Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

49: Lâ aluti

49: Lâ aluti

BÂ Josué. Lo tene: ‘Lâ, mo luti!’ Lâ ni aluti. Lâ ni angbâ gi na ndo so lo yeke dä teti lango oko. Jéhovah la asara tongaso! Me zia e bâ nda ni so Josué ahunda ti tene lâ angbâ ti su.

Lâ

Tongana asioni gbia oku so ti Canaan ato nda ti tiri bira na azo ti Gabaon, azo ti Gabaon atokua mbeni koli na Josué ti ga ti mû maboko na ala. Koli ni atene: ‘Ga hio ti sö e! Agbia kue ti kodoro so ayeke na li ti hoto kâ aga ti tiri bira na e awakua ti ala.’

Tongana ala si na Gabaon, mbeto agbu aturugu ti agbia oku so na ala kpe. Jéhovah asara si akota glason alondo na yayu atï na ndo ti ala na afâ ala gbani gbani ahon ti so azo ti Josué afâ na épée.

Josué

Josué abâ so lâ aga nduru ti linda. Ndo ayeke vuko, na mingi ti aturugu ti asioni gbia oku so ayeke kpe. Ni la si Josué asambela Jéhovah, si na pekoni lo tene: ‘Lâ, mo luti!’ Na tongana lâ ayeke ngbâ ti su, aturugu ti Israël ayeke wara lege ti hunzi ande na awato ti ala.

Ambeni sioni gbia ti sese ti Canaan so ake azo ti Nzapa angbâ mingi. A hunda na Josué nga na aturugu ti lo ngu omene ti hon na ngangu agbia 31 ti Canaan. Tongana lo sara tongaso awe, Josué abâ si a kangbi sese ti Canaan na akete mara ti Israël so ade awara sese ti ala pëpe.

Na peko ti angu mingi, Josué akui tongana lo yeke na ngu 110. Na ngoi kue so lo na amba ti lo angbâ na fini, azo ti Israël amä yanga ti Jéhovah. Me tongana anzoni zo so akui awe, azo ti Israël ato nda ti sara sioni, na ye ti ngangu asi na ala. A yeke na ngoi so la si ala hunda biani na Nzapa ti mû maboko na ala.

Josué 10:6-15; 12:7-24; 14:1-5; aJuge 2:8-13.



Ahundango tënë

  • Na lê ti foto ni, Josué ayeke tene nyen? Lo tene tongaso ngbanga ti nyen?
  • Tongana nyen Jéhovah amû maboko na Josué nga na aturugu ti lo?
  • Agbia oke Josué ahon ala na ngangu? A hunda na lo ngoi oke ti hon ala na ngangu?
  • Ngbanga ti nyen Josué akangbi yâ ti sese ti Canaan na akete mara ti Israël?
  • Josué akui lani na ngu oke? Nyen la asi na azo ni na peko ti kuâ ti lo?

Ambeni hundango tënë

  • Diko Josué 10:6-15.

    Teti e hinga so Jéhovah asara lani si lâ na nze aluti na place ti ala ndali ti azo ti Israël, ye wa e yeke na kite dä pëpe laso? (Jos. 10:8, 10, 12, 13; Ps. 18:4; aProv. 18:10).

  • Diko Josué 12:7-24.

    Zo wa la amû lege biani na Israël ti hon na ngangu agbia 31 ti sese ti Canaan? Ye so ayeke kota ye mingi ndali ti e laso ngbanga ti nyen? (Jos. 12:7; 24:11-13; Deut. 31:8; Luc 21:9, 25-28).

  • Diko Josué 14:1-5.

    A kangbi lani sese ni na popo ti akete mara ti Israël tongana nyen? Ye so afa nyen na ndo ti asese so azo ayeke wara ande na yâ ti Paradis? (Jos. 14:2; Es. 65:21; Ezéch. 47:21-23; 1 aCor. 14:33).

  • Diko aJuge 2:8-13.

    Legeoko tongana Josué na ngoi ti Israël, azo wa laso ayeke kanga lege na a-apostat? (aJu. 2:8, 10, 11; Mat. 24:45-47; 2 aThes. 2:3-6; Tite 1:7-9; Apoc. 1:1; 2:1, 2).