Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

52: Gédéon na azo ti lo 300

52: Gédéon na azo ti lo 300

MO BÂ ye so asi ge? Azo so ayeke aturugu ti Israël. Akoli so akuku na yanga ti ngu so ayeke nyon ngu. Gédéon ayeke koli so aluti na tere ti ala ti bâ lege so ala yeke nyon na ngu ni. Lo yeke nga juge.

Bâ aye so aturugu so asara. Ambeni azia lê ti ala na lê ti ngu si ala nyon ni. Me mbeni oko atö ngu ni na maboko ti lo si lo nyon ni, tongaso si lo lingbi ti bâ ndo na tere ti lo. Sarango tongaso ayeke kota ye mingi, teti Jéhovah atene na Gédéon ti soro gi akoli so ayeke bâ ndo na ngoi so ala yeke nyon ngu ni. Nzapa atene so a lingbi atanga ni akiri na kodoro. Zia e bâ ngbanga ti nyen.

Azo ti Israël akiri awara gbâ ti akpale. Senge pëpe, ngbanga ti so ala mä yanga ti Jéhovah pëpe. Azo ti Madian ahon ala na ngangu na ala sara sioni na ala. Tongaso, azo ti Israël atoto na Jéhovah ti tene lo mû maboko na ala, na Jéhovah amä toto ti ala.

Jéhovah atene na Gédéon ti wara ambeni turugu, tongaso Gédéon abungbi akoli 32 000. Me wungo ti aturugu so aga ti tiri na Israël ayeke 135 000. Atâa so kue, Jéhovah atene na Gédéon: ‘Wungo ti aturugu ti mo ahon ndo ni.’ Jéhovah atene na lo tongaso ngbanga ti nyen?

Ngbanga ti so tongana azo ti Israël ahon awato ti ala na ngangu ala yeke tene ande so ala la asara ni na ngangu ti ala mveni. Ala lingbi ti tene na bê ti ala so ala yeke na bezoin ti tene Jéhovah amû maboko na ala pëpe ti hon awato ti ala na ngangu. Tongaso, Jéhovah atene na Gédéon: ‘Tene na aturugu kue so mbeto asara ala ti kiri na kodoro.’ Tongana Gédéon asara tongaso, aturugu 22 000 akiri na kodoro. Gi aturugu 10 000 si angbâ ti tiri na awato ti ala 135 000.

Gédéon ayeke tara bê ti aturugu ti lo

Me, mä tënë so Jéhovah atene na Gédéon: ‘Aturugu ti mo angbâ mingi.’ Lo tene na Gédéon ti gue na ala na tere ti mbeni ngu ti nyon ni na ti tene na ala so azia lê ti ala na lê ti ngu ni ti kiri na kodoro. Jéhovah amû yanga so, lo tene: ‘Mbi yeke sara si mo yeke hon awato ti mo na ngangu na lege ti aturugu 300 so angbâ ti bâ ndo tongana ala yeke nyon ngu.’

Ngoi ni alingbi awe ti tene ala tiri bira. Gédéon amû akoli 300 so, lo kangbi yâ ti ala ota. Lo mû na ala oko oko kue mbeni trompette na mbeni ta so a zia na yâ ni mbeni keke so wâ ayeke na yanga ni. Na bê ti bï, ala kue angoro kando ti awato ti ala. Na pekoni, ala kue, ala huru trompette ti ala legeoko, ala fâ yâ ti ata ti ala na ala dekongo: ‘Épée ti Jéhovah na ti Gédéon!’ Tongana awato ti ala azingo na lango, li ti ala akpe kirikiri na mbeto asara ala. Ala kue akpe, si azo ti Israël ahon ala na ngangu

aJuge chapitre 6 ti si na 8.



Ahundango tënë

  • Azo wa la aga na gbâ ti akpale na azo ti Israël? Ngbanga ti nyen azo ti Israël awara akpale so?
  • Ngbanga ti nyen Jéhovah atene na Gédéon so wungo ti aturugu ti lo ahon ndo ni?
  • Azo oke si angbâ na Gédéon tongana lo hunda na aturugu so asara mbeto ti kiri na kodoro?
  • Na lege ti ye so mo bâ na lê ti foto ge, fa tongana nyen Jéhovah akiri na wungo ti aturugu ti Gédéon juska ti ngbâ gi 300.
  • Tongana nyen Gédéon aleke yâ ti aturugu ti lo 300 so? Tongana nyen Israël ahon na ngangu?

Ambeni hundango tënë

  • Diko aJuge 6:36-40.

    Gédéon asara nyen ti hinga biani ye so bê ti Jéhovah aye?

    E yeke sara tongana nyen laso ti hinga ye so Jéhovah aye? (aProv. 2:3-6; Mat. 7:7-11; 2 Tim. 3:16, 17).

  • Diko aJuge 7:1-25.

    E lingbi ti manda nyen na lege ti aturugu 300 so lê ti ala angbâ na zingo ni na ngoi so ala yeke nyon ngu nde na atanga ni so anyon ngu ni na hange pëpe? (aJu. 7:3, 6; aRom. 13:11, 12; aEph. 5:15-17).

    Legeoko tongana ti so aturugu 300 amanda ye na bango Gédéon, e nga e yeke manda ye tongana nyen na bango Kota Gédéon, Jésus Christ? (aJu. 7:17; Mat. 11:29, 30; 28:19, 20; 1 Pi. 2:21).

    Tongana nyen aJuge 7:21 amû maboko na e ti yeda na akusala kue so a mû na e ti sara na yâ ti bungbi ti Jéhovah? (1 aCor. 4:2; 12:14-18; Jacq. 4:10).

  • Diko aJuge 8:1-3.

    Tongana a ndu tënë ti lekengo tënë na popo ti e na mbeni ita, e lingbi ti manda nyen na ndo ti lege so Gédéon aleke tënë so alondo na popo ti lo na azo ti Ephraïm? (aProv. 15:1; Mat. 5:23, 24; Luc 9:48).