e bâ mbaï ti azo ti Israël so aduti be-ta-zo na Jéhovah pëpe, a lingbi e sara hange na nyen? (aJu. 10:6, 15, 16; aRom. 15:4; Apoc. 2:10).

  • Diko aJuge 11:1-11, 29-40.

    E hinga tongana nyen so tongana a tene Jephté amû molenge ti lo na “offrande so a-zo-na-wa”, a ye pëpe ti tene so lo zö molenge ni tâ na wâ tongana mbeni sandaga? (aJu. 11:31; Lév. 16:24; Deut. 18:10, 12).

    Na lege wa Jephté amû lani molenge ti lo na sandaga?

    E lingbi ti manda nyen na ndo ti bango ndo ti Jephté na mbage ti yanga so lo mû na Jéhovah? (aJu. 11:35, 39; Zo-ti. 5:3, 4; Mat. 16:24).

    Tongana nyen molenge ti Jephté ti wali ayeke mbeni nzoni tapande ndali ti amaseka Chrétien na ndo ti tënë ti mungo kusala ti ngoi kue? (aJu. 11:36; Mat. 6:33; aPhil. 3:8).