Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

47: Zo ti nzi na Israël

47: Zo ti nzi na Israël
Acan ayeke honde aye so lo nzi

BÂ YE so koli so ayeke lu na yâ ti tente ti lo. A yeke mbeni pendere bongo, lor na argent. Lo mû aye so na gbata ti Jéricho. Me a hunda lani ti sara nyen na aye so ayeke na yâ ti gbata ti Jéricho? Mo dabe ti mo na ni?

A hunda lani ti tene a futi ni, na ti tene a zia lor na argent na tabernacle ti Jéhovah. Tongaso, azo so ake yanga ti Nzapa. Ala nzi ye ti Nzapa. Iri ti koli ni ayeke Acan, na azo so ayeke azo ti da ti lo. Zia e bâ ye so asi.

Na peko ti so Acan anzi aye so, Josué atokua aturugu ti lo ti sara bira na kodoro ti Aï. Me azo ti Aï ahon ala na ngangu, ala fâ ambeni, na ambeni akpe. Vundu asara Josué mingi. Lo kuku na sese na gbele Jéhovah, lo sambela lo, lo tene: ‘Ngbanga ti nyen mo zia si ye tongaso asi na e?’

Jéhovah atene: ‘Londo! Israël asara siokpari. Ala mû ambeni ti aye so a lingbi a futi ni wala so a hunda ti zia na tabernacle ti mbi. Ala nzi mbeni pendere bongo na ala honde ni. Mbi yeke iri tënë nzoni na ndo ti ala pëpe juska ala futi bongo so nga na zo so anzi aye so.’ Jéhovah atene so ni yeke fa na Josué zo wa ayeke sioni zo so.

Tongaso, Josué abungbi azo kue na ndo oko, na Jéhovah afa Acan tongana zo ti nzi ni. Acan atene: ‘Mbi sara siokpari. Mbi bâ pendere bongo na lor na argent, na mbi sara nzara ni mingi si mbi mû ni. Mo yeke bâ ala na ndo so mbi lu ni dä na yâ ti tente ti mbi.’

Tongana a wara aye so kue awe na a ga na ni na Josué, lo tene na Acan: ‘Mo ga na ye ti sioni so na ndo ti e ngbanga ti nyen? Bâ, fadeso Jéhovah ayeke sara sioni na mo!’ Azo kue abo Acan na afami ti lo na tênë juska ala kui. Ye so afa na e so a lingbi e mû lâ oko pëpe ye so ayeke ti e pëpe.

Na pekoni, Israël akiri ague atiri na Aï. Ti so ni, Jéhovah amû maboko na azo ti lo, na ala hon Aï na ngangu.

Josué 7:1-26; 8:1-29.



Ahundango tënë

  • Na lê ti foto ni, koli wa la ayeke lu aye ti mosoro ti Jéricho na yâ ti sese so? Azo wa la ayeke mû maboko na lo?
  • Ngbanga ti nyen ye so Acan na sewa ti lo asara ayeke sioni mingi?
  • Jéhovah atene nyen tongana Josué ahunda lo ngbanga ti nyen azo ti Israël ahon na ngangu pëpe na yâ ti bira ti Aï?
  • Na peko ti so a ga na Acan nga na azo ti da ti lo na gbele Josué, a sara nyen na ala?
  • Ngbanga so a fâ na li ti Acan afa na e kota ye wa?

Ambeni hundango tënë

  • Diko Josué 7:1-26.

    Asambela ti Josué afa nyen na ndo ti songo so lo yeke na ni na Wasarango lo? (Jos. 7:7-9; Ps. 119:145; 1 Jean 5:14).

    Ye so Acan asara afa nyen? E lingbi ti manda nyen na lege ti ye so lo sara so? (Jos. 7:11, 14, 15; aProv. 15:3; 1 Tim. 5:24; aHéb. 4:13).

  • Diko Josué 8:1-29.

    Kungba wa e oko oko kue e yeke na ni na mbage ti kongregation laso? (Jos. 7:13; Lév. 5:1; aProv. 28:13).