Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

51: Ruth na Naomi

51: Ruth na Naomi

NA YÂ ti Bible, mo yeke bâ mbeti ti Ruth. A fa tënë na ndo ti mbeni sewa na ngoi so Israël aduti na gbe ti ajuge. Ruth ayeke mbeni maseka-wali ti sese ti Moab, na lo yeke zo ti Israël pëpe, mara so ayeke ti Nzapa. Me tongana Ruth amanda ye na ndo ti Jéhovah, tâ Nzapa, lo ndoye lo mingi. Naomi ayeke mbeni mbakoro-wali so amû maboko na Ruth ti hinga Jéhovah.

Naomi ayeke zo ti Israël. Lo na koli ti lo nga na amolenge ti ala ti koli use ague na sese ti Moab na mbeni ngoi so lani kobe ayeke na Israël pëpe. Mbeni lâ, koli ti Naomi akui. Na pekoni, amolenge ti lo amû awali use ti sese ti Moab. Iri ti awali ni ayeke Ruth na Orpa. Me ngu 10 na pekoni, amolenge ti Naomi use kue akui. So tâ vundu si asara Naomi na akogara ti lo! Fadeso, Naomi ayeke sara nyen?

Mbeni lâ, Naomi amû desizion ti sara yongoro voyage ti kiri na kodoro ti lo na Israël. Ruth na Orpa aye ti ngbâ na tere ti lo, na tongaso ala gue oko na lo. Me tongana ala gue ayo kete, Naomi atene na akogara ti lo, lo tene: ‘Ala kiri na kodoro na tere ti amama ti ala.’

Naomi asu ngbangba ti akogara ti lo ti hon, me ala komanse ti toto, ngbangba ti so ala ye Naomi mingi. Ala tene: ‘Ên-ën! E yeke gue oko na mo na azo ti mo.’ Me Naomi atene: ‘Ala kiri na kodoro, amolenge ti mbi. Ala yeke duti ande nzoni mingi na kodoro ti ala mveni.’ Tongaso, Orpa akiri na kodoro, me Ruth akiri pëpe.

Naomi aturne na mbage ti Ruth, lo tene na lo: ‘Orpa akiri ti lo. Mû peko ti lo, mo kiri.’ Me Ruth atene na lo: ‘Gbu mbi na ngangu ti kiri pëpe. Zia mbi gue na mo. Ndo so kue mo gue dä, mbi yeke gue dä, na ndo so kue mo lango dä, mbi yeke lango dä. Fade azo ti mo aga azo ti mbi, na fade Nzapa ti mo aga Nzapa ti mbi. Ndo so mo yeke kui dä, mbi yeke kui dä, na ndo so la a yeke lu mbi dä.’ Tongana Ruth atene tongaso, Naomi azia ti tene na lo ti kiri na kodoro ti lo.

Na nda ni, awali use so asi na Israël. A yeke na ndo so la si ala duti dä. Ruth akomanse hio ti sara kua na yaka, teti so a yeke ngoi ti fango orge. Mbeni koli so iri ti lo ayeke Boaz azia lo ti ro orge na yaka ti lo. Mo hinga mama ti Boaz? A yeke Rahab, zo ti gbata ti Jéricho.

Mbeni lâ, Boaz atene na Ruth: ‘Mbi mä tënë mingi na ndo ti mo, nga tongana nyen mo sara nzoni na Naomi. Mbi hinga so mo zia babâ na mama ti mo na kodoro ti mo, na mo ga na popo ti azo so mo hinga ala kozoni lâ oko pëpe. Zia Jéhovah airi tënë nzoni na ndo ti mo!’

Ruth akiri tënë, lo tene: ‘Mo sara nzoni bê na mbi mingi. Tere ti mbi anzere ndali ti so mo sara tënë na mbi na mbeni lege so ayeke nzoni mingi.’ Boaz aye tënë ti Ruth mingi, si kete na pekoni ala sara mariage. Bê ti Naomi ayeke na ngia mingi! Me tere ti lo akiri anzere ngangu tongana Ruth na Boaz adü kozo molenge ti ala ti koli so iri ti lo ayeke Obed. Na pekoni, Obed aga âta ti David, na e yeke manda ande ye mingi na ndo ti David ni.

Ruth na Naomi

Mbeti ti Ruth.



Ahundango tënë

  • Nyen la ague na Naomi na sese ti Moab?
  • Ruth na Orpa ayeke azo wa?
  • Ruth na Orpa atene nyen tongana Naomi ahunda na ala ti kiri na kodoro ti ala?
  • Boaz ayeke zo wa? Tongana nyen lo mû maboko na Ruth nga na Naomi?
  • Iri ti molenge so Boaz na Ruth adü ayeke nyen? Ngbanga ti nyen a lingbi e dabe ti e na lo?

Ambeni hundango tënë

  • Diko Ruth 1:1-17.

    Ruth atene nyen ti fa so ndoye so lo yeke na ni na mbage ti Naomi agbian pëpe? (Ruth 1:16, 17).

    Tongana nyen bibe ti Ruth afa na gigi nzoni mingi bango ndo so “ambeni ngasangbaga” ayeke na ni na mbage ti ala so na sese ge a sa yingo na ndo ti ala? (Jean 10:16; Zach. 8:23).

  • Diko Ruth 2:1-23.

    Tongana nyen Ruth aduti mbeni nzoni tapande ndali ti amaseka-wali laso? (Ruth 2:17, 18; aProv. 23:22; 31:15).

  • Diko Ruth 3:5-13.

    So Ruth ayeda ti ga wali ti Boaz ahon ti mû mbeni koli so ade maseka asara nyen na ndo ti Boaz?

    Sarango ye ti Ruth afa na e nyen na ndo ti ndoye so ayeke gbian pëpe? (Ruth 3:10; 1 aCor. 13:4, 5).

  • Diko Ruth 4:7-17.

    Tongana nyen akoli Chrétien laso alingbi ti sara ye tongana Boaz? (Ruth 4:9, 10; 1 Tim. 3:1, 12, 13; 5:8).