Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

46: Gbagba ti Jéricho

46: Gbagba ti Jéricho

NYEN la asara si gbagba ti Jéricho so akungbi? A yeke mo bâ mo tene mbeni kota bombe si atï na ndo ni. Me na ngoi ni kâ, azo ayeke na abombe pëpe, ala yeke nga même na ngombe pëpe. A yeke mbeni ye ti kpene nde so Jéhovah asara! Zia e bâ ye so asi.

Gbagba ti Jéricho akungbi

Bâ tënë so Jéhovah atene na Josué: ‘Mo na aturugu ti mo, ala tambela ala ngoro kodoro ti Jéricho. Ala ngoro kodoro ni fani oko lâ oko oko teti lango omene. Ala yô arche ti mbele ni, na a lingbi aprêtre mbasambala ahon kozo na trompette na yanga ti ala, na arche ni ayeke ga na peko ti ala.’

‘Na lango mbasambala ni, ala ngoro gbata ni fani mbasambala. Na pekoni, ala huru trompette a ninga, na azo kue adekongo ngangu. Fade gbagba ni ayeke kungbi na sese!’

Josué na azo ti lo asara ye so Jéhovah atene na ala. Tongana ala yeke tambela, ala zi yanga oko pëpe. A mä gi toto ti gere ti ala nga na ti atrompette ni. Peut-être awato ti azo ti Nzapa asara mbeto mingi. Mo bâ bengba kamba so a kanga na ndo ti fenêtre so? A yeke fenêtre ti zo wa? Biani, Rahab asara ye so awakala use ni atene na lo ti sara. Afami ti lo kue ayeke na yâ ti da ti lo na ala yeke bâ ye so asi.

Josué

Na nda ni, na lango mbasambala ni, na peko ti so ala ngoro gbagba ni fani 7, ala huru trompette na ala dekongo, si gbagba ti Jéricho atï. Josué atene: ‘Ala fâ azo ti gbata ni kue, na ala gbi gbata ni. Ala gbi ye kue so ayeke na yâ ni. Me gi lor, argent, gengere nga na wen si ala bata ni, ala zia aye so na tabernacle ti Jéhovah.’

Josué atene na awakala use so: ‘Ala gue na da ti Rahab, ala sigigi na lo na afami ti lo kue.’ Rahab na afami ti lo asö kuâ, tâ gi tongana ti so awakala ni atene na lo.

Josué 6:1-25.



Ahundango tënë

  • Jéhovah atene na akoli so ague ti sara bira nga na aprêtre ti sara nyen na yâ ti lango omene?
  • A hunda na akoli ni ti sara nyen na lango mbasambala ni?
  • Tongana ti so mo yeke bâ na lê ti foto ni, nyen la asi na gbagba ti Jéricho?
  • Nda ti bengba kamba so ayeke na lê ti fenêtre so ayeke nyen?
  • Josué atene na azo ti bira ni ti sara nyen na azo ti kodoro ni nga na kodoro ni mveni? Ka ti argent, lor, gengere na wen so ala yeke wara ni?
  • A hunda na awakala use ni ti sara nyen?

Ambeni hundango tënë

  • Diko Josué 6:1-25.

    Lani, azo ti Israël angoro tere ti gbagba ti Jéricho fani mingi na lango mbasambala ni. Tongana nyen ye so akpa kusala ti fango tënë ti aTémoin ti Jéhovah na lâ ti nda ni so? (Jos. 6:15, 16; Es. 60:22; Mat. 24:14; 1 aCor. 9:16).

    Tongana nyen tënë ti prophétie so ayeke na Josué 6:26 aga tâ tënë ngu 500 tongaso na pekoni? Ye so afa nyen na e na ndo ti tënë ti yanga ti Jéhovah? (1 aGbia 16:34; Es. 55:11).