Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

50: Awali use so asara ye na mbeto pëpe

50: Awali use so asara ye na mbeto pëpe

TONGANA ye ti ngangu asi na azo ti Israël, ala toto na Jéhovah. Jéhovah amä toto ti ala na lege so lo tokua angangu mokonzi ti mû maboko na ala. Bible airi amokonzi so ajuge. Josué ayeke kozo juge, na ambeni juge so aga na peko ti lo ayeke Othniel, Ehud na Samgar. Me use ti azo so amû maboko na azo ti Israël ayeke awali, Débora na Jaël.

Débora ayeke sara tënë na Barak

Débora ayeke mbeni wali prophète. Jéhovah afa na lo ye so ayeke si ande, na lo fa pekoni na azo ti Israël. Débora ayeke nga juge. Lo duti na gbe ti mbeni keke ti mburu na yâ ti mbeni kodoro ti Israël so ayeke na li ti kete hoto, na azo aga na lo ti leke ambeni tënë ti ala.

Na ngoi ni kâ, Jabin ayeke gbia ti Canaan. Lo yeke na apuse ti mbarata 900. Aturugu ti lo ayeke na ngangu mingi si ala gbu azo ti Israël mingi ti ga angbâa ti ala. Iri ti mokonzi ti aturugu ti Gbia Jabin ayeke Siséra.

Mbeni lâ Débora airi juge Barak, lo tene na lo: ‘Jéhovah atene: “Mû aturugu 10 000 na gue na ala na hoto ti Tabor. Mbi yeke sara si Siséra aga na mbage ti mo. Mbi yeke sara si mo hon lo na aturugu ti lo na ngangu.” ’

Barak atene na Débora: ‘Mbi yeke gue gi tongana mo kue mo gue.’ Débora ague, me lo tene na Barak: ‘Gonda ti hongo na ngangu ni ayeke duti ande ti mo pëpe, ngbanga ti so Jéhovah ayeke zia ande Siséra na tïtî mbeni wali.’ A yeke ye so asi biani.

Barak alondo na hoto ti Tabor lo gue ti tingbi na aturugu ti Siséra. Mo ye ti bâ, Jéhovah asara si ngu asuku, na mingi ti aturugu ni akui kuâ ti ngu. Me Siséra azia puse ti mbarata ti lo, na lo kpe lo hon.

Barak, Jaël na Siséra

Kete na pekoni, Siséra asi na tente ti Jaël. Jaël airi lo ti lï na yâ ni, na lo mû na lo dulait ti nyon. Ye so asara si lo woko kue, na lo tï hio na lango. Na pekoni Jaël amû mbeni kete keke so a kpo na tente na lo pika ni na li ti sioni koli so na marteau. Tongana Barak asi, Jaël afa na lo kuâ ti Siséra. Mo bâ, tënë ti Débora aga tâ tënë.

Na nda ni, a fâ nga gbia Jabin, na azo ti Israël akiri aduti na siriri teti mbeni ngoi.

aJuge 2:14-22; 4:1-24; 5:1-31.



Ahundango tënë

  • Ajuge ayeke azo wa? Iri ti ambeni ayeke nyen?
  • Débora ayeke sara lani kusala ti nyen? Ye so ahunda nyen na mbage ti lo?
  • Tongana gbia Jabin na mokonzi ti aturugu ti lo, Siséra, ayeke gi Israël na tënë ti sara bira na ala, tokua wa so alondo na Jéhovah Déborah amû na Juge Barak? Lo tene na lo so zo wa si ayeke fâ ande Siséra?
  • Tongana nyen Jaël afa so lo yeke mbeni wali so asara ye na mbeto pëpe?
  • Nyen la asi na peko ti kuâ ti gbia Jabin?

Ambeni hundango tënë

  • Diko aJuge 2:14-22.

    Azo ti Israël asara nyen so aga na ngonzo ti Jéhovah na ndo ti ala? E lingbi ti manda nyen na lege ti ye so? (aJu. 2:20; aProv. 3:1, 2; Ezéch. 18:21-23).

  • Diko aJuge 4:1-24.

    Na ndo ti tënë ti dutingo na mabe nga na sarango ye na mbeto pëpe, aita-wali alingbi ti manda nyen laso na lege ti tapande ti Déborah na ti Jaël? (aJu. 4:4, 8, 9, 14, 21, 22; aProv. 31:30; 1 aCor. 16:13).

  • Diko Juge 5:1-31.

    Tongana nyen a lingbi ti bâ bia ti hongo na ngangu so Barak na Déborah ahe ni tongana mbeni sambela so a tene ndali ti bira ti Harmaguédon so ayeke pusu nduru? (aJu. 5:3, 31; 1 Chron. 16:8-10; Apoc. 7:9, 10; 16:16; 19:19-21).