Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

44: Rahab ahonde awakala

44: Rahab ahonde awakala

AKOLI use so mo bâ na lê ti foto so ayeke na yâ ti kpale. A lingbi ala kpe, tongaso pëpe a yeke fâ ala. Akoli so ayeke azo ti Israël so aga ti bembe ndo. Wali so ayeke mû maboko na ala ti kpe so ayeke Rahab. Da ti Rahab la, a yeke na ndo ti gbagba ti gbata ti Jéricho. Zia e bâ ngbanga ti nyen akoli so ayeke na yâ ti kpale.

Azo ti Israël aga nduru ti fâ kota ngu ti Jourdain ti gue na sese ti Canaan. Me kozoni si ala fâ ngu ni, Josué atokua awakala use so. Lo tene na ala: ‘Ala gue abâ sese ni nga yâ ti gbata ti Jéricho.’

Rahab na awakala use ti Israël

Tongana awakala ni alï na yâ ti Jéricho awe, ala gue na da ti Rahab. Me mbeni zo atene na gbia ti Jéricho, atene: ‘Azo use ti Israël aga ge na bï so ti bembe ndo na yâ ti kodoro ti e.’ Tongana gbia ni amä tënë so, lo tokua azo na Rahab, na ala tene na lo: ‘Akoli use so ayeke na da ti mo so, sigigi na ala.’ Me Rahab ahonde ala awe na li ti da ti lo. Tongaso, lo tene: ‘Tâ tënë, ambeni koli aga na da ti mbi, me mbi hinga ndo so ala londo dä pëpe. Ala sigigi tongana ndo akomanse ti vuko, kozoni si a kanga kota yanga ti gbagba ti gbata ni. Tongana ala gue hio, ala yeke wara ala!’ Tongaso, azo ti gbia so ague na peko ti ala.

Tongana ala hon awe, Rahab ague hio na li ti da ti lo, na lo tene na awakala ni, lo tene: ‘Mbi hinga so Jéhovah ayeke mû ande na ala sese so. E mä tongana nyen lo hule Kota Ngu Bengba na ngoi so ala yeke sigigi lani na sese ti Egypte, nga tongana nyen ala fâ gbia ti Sihon na ti Og. Mbi sara nzoni na ala. Tongaso, mbi hunda na ala ti mû yanga na mbi so ala yeke sara ande nzoni na mbi nga. Ala bata babâ ti mbi na mama ti mbi na fini, aita ti mbi ti koli nga na aita ti mbi ti wali.’

Awakala amû yanga so ala yeke sara tongaso, me a lingbi Rahab asara mbeni ye. Awakala ni atene na lo: ‘Kanga bengba kamba so na fenêtre ti mo, na iri afami ti mo kue ti ga na yâ ti da ti mo. Tongana e kue e ga ande ti mû Jéricho, si e bâ kamba so na fenêtre ti mo, e yeke fâ zo oko na da ti mo pëpe.’ Tongana awakala ni akiri na tere ti Josué, ala tene na lo ye kue so asi.

Josué 2:1-24; aHébreu 11:31.



Ahundango tënë

  • Rahab alango na ndo wa?
  • Akoli use so ayeke na lê ti foto so ayeke azo wa? Ala gue na Jéricho ti sara nyen kâ?
  • Gbia ti Jéricho ahunda na Rahab ti sara nyen? Rahab akiri tënë, lo tene nyen?
  • Tongana nyen Rahab amû maboko na akoli use so? Lo hunda na ala ti sara nyen na lo?
  • Awakala use so amû yanga ti sara nyen na Rahab?

Ambeni hundango tënë

  • Diko Josué 2:1-24.

    Tënë so Jéhovah atene na Exode 23:28 aga tâ tënë tongana nyen na ngoi so azo ti Israël aga ti tiri bira na Jéricho? (Jos. 2:9-11).

  • Diko aHébreu 11:31.

    Tongana nyen tapande ti Rahab afa nene ti duti na mabe? (aRom. 1:17; aHéb. 10:39; Jacq. 2:25).

TI HINGA AMBENI TËNË

Rahab ahinga atene Jéhovah ayeke tâ Nzapa

Bâ tongana nyen la Jéhovah abata Rahab na afami ti lo tongana lo futi Jéricho.