Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

45: Fango kota ngu ti Jourdain

45: Fango kota ngu ti Jourdain

BÂ! AZO ti Israël ayeke fâ kota ngu ti Jourdain! Me ngu ni ayeke na ndo wa? A yeke ngoi ti ngu. Na ngoi ni so, ngu ayeke pika ka mingi, na ngu ti Jourdain asuku fade mingi. Me bâ, ti fadeso ngu ni ahule kue awe, na a ngbâ gi kuru sese ni. Azo ti Israël ayeke tambela na ndo ni tongana ti so ala sara lani na Kota Ngu Bengba. Ngu ni kue ague na ndo wa? Zia e bâ.

Azo ti Israël afa ngu ti Jourdain

Tongana ngoi ni asi awe ti fâ ngu ti Jourdain, Jéhovah atene na Josué ti tene tënë so na azo ni: ‘A lingbi aprêtre amû arche ti mbele na ala hon kozo. Tongana ala dö ngu ti Jourdain, ngu ni ayeke luti.’

Tongaso, aprêtre ayô arche ti mbele ni, na ala hon kozo ti azo ni. Tongana ala si na kota ngu ti Jourdain, aprêtre ni alï na yâ ti ngu ni. Ngu ni asua na ngangu na alï mingi. Me tâ gi na ngoi so ala dö ngu ni, ngu ni ato nda ti kaï ti sua! So tâ ye ti kpene! Jéhovah akanga lege ti gango ti ngu ni, si yeke yeke ngu ni asua mbeni pëpe na yâ ti Jourdain.

Aprêtre so ayô arche ti mbele ni ague aluti na bê ti kuru sese ti Jourdain. Mo bâ ala na lê ti foto so? Na ndembe so ala yeke luti kâ, azo ti Israël kue ayeke fâ kota ngu ni na gere.

Tongana azo ni afâ ngu ni awe, Jéhovah atene na Josué ti tene tënë so na angangu koli 12: ‘Ala gue na ndo so aprêtre ayeke luti na arche ti mbele dä, ala mû atênë 12 kâ, ala gue na ni, na ala zia ni na ndo ti tere na ndo so ala yeke lango ande dä na bï so. Tongaso, tongana amolenge ti ala ahunda ala mbeni lâ na ndo ti atênë so, ala yeke tene na ala so ngu ti Jourdain aluti na lâ ni so arche ti Jéhovah afâ kota ngu ni. Atênë ni ayeke dabe ti ala na ye ti kpene so!’ Josué azia nga atênë 12 na ndo ti tere na ndo so aprêtre aluti dä.

Josué

Na nda ni, Josué atene na aprêtre so ayô arche ti mbele, lo tene: ‘Ala sigigi na yâ ti ngu ti Jourdain ni.’ Tâ gi na ngoi so ala sigigi, ngu ni akiri ato nda ti sua.

Josué 3:1-17; 4:1-18.



Ahundango tënë

  • Miracle wa Jéhovah asara ti mû lege na azo ti Israël ti fâ ngu ti Jourdain?
  • Ti fâ ngu ti Jourdain, a lingbi azo ti Israël asara nyen ti fa so ala yeke na mabe?
  • Ngbanga ti nyen Jéhovah atene na Josué ti mû akota tênë 12 na place so ngu ni asua dä?
  • Nyen la asi tâ gi na ngoi so aprêtre ni asigigi na yâ ti Jourdain?

Ambeni hundango tënë

  • Diko Josué 3:1-17.

    Tongana ti so mbaï ni afa, a lingbi e sara nyen ti tene Jéhovah amû maboko na e na airi tënë nzoni na ndo ti e? (Jos. 3:13, 15; aProv. 3:5; Jacq. 2:22, 26).

    Ngu ti Jourdain ayeke lani tongana nyen na ngoi so azo ti Israël afâ ni ti gue na Sese ti Zendo? Tongana nyen ye so amû gonda na iri ti Jéhovah? (Jos. 3:15; 4:18; Ps. 66:5-7).

  • Diko Josué 4:1-18.

    Atênë 12 so a mû ni na yâ ti ngu ti Jourdain na a zia ni na Guilgal ayeke teti nyen? (Jos. 4:4-7).